Isaiah 48 - Syin Chin Bible

Pathian sia Maisang hun ii Topa

¹ Hi thu ngai vun, Judah suan Israel mite awng: Note in Topa min taw kiciam in Israel te ii Pathian ka bia tu uh hi ci nu hi — ahizong na kam bek uh hi a, na ci takpi ahi bua hi.

² Tuaciang a thiangtho khuapi ah a teang mite ka hi uh a, Israel te ii Pathian ahi Vaanglianbelpa Topa a suangte ka hi uh hi ci in, na kiphasak lalai uh hi.

³ Topa in Israel tungah, “Taanghlai pekin bang thu hong piang tu cisia ka sonkhol hi; tua zawkciang thakhat thu in ka piangsak hi.

⁴ Na thinpui uh sia thik le taau bangin sak mama tu ci sia ka he hi.

⁵ Na milim uhte in hite piangsak hi na ci thei ngawl natu uh in, keima in taanghlai pek pan noma ii maisang thupiang tu te a pian ma in ka sonkhol hi.

⁶ “Ka sonkhol sate theampo tu in taangtung zo hi; ka sonkhol thute maan hi ci in na laak tu uh bek ahi hi. Nidang in kong pualaak ngeingawl lai hong pai tu thuthakte, tu in kong son tu hi.

⁷ Tu hun ciang bekin ka piansak hi a; nidangin hi bang piang ngeingawl hi. A piangsa hi thong le a vekpi in ka heaksa thu hi na ci tu uh hi.

⁸ Note sia a tawntung ngual langpan ci in hong kihe ahikom note sia muan thei tu hi ngawl ci in kong he hi. Tua hu in hi thu na za ngei vet bua uh a, na nakheng sung uh ah hi kammal tum ngeingawl hi.

⁹ “Mihingte in ka min hong pok natu in ka thin uukna ka vei kenkon hi; kong suksiat ngawl natu in ka iip kik hi.

¹⁰ Meikhuk sungah ngunnte a kisit bangma in note sia meisa thuakna sungah kong sit zo hi. Ahihang note sia bangma man nei ngawlin kong mu zo hi.

¹¹ Hi bang ka vawt sia keima atu hi a — ka min hong kipaansak tu ka oai buatu hi, ahibuale minthanna sia kuama dang kihawm ngawlin keima atu bek hi tu hi,” ci hi.

Topa ii Teal Lampuipa, Cyrus

¹² Topa in, “Hong ngai tavun, kong sapsa Israel mite awng! Keima in a masabel le a khakbel Pathian, keima bek Pathian ka hi hi!

¹³ Leitung tawdapte sia ka khut taw ka vawt a, vantungte ka phalhkeak hi. Lei le van ka sap ciang, thakhat thu in hong pai in ka mai ah ding uh hi.

¹⁴ “Note theampo kikhawm in ngai vun! Keima ii tealsa mipa in Babylon sim tu hi ci sia tua pathiante khat zongh in sonkhol thei ngawl uh hi; ama in keima dei bangin seam tu hi.

¹⁵ Keima in thu a son pa le ama a sam pa ka hi hi; Keima in ama lam ka pui a, ngalzawna ka pia hi.

¹⁶ “Tu in hong pai in ka kung hong neak tavun a, ka ci bang hong za tavun. A kipatciil a kipan a langh taakin thu ka son a, ka kammalte a tawntungin ka taangtungsak zo hi,” ci hi. (Tu in Vaanglianpipa Topa in a vaangletna kei hong pia zo a, kei hong sawl zo hi.)

A Mite atu Topa ii Ngealna

¹⁷ Israel te ii a thiangtho Pathian, note hong ngum Topa in: “Keima in note Topa Pathian ka hi a, note phattuam natu hong hil nuam pa le na zui tu a kilawm lampi hong lak pa ka hi hi.

¹⁸ “Kong thupiaknate ngai hi thong le uh te! a kang ngeingawl luamtui bangin thuphate note atu in luang tu hi. Tuipi vaal ah tuihualte bangin zawna na tung hong theng tu hi.

¹⁹ Na suan na paalte senneal za in tam tu a, keima in amate a kisusia ngeingawl tu in ka vawt tu hi,” ci hi.

²⁰ Babylon pan pusuak in, suakta takin pai vun! lungdamna taw hi thuphate au in son vun; “Topa in a naseampa Israel ngum zo hi!” ci in mun theampo ah thangsak vun.

²¹ Topa in a mite sia a sa, a ko sennealngam sungah lampui in a pai lai in, a dangko ngawl uh hi. Amate atu in ama in suang sung pan tui phuulsak hi; ama in suang phaltham in, tui hong luang hi.

²² “Mawneite atu in a bitna mun om ngawl hi,” Topa in ci hi.