Jeremiah 1 - Syin Chin Bible

¹ Hi thubu sia Benjamin ngam sungah a om Anathoth khua pan thiampite khat ahi, Hilkiah ii tapa Jeremiah ii thu sonte a kitepteena ahi hi.

² Amon ii tapa Josiah sia Judah kumpi a sua zawk kum sawm le kum thum a cin kum in Topa in Jeremiah paupui hi,

³ Tuaciang Josiah ii tapa Jehoiakim kumpi a sua ciang Topa in Jeremiah paupui leleau hi. Tuasia zawkciang, Josiah ii tapa Zedekiah kumpi a sua zawk kum sawm le kum khat dong Topa in ama tamvei mama paupui hi. Tua kum a tha ngana ciang Jerusalem mite ngamdang ah sal tang uh hi.

Jeremiah A kisapna

⁴ Topa in kei tungah,

⁵ “Nuntakna kong piak ma in kong tealtuam zo a, na nu sung pan na sua ma in minamte tungah kamsaang khat tu in kong teal hi,” hong ci hi.

⁶ “Vaanglianpipa Topa awng, kei thusonzia tu he bong; moi lei lai ing,” ci in ka zo hi.

⁷ Ahihang Topa in kei tungah, “Kei ka moi leih hi ci heak in, kong paisakna mun, mite kungah pai in, son tu a kong thupiak theampo amate tungah son siat in.

⁸ Amate kiita heak in, banghang ziam cile keima in nangma hong dal tu in kong ompui tu hi, Topa, keima in kong son zo hi!” hong ci hi.

⁹ Tuaciang Topa in a khut hong thaakin, ka mukte hong tham a, tuaciang kei tungah, “Ngai in, na pau tu kammalte na kam sungah ka koi zo hi.

¹⁰ Minamte le kumpi ngamte a longhkeak tu le a kaikeak tu, a susia tu le a lawnthal tu, a sa tu le a suan tu in thu neina, tuni in nang kong pia hi” hong ci hi.

Mukholna nii te

¹¹ Topa in, “Jeremiah awng, bang na mu ziam?” ci in kei hong dongh hi. Keima in, “Almond thingbaak khat ka mu hi,” ci in ka zo hi.

¹² Topa in, “Maan ni hi, tuaciang keima kammalte a taangtung tu sia en nginge khi hi,” hong ci hi.

¹³ Tua zawkciang Topa in, “A dang bang na mu ziam?” ci in kei hong dongh leleau hi. Keima in, “Sak sangah tuibeal a so khat, hi sangah hong puk dektak khat ka mu hi,” ci in ka zo hi.

¹⁴ Topa in kei tungah, “Hi ngam sungah a teang mihingte theampo tungah saksang panin tuiso bangin siatna hong tung tu hi,

¹⁵ banghang ziam cile saksang ah a teang minamte theampo hong pai tu in ka sam hi. Amate ii kumpite in a kumpi tokhumte uh sia Jerusalem kongpite le, luphung kiimkot ah ahizong, Judah khuapi dangte ii kiimkot ah ahizong phut tu uh hi.

¹⁶ Keima in ka mite daan ka pia tu hi, banghang ziam cile amate in mawna khialna vawt zo uh hi; amate in kei hong nusia zo uh a, pathian dangte tungah biakpiakna pia in, milim vawtin bia uh hi.

¹⁷ Jeremiah awng, kithoai in; va pai ta'n a, amate na son tu a kong thupiak theampo va son ta'n. Tu in amate kiita heak in, na kiita ahile amate taw na omkhop ciang kong kiitasak vaial tu hi.

^18-19 Jeremiah awng, ngai in! Hi ngam sungah om mihing theampo — Judah kumpite, uliante, thiampite le mipite — in nang hong langpan tu uh hi. Ahihang tuni in amate na nalh zawk natu in thahatna kong pia tu hi; nangma in kulh taw a ki uum khuapi khat bang, thik khuam khat bang le taau luphung khat bang na hi tu hi. Amate in nang hong zo ngawl tu uh hi, banghang ziam cile nang hong dal tu in kong ompui tu hi. Topa keima in ka son zo hi,” hong ci hi.