Jeremiah 9 - Syin Chin Bible

¹ Ka lu sia tuikhuk hi hen a, ka mitte thitui ii naak khat hi le uuk ing, tua hi thong le a kithatlum ka mite atu in a sun a zanin ka kap zo tu hi.

² Ka mite taisan thei in sennealngam sungah om natu mun khat nei leng ka uuk hi. Amate sia a thu maan ngawl vive, ngual a leeheak honkhat hi uh hi.

³ Amate sia leilot thu son tu in kinging tawntung uh hi; thumaanna taw sangin thumaan ngawlna taw ngam uk zaw uh hi. Topa in, “Ka mite in thusia khat zawkciang khat vawtin kei sia a Pathian bang zongh in hong sim bua uh hi,” ci hi.

⁴ A kuama po in a lawmpa tungtaang a kikep kul tu hi, kuama in a suapuipa muang thei ngawl hi; banghang ziam cile suapui theampo sia Jacob bangin ngualtheam thei a, a kuama po in a lawmte sonsia hi.

^5-6 Amate theampo in a lawmte lampui khial uh a, kuama in thumaan son ngawl hi; amate in a leeite uh leilot thuson hil uh a mawna khialna a vawt uh sia thasua peuma ngawl tu hi. Amate in ngoltol ngamtatna khat zawkciang khat vawt uh a; theamna taw a ngamtatnate khat zawk khat kizom hi. A mite in ama nial hi Topa in ci hi.

⁷ Tua ahikom Vaanglianbelpa Topa in, “Ka mite leisung sumpiang bangin ka thiangsak tu a, ka sittel tu hi. Ka mite in a sia vawt zo a — amate bang law tuan thei tu khi ziam?

⁸ Amate ii leeite sia thi theina thaltangte bang ahi hi; leilot thu veu son uh hi. mi simin a innpaamte tungah kamthiam pau hi, ahihang thaang siana kam hi nginge hi.

⁹ Hi thute hu in amate daan pia ngawl tu khi ziam? Hi bang minam khat tungah phula ngawl tu khi ziam? Keima Topa in ka son hi,” a ci hi.

¹⁰ Keima in, “Mualte atu in khuangai a mau in, ngamsung lohingna munte atu in ka kap tu hi. Banghang ziam cile tua munte kongaw a, kuama khualhawin kaantan ngawl hi, ngannote haamna aw kiza nawn ngawl hi; vacimte le ngamsate tai siat zo hi,” ka ci hi.

¹¹ Topa in, “Jerusalem khua sia na a sia te kholna le, ngiate teenna mun ka suaksak tu hi; Judah ngam khuapite sia kuama ii teen ngawlna sennealngam suak tu hi,” ci hi.

¹² Keima in, “Topa awng, hi ngam sia kuama khualhaw ngawl natu in banghangin kisia cip a sennealngam bangin kongaw ziam? Akua in hi bang thute a tel thei tu za in ciim tu ziam? Midangte tungah sonsawn thei tu in akua tungah na thiang son zo ziam?” ci in ka dongh hi.

¹³ Topa in, “Ka mite in ka piak hilcianna taisan ahikom hi thu piang hi. Amate in ka thu hong mang ngawl, ka ci bangin ngamta ngawl uh hi.

¹⁴ Tua kawmkaal ah, a thin uh pui in a taanghpupite ii hil bangin Baal milimte bia uh hi.

¹⁵ Tua ahikom, Vaanglianbelpa Topa Israel ii Pathian, keima ii vawt tu sia ngai in: Ka mite neak tu in a khaa thingno kungte ka pia tu a, a dawn tu in nguu tui ka pia tu hi.

¹⁶ Amate ahizong a taanghpupite ahizong ii a zaak ngeingawl minamte sungah amate ka thethaang tu a, amate ka siatcipsak siat matengin a do tu in ngalkap honte ka puak tu hi,” ci in zo hi.

Jerusalem Mite in Huna Ngen

¹⁷ Vaanglianbelpa Topa in, “Bang piang ziam ngaisun vun! A kapte hong pai natu in sam vun, mithi vuina late a sa numeite sam vun,” ci hi.

¹⁸ Mi honpi in, “Ih mittangte thitui taw a kidim mateng le, ih mitkhute kaana taw a kawt mateng amate hong manlang in, mithi vui la ei hong sak natu son vun,” ci uh hi.

¹⁹ Zion khua sung a kaana aw ngai vun; “Ih lalcip hi! Hong kimaimawl cipsak hi! Ih ngam ih nusiat kul tu hi ih innte hong suksiatsak hi,” ci uh hi.

²⁰ Keima in, “Topa thu ngai vun, no numeite awng, a kammalte nadon vun. Na tanute sia kaa tu dan hil vun a, na lawmte sia mithi vuina lasak zia hil vun.

²¹ Thina sia ih khelkite tawnin hong pai a, ih kumpi inn sung hong tum hi; Thina in lampite ah patangte le sumbukte ah tangvalte vaatlum hi.

²² Mithi luangte sia, lo sungah eak vuum bang, anlate in taang at a, a nusiat bangin, kuama ii laak ngawl ankung bangin, mun theampo ah kithethaang kawkoai hi. Hi thu son tu a Topa ii kei hong sawl ahi hi,” ka ci hi.

²³ Topa in, “Miciimte in amate ii ciimna, mi thahatte in amate ii thahatna, mihaute in amate ii haunate kisakthei pui heak hen.

²⁴ Mihing khat pawpo in a kisathei nuam ahile, keima hong heakna le hong telna kisakthei pui tahen, banghang ziam cile ka itna in kipin kho a, thumaan le thutang ka seam hi. Hite sia ka thin hong nuamsakte ahi hi. Topa keima in ka ci zo hi,” ci hi.

^25-26 Topa in, “A sam uh a tomin a meet Egypt, Judah, Edom, Ammon, Moab mite le sennealngam ah a teang mite daan ka piak tu hun hong theng tu hi. Hi mite theampo a vun uh ki at hi napi, vunteap ki atna taw kisai zui tu thuciamna zui ngawl uh hi. Hi mite le, Israel mite kuama in ka thuciamna zui ngawl uh hi,” ci hi.