Isaiah 28 - Syin Chin Bible

Saksang Kumpi ngam ii Kidop natu Thu khat

¹ Israel kumpi ngam sia a lal ahi hi! Ama ii minthanna sia zukham a lampuite ii lu tungah a khuk paak taw a kivawt kumpi lukhute taw kibangin mang vadi tu hi. Paaknamtui pha tak kinoai napi in a kiphasak amate ii lutangte sia, zu a kham hu in khuaphawk ngawlin tua munah lumcip uh hi.

² Topa in amate sim tu in a kinging a vaanglian, a thahat khat nei a, tua pa sia hui le ngial bang, ngua a biing a bealin sun bang, tuipawm hawktai bang, tuiliim bangin hong pai in tua ngam zothal tu hi.

³ Tua zukham lampuite kiphatsakna sia peang nuai ah kituanhcil tu hi.

⁴ Tua a kiphasak lampuite ii a kiamsuk minthanna sia theipal min hun ciang a min masa pawpo kilo in, a kine khawng papai bangin mang vangeu tu hi.

⁵ Vaanglianbelpa Topa sia a nungta lai ama mihingte atu in, paak taw a kivawt, a minthang kumpilukhu bang ahi tu ni khat hong theng tu hi.

⁶ Ama in thukhenmangte tungah thutang khennate heak theina thin pia tu a, khuapi kongpi cingte sia ngalte hong sim ciang thinhanna pia tu hi.

Isaiah le Judah te ii Zukham Kamsaangte

⁷ Kamsaangte le thiampite ngawngawn zu kham in hoi vatut uh hi. Sapittui le zuhang tam ne lei ahikom amate lungmangin lutu uh hi. Kamsaangte zukham lei ahikom Pathian ii a musak khol thute tel zo ngawl uh a, thiampite zongh zukham lei ahikom amate kungah a kipuak thute khensat thei ngawl uh hi.

⁸ A tona sabuai theampo luak taw kidim in, a thiangtho mun khat zongh om ngawl hi.

⁹ Amate in kei hong phunsan uh hi. Amate in, “Tua pa in akua ka hihil ci in kingaisun ziam? Akua in ama ii thupuak dei ziam? Ama ii thupuak sia a nu noai a ten tuung naunote atu bekin pha hi!

¹⁰ Laimal khat zawkciang mal khat, lailam khat zawkciang lam khat, thu khat zawkciang thu khat ama in ei hong hil tiuteu tu hanciam hi,” ci uh hi.

¹¹ Kei thuson nong ngai bua uh ahile, no tungah thu hong hil tu in kam tumdang a pau ngamdangmite Pathian in zangh tu hi.

¹² Topa in note theampo tungah tawlngakna le noptuamna hong pia napi ama thu na ngai nuam bua uh hi.

¹³ Tua hu in laimal khat zawk mal khat, lailam khat zawk lam khat, thu khat zawk thu khat, Topa in no hong hil tu ahi hi. Tua zawkciang kal khat na suan simin na lutu tu uh hi. Note hong kiliamsak tu a, thaang sungah hong ki awksakin, thong hong kitaaksak tu hi.

Zion atu Innking Suang

¹⁴ Hisung Jerusalem khua panin hi mihingte a uk, no a kisathei mite awng, tu in Topa thu ngai vun.

¹⁵ Note in, thina taw thuciamna khat ka vawt zo uh a, mithi khua taw thukimna khat ka nei zo uh hi, ci in na kisuangtaak uh hi. Siatna hong pai ciang, hong pial tu hi ci in na kimuang uh hi, banghang ziam cile no hong huu tu in theamna le leilot thute na suang uh hi.

¹⁶ Tu in Vaanglianpipa Topa in, “Keima in Zion ah a kip a kho inn tawdap khat ka koi hi. Tua ii sungah innking suang sak khat ka phut a, tua tungah hi bang kammalte ki at hi, ‘A kho upna sia a thin zongh sau hi.’

¹⁷ Thutang khenna sia inn tawdap atu in a teena khau hi a, thumaanna sia a thikbawk khaukhai hi tu hi,” ci hi. Ngialtang le vuipi in na belh na suan leilot thute theampo seamkeak tu a, tuikhangte in na ngam muanna bosak tu hi.

¹⁸ Thina taw na kiciam na kiphiat tu a, mithi khua taw na thukimna kiphiat tu hi. Siatna ii hong nawk ciang, note hong zothal tu hi.

¹⁹ Tuasia in note sia zing khat zawk zing khat hong suu kikik tu hi. Sun zong zan zong na thuak uh kul tu hi. Topa kung pan hong pai thuthak khat sim in, patauna thak veu hong puak tu hi!

²⁰ A kikhuathuang tham ngawl lupna tom mama khat tungah lum a, a kicing zo ngawl puanvan no mama khat silhin, mut tu a hanciam, paunak sungah mihing khat pa taw na kibang tu hi.

²¹ Topa in ama ngamtatna te a lamdang bang ahi hial zong — ama ii vawt tu a ngaisut sia vawt tu in Perazim Mualtung le Gibeon kuam ah ngal a sim bangin sim tu hi. Ama in ama ii a tel hak a nasepna khuang khim tu hi.

²² Keima ii kidop natu kong thupiak sia nuisan heak vun! Na nuisan uh le, na suatak natu uh haksa vaial zaw tu hi. Ngam buppi lalcipsak natu in Vaanglianbelpa Topa ii thukhensat nate ka za zo hi.

Pathian ii Ciimna

²³ Kong paunate ngai vun; kong sonte nadon vun.

²⁴ Lotho pa khat in an ciin natu a kingin ciang in tawlnga ngawl liangin lo laaih thapaai ngawl hi.

²⁵ Khatvei lei laaihin a puua zawkciang ama in taang cite le an namtuisak ankung cite poai hi. Ama in zungtaang le mangtaang te a ngual in tu a, a lo hui sangah ancii dangte tu hi.

²⁶ Ama in a nasep tu zia he hi, banghang ziam cile Pathian in ama hil zo hi.

²⁷ Ama in simit ciite le an namtuisak ankung ciite saat natu in khetbuk ngit khat zangh ngeingawl hi; tua taangin ama in a zaang a pha bek ciangte zangh hi.

²⁸ Ama in zungtaangte a lal tu liang dongin, a cil tan viuveu hi ngawl hi, banghang ziam cile antangte a zaantham ngawl tu in leang taw cilna zia ama in he hi.

²⁹ Hi bang ciimna heakna theampo sia Vaanglianbelpa Topa kung pan hong pai ahi hi. Pathian ii ngealnate sia ciimna taw a ngeal hi a, tuate a tawntungin taangtung hi.