Jeremiah 39 - Syin Chin Bible

Jerusalem Khuabona

¹ Zedekiah ii Judah kumpi a sua zawk a kum kuana, a tha sawm tha in Babylon kumpipa Nebuchadnezzar sia a ngalkap buppi taw hong pai in Jerusalem sim hi.

² Zedekiah ii kumpi a sua zawk kum sawm le kum khatna, a tha li tha, ni kua ni in khuapi luphungte kisulet hi.

³ (Jerusalem khuapi a kilaak ciang Babylon kumpipa ii uliante theampo hong pai in Kongpi Laita ah mun hong la uh hi. Tuate sungah Nergal Sarezer, Samgar Nebo, Sarsechim le Nergal Sarezer dangkhat kihel hi.)

⁴ Zedekiah kumpipa le a ngalkapte theampo in a piang thu a mu uh ciang zanlai in khuapi pan a suatak natu hanciam uh hi. Amate sia kumpi huan sung lam tawnin luphungte ngeal kikawnna kongpi lam tawnin, Jordan Kuam sangah suakta uh hi.

⁵ Ahihang Babylon ngalkaphonpi in delin Jericho khua nai zaangtam ah Zedekiah man uh hi. Tuasia ciang amate in Zedekiah sia Hamath ngamsung Riblah khua ah a om Nebuchadnezzar kumpipa kungah paipui uh a, tua munah Nebuchadnezzar in ama tungah thukhen hi.

⁶ Riblah khua ah Nebuchadnezzar kumpipa in Zedekiah ii mu tang ma in a tapate thatlum a, Judah ngam kumpi uliante zongh thatlumsak hi.

⁷ Tua zawkciang Zedekiah ii mittangte khelsak a, Babylon ah paipui tu in kol bulsak hi.

⁸ Tua hun sung ma in Babylon te in kumpi inn le mipite ii innte haltum a Jerusalem khua luphungte sutham uh hi.

⁹ A khakbel in ngalkap hon ukpa, Nebuzaradan in khuapi sungah a taanglai mite sia ama kung a zuan teng taw Babylon ah thongtaak tu in paipui khawm hi.

¹⁰ Ama in bangma nei ngawl a, a zawngkhalbel mihing pawlkhat sia Judah ngam ah nusia in sapithuante le lote pia hi.

Jeremiah ii Suatakna

¹¹ Ahihang Nebuchadnezzar kumpipa in a nuai a thute a piak natu in ngalkap hon ukpa, Nebuzaradan tungah thupia hi:

¹² “Pai in Jeremiah na mu ciang pha takin keam in. Vawtsia heak in, a dei pawpo vawtsak in,” ci hi.

¹³ Tua ahikom Nebuzaradan in kumpi uliante Nebushazban le Nergal Sarezer le Babylon kumpipa ii ulian dangte theampo taw

¹⁴ kumpi innhuang sung panin kei hong la uh hi. Amate in Shaphan ii tupa, Ahikam ii tapa Gedaliah kungah, keima inn ah ngam muang takin hong thet natu le pha tak hong kep tu in hong aap uh hi. Tuabangin tua mun ah om mite sungah ka teang hi.

Ebedmelech atu Lametna

¹⁵ Kumpi innhuang sungah thong hong kitaaksak lai in, Vaanglianbelpa Topa, Israel ii Pathian in hi bangin a ci teng sia,

¹⁶ Ethiopia mi Ebedmelech tungah a son tu in Topa in kei hong sawl hi. “Ka vawt tu hi ka ci bangin hi khuapi tungah nopsakna ahi ngawl siatna ka tungsak tu hi. Hi bangin hong pian ciang a mu tu in tua munah na om tu hi.

¹⁷ Ahihang Keima, Topa in nang kong dal tu a, na kiitak mihingte khut sungah hong ki aap ngawl tu hi.

¹⁸ Nang sia kong keamcing tu a, hong kithatlum ngawl tu hi. Kei hong muang na hikom na nuntakna suakta tu hi. Keima, Topa in ka ci zo hi.”