Isaiah 21 - Syin Chin Bible

Babylon Bo natu Mukholna

¹ Hisia sia Babylon taw kisai thupuak ahi hi. A lauhuai ngam khat panin suumpei khat bangin sennealngam kaantan in, tuasiatna hong pai tu hi.

² A ngitlo huai thupiangte mukholna khat ka mu a, kilee heakna le lalcipna ahi hi. Elam ngalkapte awng, sim vun! Media ngalkapte awng, khuapite kiim uum vun! Babylon ii a piansak ngimna a thuakna sia Pathian in bosak tu hi.

³ Mukholna sungah ka zaak le ka mute in hong lausakin, numei khat nau a tut ciangin na a sak bangin na ka sa hi.

⁴ Ka lu hong vai in, lau in ka liing hi. Nitak hong thet tu ka thangai a, ahihang hong thet takpi ciang liinna le launa bekma hong puak hi.

⁵ Ka mukholna ah anneakpoai khat kingingin ka mu hi; leangnate to natu in puan saate kipha hi. Amate an ne tui dawnin a om laitak thakhat thu in thupiakna khat nging hi; “Uliante awng! Na lumte pua khol vun!” ci hi.

⁶ Tua zawkciang Topa in kei tungah, “Pai in a ngal encik khat koi in, a mu bangin thu hong puak tu in sawl in.

⁷ Mihing nii veu, nii veu siphu tungto in hong pai ahizong, mihingte laa tung le kalaoh tung to in hong pai ahizong ama in a mu le, pha takin tuate a etcik tu ahi hi,” hong ci hi.

⁸ Ngal encik pa au in, “Topa awng, a sun a zanin ngalvilin ka ding tan hi,” ci hi.

⁹ Thakhat thu in amate hong theng hi! Mihing nii veu nii veu siphu tung to hi. Ngal encik pa in, thu puak in, “Babylon bo zo hi! Amate ii biak milim theampo lei ah tamhtham dipdeapin om hi,” ci hi.

¹⁰ Israel ka mite awng, mangtaang bangin no hong kicil zo hi, ahihang tu in Israel te ii Pathian ahi, Vaanglianbelpa Topa tung pan ka zaak, a zaaknophuai thuphate kong son zo hi.

Edom taw kisai Thupuak

¹¹ Hisia in Edom taw kisai thupuak ahi hi. Edom pan khat in kei hong samin, “Phualcing pa awng, zan hun a bo nai tu ziam? A bo pal tu ziam hong son ta'n,” hong ci hi.

¹² Ka zo kikna pan, “Zingsang hong thetheng hi, ahizong zan hun hong theng kik leleau tu hi. Nong dongh kik nuam le hong heak kikin hong dongh ta'n,” ka ci hi.

Arabia taw kisai Thupuak

¹³ Hisia in Arabia taw kisai thupuak ahi hi. Dedan mi, Arabia ngamkol sungah kalaoh hon taw ngiaphual saatin a om note awng,

¹⁴ note kungah hong pai tuidu dangtaak mihingte tui pia vun. Tema ngammi note awng, ngaltaite an pia vun.

¹⁵ Namsau taw kithalupna pan, thal taw kikaplupna pan le ngal launa theampo pan a suakta tu in mihingte tai uh hi.

¹⁶ Tua zawkciang Topa in kei tungah, “Kum khat sung lianin Kedar minamte ii a letna bo tu hi.

¹⁷ Kedar mite sung pan thal toaite sia ngalhang belte hi a, ahihang amate sung pan tawm bek taang lai tu hi. Keima, Israel te ii Topa Pathian in ka son zo hi,” hong ci hi.