Isaiah 35 - Syin Chin Bible

Thianthona Lampi

¹ Sennealngam lungdam tu a, ngam tawnghtol sungah paakte palh tu hi.

² Sennealngam in lasa in, lungdam in au tu hi; Tuasia in Lebanon mualte bangin et hoi a, Carmel le Sharon lote bangin lei pha tu hi. Mihing theampo in Topa ii a nasiatna, a letna le a vaangletnate mu tu uh hi.

³ A toi khutte le tha zawmin a liing vadil khupte a tha khosak tu hi.

⁴ “Hat vun a lau heak vun! Pathian sia note hong suatak tu le na ngalte uh daan pia tu in hong pai tu hi,” ci in a thinkiamte theampo son vun.

⁵ Mittawte in khuamu thei tu uh a, nangongte in khuaza tu uh hi.

⁶ Peangbaite leangin laam tu uh a, a pau thei ngawlte lungdam in au tu uh hi. Sennealngam sungah luituite luang tu hi;

⁷ a kaangh sen sate sia tuili khat suak tu a, lei kona sia ciktui taw kidimh tu hi. Ngiate teen ngeina munah buannawng sung a po lopa le pumpa kungte po tu hi.

⁸ Tua munah, “Thianthona ii lampi” a kici lampi lian khat om tu hi. Mawneite kuama in tua lampi tawn nawn ngawl tu hi; tua lampi a tawnte sia a mawmawte zongh lam pial ngawl tu hi.

⁹ Tua munah tawpite om ngawl tu a, a kiitakhuai nganhingte in tua lampi kaantan ngawl tu hi. Topa ii suatak sa mihingte in tua lampi tawnin a inn uh ah cia tu uh hi.

¹⁰ Amate in thinnopna taw lasa in, au in lungdamna taw Jerusalem khua theng tu uh hi. Amate heena le khuangaina taw kipeal tawntungin, lungdam top tu uh hi.