Jeremiah 7 - Syin Chin Bible

Biakinnpi sungah Jeremiah Thuhil

^1-3 Topa in kei sia Judah mite ii biakpiakna nei tu in a tumna Biakinnpi kongpi ah hong puak hi. Ama in tua munah ding ta'n a, Israel te ii Pathian, Vaanglianbelpa Topa ii amate tungah a son nop hi thute taangko tan: “Na nuntak zia uh le na ngamtatnate uh kikheal vun, tua hile hi munah kong teang suaksak tu hi.

⁴ ‘Ei ngammuang zo hing! Hisia Topa ii Biakinnpi ahi hi, hisia Topa ii Biakinnpi ahi hi, hisia Topa ii Biakinnpi ahi hi!’ a ci tua theamna kammalte um nawn heak vun.

⁵ “Na nuntakzia uh kheal vun a, na sep na vawt uhte tawlnga vun. Khat le khat a pha in kivawt vun.

⁶ Noma phattuam natu in ngamdangmite, tangate le meingongte zothaw nawn heak vun. Hi ngam sungah a mawbaang ngawl mite that nawn heak vun. Pathian dangte bia nawn heak vun, banghang ziam cile tua in noma hong lalsak tu hi.

⁷ Na kikheal uh le, na taanghpupite tungah a nei top tu ka piaksa hi ngam sungah kong teang suaksak tu hi.

⁸ “En vun, leilot thute um nu hi.

⁹ Note in nguta, ngual that, palngul mawna vawtin, leilot thu taw kiciam nu hi, Baal tungah biak piaknate pia a, nidang a na heak ngeingawl uh pathiante na bia uh hi.

¹⁰ Hi ka huasaakte na vawt uh a, tua zawkciang ka Biakinnpi sungah pai in, keima mai ah na ding uh a, ‘Ei ngammuang zo hing!’ na ci uh hi.

¹¹ Ka Biakinnpi sia misuamte, inn phuulte bukna in ngaisun nu ziam? Keima in na vawt uhte kong mu zo hi.

¹² Keima nong biak natu mun a, ka teal maksak phit ahi Shiloh ah pai tavun a, Israel ka mite ii mawna khialnate hu in tua khua tungah ka vawtte en tavun.

¹³ Hi mawna khialnate theampo na vawt siat zo uh a, kong papau kong hihil hangin nong ngai bua uh hi. Kong sam ciang nong zo nuam bua uh hi.

¹⁴ Tua ahikom, Shiloh tungah ka vawt bangin note ii muan, hi keima ii Biakinnpi tungah ka vawt tu hi. Na taanghpupite uh le noma kong piaksa hi mun tungah Shiloh tungah ka vawt bang keak ma in ka vawt tu hi.

¹⁵ Na mealheakte uh ahi, Israel mite ka nawkeak bangma in kong mu thei ngawlna munah note kong notkeak tu hi. Keima, Topa in ka son zo hi,” hong ci hi.

Mihingte ii Thu Nit Ngawlna

¹⁶ Topa in, “Jeremiah awng, hi mihingte atu in thungetsak heak in. Amate taangin kap heak in a, thungen heak in; kei tungah hesuakna hong ngen heak in, banghang ziam cile nong thuumna hong ngai ngawl tu khi hi.

¹⁷ Amate in Judah ngam khuapite sung le Jerusalem khua lampite ah bang teng vawt ci sia mu ngawl ni ziam?

¹⁸ Patangte in thing tomin, pasalte in meithut a, numeite in Vantung Kumpi nu a ci uh numeipathian atu in moh beang, moh em in om uh hi. Ka thin nat natu in, amate in pathian dangte tungah biakpiakna in sapittui buak si uh hi.

¹⁹ Ahihang amate ii thin a natsak sia, keima tatak ka hi ziam? Hi ngawl hi, amate le amate kivawtin a na hi a, maizum kipia ahi uh hi.

²⁰ Tua ahikom Vaanglianpipa Topa keima in, hi Biakinnpi tungah ka thin uuk mama na sia ka buak tu hi. Mihingte le nganhingte, tuaciang thingkungte le ankungte tung ngawngawn zongh ah a kibangin ka thin uuk tu hi. Ka thin uukna sia kuama sukmit thei ngawl meikuang bang hi tu hi.

²¹ “Ka mite awng, biakpiakna pawlkhat sia biaknatau tungah haltumin, pawlkhat sia ne thei nu hi. Ahihang Topa keima in, a vekpi ma zong ne thei nu hi kong ci hi.

²² Egypt ngam panin na taanghpupite ka laak lai in meihal biakpiakna le a dang tuatuam biakpiakna taw kisai thupiakna ka nei bua hi.

²³ Ahihang keima in amate ii Pathian ka hi natu le amate sia keima ii mite ahi natu in ka thu a nit natu thu ka piak ma ahi hi. Tuaciang ka thupiak bangin a nuntak thei natu in amate tungah ka son hi, tua hile amate a maivang tu uh hi.

²⁴ Ahihang amate in ka thu ni ngawl, nadon ngawl uh hi. A thinpuina le a thin ngitlo nate ii sawl bangin seam zaw ahikom, amate phazaw ngawlin sia vaial zaw uh hi.

²⁵ Na taanghpupite Egypt ngam pan a pusua ni pan kipan tuni ciang dong ka naseam kamsaangte kong puak tan viuveu hi.

²⁶ Ahihang kuama in thu ngai ngawl, nadon ngawl uh hi. Na taanghpupite uh sangin na thin uh pui zaw in langpan kan zaw nu hi.

²⁷ “Tua ahikom, Jeremiah awng, ka mite tungah hi thute theampo son tu ni hi, ahihang amate in hong ngai ngawl tu uh hi; amate na sam tu a, ahihang hong zo ngawl tu hi.

²⁸ Amate Topa Pathian, keima ii thu hong ni ngawl minam hi a, kihil in daan a kipiak hang tel thei tuan ngawl uh hi ci in amate tungah son in. Thumaanna bo a, son zongh in kinei nawn ngawl hi.

Hinnom Kuam sungah Mawna Khialna Vawtnate

²⁹ “Jerusalem mite awng, kap vun; Na sam uh at tan vun a, vawk vun. Mual dawnah mithi vuina lasa vun, banghang ziam cile keima Topa ka thin uuk a, ka mite ka nial zo hi.

³⁰ “Judah mite in thusia khat vawt zo uh hi. Amate in ka huasaak a milimte ka Biakinnpi sungah koi in ka Biakinnpi ninsak uh hi.

³¹ A tapate le a tanute mei hal biakpiakna in a nei thei natu in Hinnom Kuam sungah Topheth kici, biaknatau khat amate in sa uh hi. Hi sia vawt tu in amate thu ka pia bua hi — tuasia ngaisut zong ka nei bua hi.

³² Tua ahikom, tua mun sia Topheth ahibuale Hinnom Kuam a kici nawn ngawl tu hun hong theng tu a, Kithalupna Kuam kici zaw tu hi. Mithi phum natu mundang om ngawl tu ahikom amate in tua munah mithi phum tu hi.

³³ Mithi luangte sia vacimte le ngamsate ii an suak tu a, tuate a beng tu kuama om ngawl tu hi.

³⁴ Tua ngam sia sennealngam suak tu hi. Judah ngam khuapite sung le Jerusalem khua lampite tungah thinnopna le lungdamna awte le mopoai lungdamna awte ka bosak tu hi.