Isaiah 62 - Syin Chin Bible

¹ Jerusalem hanthawn tu in ka son khe tu hi; Ama a kingup mateng le, Ama ii ngalzawna in zan a meisip khat det bangin a taan mateng ka thim om buatu hi.

² Jerusalem awng, minamte in na ngalzawna hong mu tu uh hi! A kumpite theampo in na vaangletna mu tu uh hi. Nang sia Topa ama vateak ii hong piak min thak khat taw hong kisam tu hi.

³ Nang sia Topa atu a hoi kumpilukhu khat taw na kibang tu hi.

⁴ Nang sia, “A kinusia” hong kici nawn ngawl tu a, Tuaciang, na ngam sia, “A kitaisan Zi” kici nawn ngawl tu hi. Na min thak sia, “Pathian sia Ama taw Lungdam hi,” kici tu hi. Na ngam sia, “Lungdam takin Kiteenpui” kici tu hi, Banghang ziam cile Topa sia nangma taw lungkimin Topa sia na ngam atu in a pasal bang hi tu hi.

⁵ Tangval khat in ngaknu thiangtho khat mo in a pui bangma Nang hong vawt Ama in nang hong teenpui tu hi. Zi nei tu pa in a zi tu sia dik a sak bangma in, Na Pathian in nangma zongh dik hong sa tu hi.

⁶ Jerusalem awng, na luphungte tungah ngalvilte ka koi zo hi; amate sia sun zong zan zong thimdide ngeingawl het tu hi. Topa ii kamciamnate amate in Topa phawksak nanak tu a, Tuaciang mangilsak ngeingawl tu hi.

⁷ Topa in Jerusalem khua a puuaphat kik mateng le, Leitung bup ii pok khuapi khat a suasak kik mateng, amate in Topa sia tawlngak hun pia ngawl het tu hi.

⁸ Topa in a ciliap huai kamciamna khat pia zo a, Ama vaangletna taw tua kamciamna taangtungsak tu hi: “Na antangte sia na ngalte an hi nawn ngawl tu a, Ngamdangmite in na sapittui ne nawn ngawl tu uh hi.

⁹ Ahihang no an a ciingte le an a late in An ne in, Topa na pok tu uh hi. No, sapitkung ciingin sapitnga a lote in Ka Biakinnpi huang sungah sapittui na ne tu uh hi,” ci hi.

¹⁰ Jerusalem mite awng, khuapi panin pusuak vun a Hong heak kik na mite atu in lam khat ziik vun! Lampi lian khat ziik vun; suangte heam vun! Mihingte heak thei tu in tepteena lim lakna khat khai vun.

¹¹ Topa in leitung theampo ah thu a thansakna panin: “Topa sia no hong ngum tu in hong pai a, Ama ii suatak sa mite hong tonpui hi, ci thu Jerusalem mite tungah son vun,” ci hi.

¹² No sia, “Pathian ii A thiangtho Mite” “Topa Ngup sa Mite” hong kici tu hi. Jerusalem sia, “Pathian ii It Khuapi,” “Pathian ii Nusiat Ngawl Khuapi” kici tu hi.