Job 1 - Syin Chin Bible

Satan in Job Ze et

¹ Uz ngam ah a teang Job kici mi khat om a, ama in Pathian bia in, ama ii tungah thumaan hi. Ama mihing pha khat hi a, siatna peuma a vawt ngawl natu in kidawm hi.

² Ama in tapa sali le tanu thum nei a,

³ tuaciang tuu 7,000 kalaoh 3,000 khui 1,000 le laa 500 nei hi. Ama in naseam tam mama zongh nei a, Nisuana ngam sungah a haubel pa hi.

⁴ Job ii tapate in a ban a banin anneakpoai vawt nithi hi, tua poai ah a dangte theampo pai in a suapuinumeite thum zongh a kihel tu in sam tawntung uh hi.

⁵ A anneakpoai khuavak ni zing simin Job sia zingtuung in tho a, a tate khat sim a thiansua natu in sangaw biakpiakna vawt hi. Ama in hi bangin vawt tawntung hi, banghang ziam cile a tapate khat po in, a tupkhol ngawl bul Pathian a simmawkna taw in khialna nei tha thei tu hi ci in, a ngaisut hang hi.

⁶ Topa mai ah vantung mite a kilak tu ni a tun ciang tuate sungah Satan kihel hi.

⁷ Topa in Satan tungah, “Bang teng vawt ni ziam?” ci in dongh hi. Satan in, “Mun khat pan mun khat ah pai in simleitung kiimveal in ka vak kawkoai hi,” ci in zo hi.

⁸ Topa in, “Ka naseampa Job na phawk tha ziam? Leitung ah ama bangin a thumaan le a pha kuama om ngawl hi. Ama in kei hong bia a, a sia a vawt ngawl natu kidawm hi,” ci hi.

⁹ Satan in, “Hong biak hu in bangma nga buale Job in nang hong bia na tu ziam?

¹⁰ Ama le a innkuan le a neisa theampo nangma in na huuksak tawntung hi. A sep a vawt theampo thupha na pia a, ngam bup dim tu za dongin ngannote na pia hi.

¹¹ Ahihang tu in a neisa theampo nangma in laaksak ci tawng — na maitang pan hong haamsiat tu hi!” ci in zo kik hi.

¹² Topa in Satan tungah, “Pha hi, a neisa theampo nangma khut sungah om hi, ahihang Job pumpi tatak susia ngawl het tu ni hi,” ci hi. Tua ahiciang Satan in paisan hi.

Job ii Tate le A nei a lamh Kisuksiatsak

¹³ Ni khat ni Job ii tate a upabel pa ii inn ah anneakpoai a vawt laitakin,

¹⁴ Job kungah kamtai khat hong tai hi. Ama in, “Kote lo sungah khuikaap taw naseam in om a, laate lo hui nganthana ah taa uh hi.

¹⁵ Thakhat thu in Sabean te in hong sim a, tua nganno teng ngu siat hi. Amate in keima simngawl na naseam teng thatlum uh hi. Nang tungah thu ko tu in keima bekma suakta khi hi,” ci hi.

¹⁶ A thu son man tak ngawl lai in naseam dang khat hong theng a, ama in, “Khualeng in na tuute le a cingte hal lum siat hi. Nang tungah thu ko tu in keima bekma suakta khi hi,” ci hi.

¹⁷ A thu son man tak ngawl lai in naseam dang khat hong theng a, ama in, “Chaldean ngalnguk seamte pawl thum in hong sim a, kalaoh theampo ciapui in na naseamte keima simngawl thatlum siat hi. Nang tungah thu ko tu in kei bekma suakta khi hi,” ci hi.

¹⁸ A thu son man tak ngawl lai in naseam dang khat hong theng a, ama in, “Na tate na tapa ulianbel sia ii inn ah anneakpoai vawt in a om laitak,

¹⁹ sennealngam sang pan vuipi suangval hong va hi. Tuasia in a inn seamvawk a, amate theampo thisak siat hi. Na tungah thu ko tu in keima bekma suakta khi hi,” ci hi.

²⁰ Tuasia ciang Job dingto a, khuangai in a puansilh teng baltham hi. A sam meet a, lei ah bokcip hi.

²¹ Ama in, “Ka pian lai in ka nguaktang in ka suak a, ka nguaktang in ka thi tu hi. Topa in hong pia a, tu in Topa in la kik hi. Ama min kipok tahen!” ci hi.

²² Ama tungah hi bangin thu piang napi Job in Pathian mawsiat ngawlin mawna vawt ngawl hi.