Jeremiah 41 - Syin Chin Bible

¹ Tua kum a tha sali tha in, kumpi innkuan sung pan le kumpipa ii a ulianbelte sung pan khat ahi, Elishama ii tupa, Nethaniah ii tapa Ishmael sia mihing sawm taw Mizpah ah Gedaliah taw kimu tu in pai uh hi. Amate teng an a neakkhop laitakin,

² Ishmael le tua mihing sawmte in a namsau uh dokin Gedaliah thatlum uh hi.

³ Ishmael in Mizpah khua Gedaliah kungah a om Israel mite theampo le Babylon ngalkap tua munah a omte zongh thatlum hi.

⁴ A zing ciang, Gedaliah a kisuamlupna thu kuama heak ma in

⁵ Shechem, Shiloh le Samaria panin mihing sawmliat hong theng uh hi. Amate sia a khamul uh meetin a puan uh eaukeak in, amate le amate tetek kiliamsua ngawp uh hi. Amate in Biakinnpi ah piak tu in antang le paaknamtui keng uh hi.

⁶ Tua ahikom Ishmael sia amate muak tu in Mizpah panin kap kawkawm in pai hi. Amate kung a thet ciang Ishmael in, “Gedaliah en tu in hong tum ka ve vun,” ci hi.

⁷ Khuapi sung a tum po uh ciang, Ishmael le a mite in amate thatin a luang uh tuikhuk khat sungah vawk uh hi.

⁸ Ahihang amate ii pawlsung panin mihing sawm in Ishmael tungah, “Ko hong that heak in! Zungtaang, mangtaang, olive thau le khuaitui lo lai ah phual ku nei khu hi,” ci hi. Tua ahikom Ishmael in amate khoaikhe hi.

⁹ Ishmael ii thalup mithi luangte a vawkna tuikhuk sia Israel kumpipa Baasha ii Asa kumpipa a sim lai a, Asa kumpipa ii taw tuikhuk lian khat sia ahi hi. Ishmael in tua tuikhuk sia mithi luang taw kidimsak hi.

¹⁰ Tua zawkciang Gedaliah ii kep tu in ngalkap maang pa Nebuzaradan ii a koi, kumpipa tanute le Mizpah khua ah a om lai mite theampo sia Ishmael in thongtaaksak hi. Ishmael ii thong a taaksak tua mite Ammon ngam sang zot pui hi.

¹¹ Johanan le ama taw a omkhawm ngalkap lampuite theampo in Ishmael ii khialna lian a vawtna thu za uh hi.

¹² Tuasia hu in amate sia a mite taw ama del a Gideon tuili pui hui ah pha uh hi.

¹³ Ishmael ii mat thongtaakte in Johanan le ama taw hong paikhawm ngalkap lampuite a mu uh ciang a lungdam in,

¹⁴ amate sang kiheak in tai uh hi.

¹⁵ Ahihang Ishmael le a mihing liatte sia Johanan khut sung panin tai in, Ammon ngam ah suakta uh hi.

¹⁶ Tua zawkciang Ishmael ii Gedaliah a thalup zawkciang Mizpah pan thongtaak a, a paipuite — ngalkapte, numeite, patangte le kumpi inn naseam, numei uk pasal cilnge sate sia Johanan le ama taw a om ngalkap lampui te in uk uh hi.

^17-18 Babylon kumpipa ii ngamkhen uk in a koi Gedaliah sia Ishmael in suamlum ahikom amate in Babylon te kiita uh hi. Tua ahikom amate sia Babylon te taw a kipeal thei natu in Egypt ngam ah tai uh hi. Amate sia a paina lampi Bethlehem khua hui Chimham ah tawlnga uh hi.