Jeremiah 43 - Syin Chin Bible

Egypt ngam ah Jeremiah Kipaipui

¹ Topa, amate ii Pathian in amate tungah a vekpi a son tu in hong thataak keima in mipite tungah ka son zo hi.

² Tuaciang Hoshaiah ii tapa Azariah le Kareah ii tapa Johanan le a kisa thei midangte theampo in kei tungah, “Leilot ni hi. Topa ih Pathian in kote Egypt ngam ah pai a ka teen ngawl natu uh hong son tu in nang hong sawl ngawl hi.

³ Babylon te in ko hong zothaw tu a, hong that thei ahibuale Babylon khua ah hong paipui thei natu in Neriah ii tapa Baruch in ko hong langpan in, nang hong thawn hi,” hong ci uh hi.

⁴ Tua ahikom Judah ngam sungah om tu a Topa ii thupiak sia, Johanan hikale ngalkapbu te hikale mipite hikale khat zongh in ni ngawl uh hi.

⁵ Tuaciang Johanan le ngalkapbu te theampo in Judah ngam ah a taanglai teng peuma sia, a kithethaang na ngamte pan hong heak kik mihingte theampo taw Egypt ngam ah paipui uh hi;

⁶ tua hong heakkikte sia pasalte, numeite, patangte le kumpipa ii tanute ahi uh hi. Amate in ngalkap hon ukpa Nebuzaradan ii Gedaliah kep tu a, a nusiat mihingte theampo le Baruch le keima zong hong paipui uh hi.

⁷ Amate in Topa ii thupiak sia ni ngawlin Egypt ngam Tahpanhes khua ciang dong pai uh hi.

⁸ Tua munah Topa in ka tungah,

⁹ “Suangtum lian pawlkhat la in a, hi khuapi sung kumpi zum inn tumna mai lampi hui a, a kipha suang ii nuai ah phum in; tuabang na vawt sia Israel mi pawlkhat in musak in.

¹⁰ Tua zawkciang, Vaanglianbelpa Topa Israel ii Pathian, keima in, ka naseam Babylon kumpipa Nebuchadnezzar sia hi munah kong puak tu a, ama in tua na phum suangtumte tungah a kumpi tokhum koi tu hi, a kumpi puanbuk sia tuate ii tung ma ah phalh tu hi, ci sia amate tungah son in.

¹¹ Nebuchadnezzar hong pai tu a, Egypt zo tu hi. Natna taw thi tu in a see sa tua mihingte sia natna taw thi tu a, thong a tak tu in a kisee sate thongtaak tu a, tuaciang ngal sungah kithat tu in a kisee sate, ngal sungah kithat tu hi.

¹² Egypt te pathiante ii biakinn teng mei taw ka hal tu a, tuaciang Babylon kumpipa in a pathiante mei taw hal, ahibuale pua in paipui tu hi. Tuucing pa in a puan tung pan khate vawkin a thiansak bangin, Babylon kumpipa in Egypt ngam thiangsak tu a, tua zawkciang ngalzo in cia tu hi.

¹³ Ama in Egypt ngam Heliopolis khua a, khansuang thiangthote susia tu a, Egypt pathiante ii biakinnte haltum tu hi,” hong ci hi.