Isaiah 5 - Syin Chin Bible

Sapit huan La

¹ Hi la kong sak laitak hong ngai ta'n, ka lawmpa le ama sapithuan taw kisai la khat hi: Ka lawmpa in leipha mama mual khat ah sapithuan khat nei hi.

² Ama in leito in suang teng vawk a; sapitkung pha belte suan hi. Ama in tuate a cin natu in tausaang khat sa in, sapitngate a cil natu in leidum khat to hi. Ama in sapit a min tu ngak a, ahihang sapitnga theampo thuk siat hi.

³ Tuabang hi a, tu in ka lawmpa in, “Jerusalem le Judah ngam ah a teang no mite awng, kei le ka sapithuan kilaklaw ah thu hong khen tavun.

⁴ Hisia atu ka sep laak bang om ziam? Tuaciang ka muanmawk bang sapit phate piang ngawl a, banghang sapit thuk piang thong ziam?

⁵ “Hi bangin ka sapithuan tungah ka vawt tu hi; a kiim uumna dalte ka lakeak tu a, a dalna ngawlte thiaktanin, ngamsate in ka nesak tu a, ka tuanhcilsak tu hi.

⁶ Lopa in ka khunelsak tu hi. Sapit baakte ka heu buatu a, a lei zongh ka tho buatu hi; tuasia luangin, lingte ling kungte in ka khunelsak tu hi. Ngua a zuksak ngawl natu in meeite ngawngawn ka khaam tu hi,” ci hi.

⁷ Israel sia Vaanglianbelpa Topa ii sapithuan hi; Judah mite sia ama suan sa sapitkungte ahi hi. Topa in amate a pha vawt tu in muangmaw a, ahihang amate in tual that zaw uh hi. Ama in amate sia a maan bang seam tu in muangmaw a, ahihang amate ii a vawtsiatte in thumaanna dei in kap uh hi.

Mihingte ii Vawt Ngitlona

⁸ Note a lal na hi uh hi! Na neisa inn le lote belap natu in na lei thawthua uh hi. Hai ngawlin midangte teen natu mun om ngawl tu a, tua leitang tungah noma bekma na teang tu uh hi.

⁹ Vaanglianbelpa Topa in, “Hi a lian a pha inn theampo a hawm suakin lal tu hi.

¹⁰ Sapitkung hectare sawm ciinna leitang in sapittui litre liat bekma piangsak tu hi. Anci litre za le sawm liat in vaimim litre sawm le liat bek piangsak tu hi,” a ci ka za zo hi.

¹¹ Note a lal na hi uh hi. Zingsang zu ne tu in na thopal uh a, nitak ngei hial veu zu ne zu khamin na om uh hi.

¹² Na poai sung uh ah tengtongh, daalkual khuangnote, tamngaite, na tum uh a — tuaciang sapittui na ne uh hi. Ahihang Topa in bang seam cisia na tel bua uh hi,

¹³ tua ahikom thongtaakte bangin hong kipaipui tu hi. Na lampuite ngilkialin pukthi tu a, nautaang mite dangko in thi tu uh hi.

¹⁴ Mithi khua in amate ne tu in kamkat hi. Tua in Jerusalem mithupite sia a ngamlum nautaang mihonte taw valhtum khawm tu hi.

¹⁵ A kuama po kimaimawlsak tu a, a kiphasak theampo kiniamsuksak tu hi.

¹⁶ Ahihang Vaanglianbelpa Topa in ama ii letna sia thutang sepna taw lak a, ama thianthona sia a mite tungah a thu khenna taw pualaak hi.

¹⁷ A sia sa khuapite sungah tuute in lopa ne tu a, kealnote in a tatna tu mun mu tu hi.

¹⁸ Note a lal na hi uh hi! Na mawnate uh pan suatak natu in na kisaan zo bua uh hi.

¹⁹ Note in, “Topa in ka vawt tu hi a ci sia hi vabil in vawt tahen, tua hile ih mu thei tu hi. Israel ii a thiangtho Pathian in ama ngealnate vawt hen; a thinsung ah bang ngaisun ziam en tek tawng,” na ci uh hi.

²⁰ Note a lal na hi uh hi! Note in a siate pha hi, a phate sia hi na ci uh hi. Note in khuazing sia khuavak ah, khuavak sia khuazing ah na heak uh hi. Note in a kha sia a thum, a thum sia a kha na sua uh hi.

²¹ Note a lal na hi uh hi! Noma sia ciim kisa, pilvang mama kisa si nu hi.

²² Note a lal na hi uh hi! Sapittui ne in a hangsan te awng! Zu helin na neak tu uh hangsan in launa nei ngawlte awng!

²³ Ahihang sumnguk khat po taw a maw mite na suaktasak zeang uh a, a maw ngawlte ii thukhaikim thu khenna a nga natu na khaam uh hi.

²⁴ Tua ahiciang tu in, taangphaw le lopa ko ngimngeamte mei a kak bangma in, na zungte muatin na paakpalhte kongaw tu a, vui in lenkeak tu hi, banghang ziam cile, noma in Vaanglianbelpa Topa Israel te ii a thiangtho Pathian ii ei hong hilna thu na nial zo uh hi.

²⁵ Topa sia a mite tungah thin uukin amate daan pia tu in a khut vaan zo hi. Mualte liing tu a, mithi luangte ninteak bangin lampi tungah kinusia tu hi. Tuasia ngawngawn zong Topa thin uukna thai zo ngawl lai tu a, daan pia tu in a khut vaan lai tu hi.

²⁶ Topa in, a khualana ah a om minam khat sapna tu in limlakna khat pia hi. Amate leimong pan hong pai natu in Topa in phit tum in sam hi. Tuasia ciang amate hi sungah manlang takin hong pai paih hi!

²⁷ Amate kuama toi ngawl a; lutu in a liik om ngawl hi. Amate mutsuak in lusu ngeingawl, mu ngeingawl hi. Kawngkhau khat zongh kawm ngawl hi; peangdap khau khat zongh tat ngawl hi.

²⁸ Amate thaltangte hiam a, a thalte kaa tawm tu bekin eal pinpen uh hi. A siphu peangcinte thausuang bangin sak a, a muite suumpei bangin pei hi.

²⁹ Ngalkapte sia, tawpite in ngam sa khat man a, amate kung pan kuama ii a laaksak thei ngawl natu munah tua in, a hawk bangin au uh hi.

³⁰ Tua ni a thet ciang, amate in tuipi nging bangin nging takin Israel mite hawksan tu uh hi. Ngam hisia en vun! Khuazinna le ngim thuakna! Khuavak sia khuazing in valhtum hi.