Isaiah 46 - Syin Chin Bible

¹ Hisia in Babylon ii pathiante bona thu ahi hi! Bel le Nebo sia khatvei lai in kibia ngei a, ahihang tu in amate sia laate tungah kisuanhin, a toi nganhingte ii vanhngit khat suak hi.

² Milimte in amate le amate kingum thei ngawl hi; tuate kimatsak in kipaipui hi. Hi thu sia Babylon ii pathiante bona thu ahi hi!

³ “Ka mite sung pan a taanglai Jacob suan le paalte theampo awng, hong ngai tavun. Na sua uh pan kipan kong ou kong pau hi.

⁴ Keima in note Pathian ka hi a, na huai na teak na puakkaan dong kong ou kong keam tu hi. Keima in note kong vawt a kong khoi tu hi; note kong hu tu a, kong suatak tu hi.

⁵ “Akua taw hong tee ngat tu nu ziam?” Topa in ci hi. “Kei taw a kibang akua dang om ziam?

⁶ Mihingte in a dangka ipte hongin khamhte suakeak hi; khaikhin taw ngunnte tee uh hi. Amate in pathian khat vawt tu in khamh seak khat cial hi; tuaciang amate kunin tuasia bia uh hi!

⁷ Amate in a liangko tungah suanhto in pua uh hi; Ama ii a om natu munah koi in, tualai ah om a, tua mun pan koima dangah kin thei ngawl hi. Khat pawpo in ama tungah thungen le ama in zo thei ngawlin, ahibuale tuasiatna panin ngum thei ngawl hi.

⁸ “Hi thu ciamtee vun, no mimaw mikhialte awng; ka sep sate ngaisun vun.

⁹ Nidang lai a, a piang thute phawk vun; keima bekma Pathian hi a, kei taw a kibang kuama dang om ngawl a hina thu phawk tavun.

¹⁰ A kipatciil panin a piang tu thu ka sonkhol zo hi; bang hong piang tu cisia taanghlai pek panin ka sonkhol zo hi. Ka ngealnate taangtung ngawlin om ngeingawl tu a, vawt tu ka sawm theampo ka vawt tu hi, ka ci hi.

¹¹ Nisuana sang panin mihing khat hong pai tu in ka sam hi; Ama in muthi bangin suktun in hong tuak suk a, ka ngeal sate taangtungsak tu hi. Keima ii ka sonsa bangma in, kiseam tu hi.

¹² “Ngal zaw natu khuala mama lai hi ci in a ngaisun no mihing thinpuite awng, kei hong ngai tavun.

¹³ Zaw natu ni, kong thengsak pal tu a — khuala nawn ngawl het tu hi. Zawna ka mualsuana kihaisaangsak ngawl tu hi. Jerusalem ka ngum tu a Israel te tua munah minphatna ka pia tu hi,” ci hi.