Isaiah 49 - Syin Chin Bible

Israel sia Minamte atu Khuavak

¹ Ngam khuala ah a teang minamte awng, ka thuson hong ngai tavun! Ka pian ma in, Topa in kei hong teal zo a, a naseam tu in kei hong seekhol zo hi.

² Ama in ka kammalte namsau bangin hiamsak hi. Ama ii khut taw kei hong sungsia hi. Ama in thaltang bangin kei hong vawt a, zaktawm thei tu in hong hiamsak hi.

³ Ama in ka tungah, “Israel awng, ka naseampa na hi hi; nangma hangin, mihingte in kei hong pok tu hi,” hong ci hi.

⁴ Keima in, “Ka seam zo hi, ahihang lamet tu mama om ngawl hi! Ka thatang theampo zangh siat zo hi veang i, ahihang bangma ka taangtun bua hi,” ka ci hi. Tua hikale ka vai hong panpui tu in Topa ka muang thei veve hi; ama in ka sepna thaman hong pia tu hi.

⁵ Ka pian ma in Topa in nasep tu hong see hi; ama in keima sia a mite kaikhawm kik tu le, a kithethaang Israel mite kaikhawm kik tu in a naseampa hong suaksak hi. Topa in vaang hong pia hi; ama in ka thahatna bulpi ahi hi.

⁶ Topa in kei tungah, “Ka naseampa awng, nangma sep tu in nasep lian zaw khat ka nei hi, a suakta lai Israel mite a lian in lapto kik tu bek hi ngawlin, minamte tungah khuavak ahi tu zonghin nang kong vawt tu hi — tuabangin leitung theampo in ngupna a nga thei natu ahi hi,” hong ci hi.

⁷ A kithusim ngawlhet pa, minamte ii etsat pa le ngamukte ii naseampa tungah Israel te ii a thiangtho Pathian le ngumpa in hi bangin ci hi: “Kumpite in na suatak hong mu tu a, nang tungah zatakna lak tu in hong din tu uh hi; kumpi tate zonghin hong mu tu uh a, nangma mai ah zatakna taw hong kun tu uh hi,” ci hi. hi thu piang nanak tu hi, banghang ziam cile Topa in a naseampa teal zo hi; Israel te ii a thiangtho Pathian in a kamciamnate keamcing hi.

Jerusalem a kipua kikna

⁸ Topa in a mite tungah, “Note ngup tu hun hong thet ciang, maipha kong pia tu a, hu ngenin nong auna awte kong zo tu hi. Note kong cing kong keam tu a, note tungtawnin mite theampo taw thuciamna khat ka vawt tu hi. Tu laitakin a tulsa ngam sungah, note khatvei kong teangsak kik tu hi.

⁹ Keima in thongtaak mite tungah, ‘Suakta takin pai vun!’ ka ci tu a, khuazing sungah a omte tungah, ‘Khuavakna ah pusuak vun!’ ka ci tu hi. Amate sia mual tungah a taa tuute taw kibang tu uh hi;

¹⁰ amate ngilkial, dangtaak ngeingawl tu hi. Nisa le senneal sa in amate bangma tatsak ngawl tu hi, banghang ziam cile amate a itpa in lampui tu hi. Ama in amate sia ciktui ah paipui tu hi.

¹¹ “Keima in mualte kaantan in lampi lian khat ka vawt tu a, ka mite khualhaw natu in lam khat ka pua khol tu hi.

¹² Ka mite sia ngam khualana, saksang le nitumna sang pan le thang sangah a om Aswan khuapi panin hong pai tu uh hi,” ci hi.

¹³ Vantungte awng, lasa vun! Leitung awng, lungdam in au vun! Mualte lasa in au hen! Topa in a mite heeneam tu hi; ngimna a thuak a mite hesuak tu hi.

¹⁴ Ahihang Jerusalem mite in, “Topa in eite hong nusia zo hi! Ama in eite hong mangil zo hi,” ci uh hi.

¹⁵ Tuasia ciang Topa in, “Numei khat in ama ii nausen mangil in ama ii hin le toai tasen it ngawlin om thei tu ziam? A nu in a tasen a mangil zezen tha hial zongin, keima in note kong mangil ngei buatu hi.

¹⁶ Jerusalem awng, nang kong mangil thei ngei bua hi! Ka khutza lamlai ah na min ka at zo hi.

¹⁷ “Nang hong puua kik tu mite hong theng nai zo a, nang hong siatsuate tai tu uh hi.

¹⁸ Na kiim na paam khuadak kawkoai in bang thupiang ziam en in! Na mite kikhawm uh a — inn ah hong cia uh hi! Keima in a nungta Pathian ka hi tatak bangma in, mothak khat in a kizepna suangmanpha a kiphatsak pui bangma in na mite hangin na kiphasak tu hi.

¹⁹ “Na ngam sia lalcipin kinusia a — ahihang tu in tualai ah a teang tu hong pai mite atu in toi lei tu hi. A siacipin nang hong nusia mite in nang taw a kikhuala na ah kikhiin tu uh hi.

²⁰ Ngamdang saltanna ah a piang na mite in ni khat ni ciang, na tungah, ‘Hi leitang toi lei hiat a — ih teen natu a zaizaw kisamh hing!’ hong ci tu uh hi.

²¹ Tuaciang nangma le nangma, ‘Tano hite theampo kei atu in akua in piangsak ziam? Keima in ka tate bosua zo a ka nei thua zo nawn bua hi, keima saltaangin hong kinotkeak a — hi patangte akua in vaak thong ziam? Keima nguak hong kinusia a — hi patangte koisung pan hong pai hi thong ziam?’ nang le nang na kici tu hi,” ci in zo hi.

²² Vaanglianpipa Topa in a mite tungah: “Keima in minamte tungah lim ka lak tu a, amate in na tate inn ah hong puak tu uh hi.

²³ Kumpite sia no tungah pate bang hong hi tu hi; kumpinu te sia nute bang hong hi tu hi. Amate in na mai uh ah kun sukin hong upat tu uh hi; amate kiniamkhiakin note zatakna hong lak tu uh hi. Tuasia ciang Topa ka hina thu na he tu uh hi; keima ii hu tu a ngak peuma thin kiam ngawl tu uh hi,” ci hi.

²⁴ Ngalkap khat ii sutol sa vanhte na la kik thei tu ziam? Zawthawk thu taw ngamuk pa khat ii matsa koltaangte na suatak thei tu ziam?

²⁵ Topa in, “Hong piang tu thute sia tuabang keak ahi hi. Ngalkapte ii matsa thongtaakte kilaaksak tu a, zawthawk thu taw ngamuk pa ii sutol sate kimatsak tu hi. Nang hong do peuma ka sim tu a, na tate ka suatak tu hi.

²⁶ Nang hong zawthawk vawtte khat le khat ka kithatlumsak tu hi; amate mihing thalup nopna le thin uukna taw a thin uh so ngawp tu hi. Tuaciang mihing nam buppi in keima sia, nang hong ngumpa le hong suatak pa, Topa ka hina thu he tu uh hi. Amate in keima sia Israel te ii a vaanglian Pathian ka hina thu he tu uh hi,” ci in zo kik hi.