Isaiah 34 - Syin Chin Bible

Pathian in A ngalte Daan pia tu

¹ Minam theampo te awng, hong pai tavun! Hong kikhawm tavun a hong ngai tavun. Leitung buppi le leitung ah a teang mihingte theampo hi lai ah hong pai in thu ngai hen.

² Topa sia minam theampo le a ngalkap honte theampo tungah thin uuk hi. Topa in tuate a lalcip tu in ningkhiin zo hi.

³ Amate ii luangte kiphum ngawlin, tualai ah a muat a ui in om tu hi; tuaciang mualte chi taw san tu hi.

⁴ Ni, tha le aksite leivui suak tu hi. Van sia laizial bangin kizialin mang vadi in, aksite sia sapitkung, theikung tung pan a teete a pul bangin taak tu hi.

⁵ Topa in vantung ah a namsau kinging khol zo a, tu in suksiat tu a see sa Edom mite saat tu hi.

⁶ Topa namsau sia amate ii a chi le a thau taw kituam tu a, biakpiakna in a kinei tuu le kealte ii chi le thaute taw kibang tu hi. Topa in hi biakpiakna sia Bozrah khuapi ah pia tu hi; ama in hisia Edom ngam sungah kithalupna lian mama khat suaksak tu hi.

⁷ Mihingte sia ngamsung khuital le khuital note bangin pukvawk in, leitang sia chisan taw sanin nganthau taw kituam tu hi.

⁸ Tu hun sia Topa in Zion a suatak tu le a ngalte a thuk kik tu hun ahi hi.

⁹ Edom ngunte sia kattazasi suak tu a, leitang sia kaan suak tu hi. Ngam buppi sia kattazasi hal bangin kuang tu hi.

¹⁰ Sun taw zan taw kuang topin, a khu suak tawntung tu hi. Tua ngam sia khang khat pan khang khat ngam tul suakin, kuama in khualhawin kaantan kik ngeingawl tu hi.

¹¹ Simbu le va-akte in tua ngam lua tu uh hi. Lei a piansak ma bang keakin tua mun sia Topa in ngamkol suaksak tu hi.

¹² Ngam uk tu kumpi om ngawl tu a, lampuite theampo bo siat tu uh hi.

¹³ Kumpi innte theampo sung le luphung taw ki uum khuapite sungah lingte le a mulnei lingkungte po in, ngia le simbute tua ii sungah teang tu uh hi.

¹⁴ Ngamsate tualai ah taa tu a, doaite khat le khat kisam tu uh hi. Zantaa doai in a tawlngak natu mun zongin tua munah pai tu hi.

¹⁵ Simbute in a bu uh tomin, tuui in, a no keu a tua munah khoi in keam tu uh hi. Vaciikte khat zawkciang khat tua munah kikhawm tua tu uh hi.

¹⁶ Topa ii laibu sungah a nungta ngamsate ii thu zong vun a, bang ci ziam sim vun. Hi ngamsate khat zongh bo ngawl tu a, a kopin om siat tu hi. Tuabang ahi natu in Topa in thupia zo hi; ama mama in ngamsate kaikhawm tu hi.

¹⁷ Tuate leitang a hawmsak tu le tel khat tek a pia tu sia in Topa ahi hi. Amate in tua leitang tungah khang sim khang simin teang tu uh a, a tawntungin tang suak tu uh hi.