Jeremiah 47 - Syin Chin Bible

Philistia taw kisai Topa ii Thupuak

¹ Egypt kumpipa in Gaza khua a sim ma in Philistia mite taw kisai in Topa in keima tungah thu hong son hi.

² Ama in: “En in! Sak sangah tui khang a, nguntui pawm bangin luang tu hi. Tua tuite in leitung le a tungah a om na theampo, khuapite le a sungah a teang mihingte khuum tu hi. Mihingte in hu ngenin au tu uh a; lei tungah om theampo in nasia takin kap tu hi.

³ Amate in, siphu khuasuan ngingte, siphu ngalleang ngingte, a mui ngingte za tu uh hi. Nute pate sia a tate en kik tu in hong heak kik ngawl tu uh a; amate ii khutte a pangh ah kaai suk niingniang tu hi.

⁴ Philistia suksiat tu hun, Tyre le Sidon pan a, a nga sun hunate theampo khatan tu hun hong theng zo hi. Keima, Topa in Crete tuikulh pan a hong pai Philistia te theampo ka susia tu hi.

⁵ Gaza mite tungah heena lian theng zo a, Ashkelon ii mite dai dide in om uh hi. Philistia mi a om laiteng bang tanvei kap tu uh ziam?

⁶ ‘Topa ii Namsau awng! Bang tanvei vaat lai tu ni ziam? Na paai zuan kik in a, tua munah om in tawlnga in!’ ci in na au uh hi.

⁷ Ahihang a sep tu nasep ka piaksa ahiciang, bangbangin tawlnga thei tu ziam? Ashkelon le tuipi hui ah a teang mite sim tu in thu ka pia zo hi,” ci hi.