Jeremiah 8 - Syin Chin Bible

¹ “Tua hun ciang Judah ngam kumpite le uliante, thiampite, kamsaangte le a dang Jerusalem ah a teang mihingte ii a ngute sia a thaan sung pan kila keak tu hi.

² A ngute khawmtua a, kiphumsak tu ci thada, lei ah eak vawk bangin pheang om tu hi. Tuate sia a it le a na a sepsak, thu a dok le a biak uh ahi ni, tha le aksite mai ah kipheangpha tu hi.

³ Hi a ngilo minam sung pan a nungta lai sun, ka thethaangna munah a teang teng in a nuntak tu sangin thi nuam zaw tu uh hi. Kei Vaanglianbelpa Topa in ka son zo hi,” ci hi.

Mawna le Daan piakna

⁴ Topa in ama ii mihingte tungah hi bangin son tu in kei hong sawl hi, “Mihing khat a pu ciang, tho kik hi ngawl ziam? Mihing khat lam a khial ciang, heak kik hi ngawl ziam?

⁵ Tua ahile, ka mite awng, banghang kei kung pan puapial in hong heak kik nawn ngawl nu ziam? Na milimte uh ma len lingleng in hong heak kik nuam ngawl nu hi.

⁶ Pha tak ma in ka ngai hi, ahihang thumaan na son bua uh hi. Na seksolna uh hu in khat zongh na khuangai bua uh hi; ‘Bang khialna vawt ka na khi ziam’ ci in khat zongh in na dongh bua uh hi. Siphu khat ngal sim tu a nawtai bangin, a kuama theampo a uuk bang po ngamta tan uh hi.

⁷ Stork vacimliante ngawngawn in a heak kik tu hun he uh hi; vakhute, pialpiate le vaphitte in mun dangah a tai tu hun he uh hi. Ahihang ka mite awng, no kong ukna thukhamte na he bua uh hi.

⁸ Note in ko ka ciim uh a, na thukhamte ka he uh hi, bangbangin ci thei tu nu ziam? En vun, thumaan ngawl thukham hilte in thukhamte kheal uh hi.

⁹ Na mipilte uh mai zumin om hi; amate lungmangin a ci a law he ngawl uh hi. Amate in ka kammalte nial zo hi; tu in amate in bang pilna nei uh ziam?

¹⁰ Tua ahikom a lote sia ngual lo nei thak te ka pia tu a, a zite sia pasal dangte ka pia tu hi. A lian a no a vekpi in thumaan ngawlin sum vawt sawm uh hi. Kamsaangte le thiampite ngawngawn ngualtheam uh hi.

¹¹ Ka mite ii liammate sia a vuntham bak bang bek, amate in sua uh hi. Pha siat ngawl napi amate in ‘Pha siat hi!’ ci uh hi.

¹² Ka mite awng, hi a kiihuai nate na vawt uh manin na mai uh a zum ziam? Hi ngawl hi, na mai uh zum vet ngawl hi; maizum natu zia zongh na he bua uh hi! Tua ahikom midangte puk bangma in na puk tu uh hi; daan kong piak ciang na bona uh hi tu hi. Keima Topa in ka son zo hi.

¹³ “Anlapa in a lo an a kaikhop bangma in, keima in ka mite ka kaikhawm nuam hi; ahihang amate sia a nga nga ngawl sapitkung khat bang, a nga nga ngawl theikung khat bang ahi hi; a teete ngawngawn vul zo hi. Tua ahikom, hi ngam a la tu in a puasang mite thu ka pia zo hi.”

¹⁴ Pathian ii mite in “Banghangin to lalai hi ziam?” ci in dongh uh hi. Hong pai tavun, a muanhuai khuapite ah tai in tua munah ih thi tu hi. Ih Topa Pathian in ei sia a thi tu in hong see zo hi; ama in ih neak tu nguu hong pia zo hi, banghang ziam cile eima in ama tungah ih maw zo hi.

¹⁵ Kilemna le ciidamna hun khat ih lamen hi, ahihang bangma kimanna om ngawl a; launa hong theng zaw pumsai hi.

¹⁶ Dan khuapi sungah ih ngalte hong theng zo uh hi; a siphute ii a naak thin uh ih za hi. A siphute a haam uh ciang ngam buppi liing hi. Ih ngam le ih ngamsung a, a om na theampo, ih khuapi le khua mite theampo susia tu in ih ngalte hong pai zo uh hi.”

¹⁷ Topa in, “Kidawm vun! No sungah a nguu nei, a kizual thei ngawl ngulte kong tha tu a, amate in no hong tu tu uh hi,” ci hi.

A Mite atu Jeremiah ii Khuangaina

¹⁸ Ka khuangaina kidamsak thei ngawl hi; ka thin na mama hi.

¹⁹ Ngai vun! Ngamsung mun theampo ah ka mite ii kaana aw ka za hi, “Zion khua ah Topa om nawn ngawl ziam? Zion ii kumpipa tua munah om nawn ngawl ziam?” ci in kap uh hi. Amate ii kumpipa ahi, Topa in zo kik a, “Banghangin na milimte na biakna le a man nei ngawl na ngamdang pathiante na paaina uh taw in kei hong thin uuksak nu ziam?” ci hi.

²⁰ Mihingte in, “Khuakhaal hun bo zo in, an kila siat zo a, ahihang ei hong kingum ngawl lai hi,” ci in kap uh hi.

²¹ Ka mite thuakna hangin ka thin na hi; hee in ka kap hi; ka thinkiam dikdek hi.

²² Gilead ah zatui om ngawl ziam? tua munah syavuan te om ngawl ziam? Tua ahile banghangin, ka mite kidamsak ngawl thong ziam?