Hosea 13 - Syin Chin Bible

Israel tung A khakbel Thukhenna

¹ Hun bosa sungah Ephraim namte a pau ciang, Israel nam dangte lau a; amate in Ephraim thupi et hi. Ahihang tua mite Baal bia in mawna vawt ahi uh ciang hi sia hu in amate thi tu uh hi.

² Mihing ngaisutna le mihing khut taw a suai ngunn milimte — thik milimte a biak tu in a vawtna taw amate maw thua seseam uh hi. Tuasia zawk ciang amate in, “Tuate tungah sangaw biakpiakna pia vun!” ci hi. Bangbangin akua in tua milimte — khuital lim a, a kivawtte — namh thei tu ziam!

³ Tua ahiciang hi mite in zingsang mokkaaite bangin mang tu a, nisua tuung a bo daaituite taw kibang hi. Amate sia taangcilna phual pan, vui ii seamkeak a site bang, meikhu suana pan meikhu bang hi tu hi.

⁴ Topa in, “Keima in Topa noma ii Pathian, Egypt pan hong pui pa khi hi. Kei simngawl Pathian dang nei ngawl nu hi. Keima bekma na ngumpa ka hi hi.

⁵ Senneal lei kona ah note kong keam hi.

⁶ Ahihang tua ngam phana ah na tum uh ciang ankham in na lung uh kim a, tuasia ciang, kiphasakin, kei nong mangil uh hi.

⁷ Tua ahiciang tawpi khat bangin no kong sim tu hi. Na lampi tungah pawlbeam khat bangin kong pang tu hi.

⁸ A note a bosua vompui khat bangin note kong sim tu a, kong baltham tu hi. Tawpi khat bangin thakhatin kong ne tum paih tu a, ngamsa khat bangin kong balneen tu hi.

⁹ “Israel mite awng, hong susia tu khi hi! Tuasia ciang akua in no hong hu thei tu ziam?

¹⁰ Note in kumpi khat le lampuite ngen nu hi, ahihang amate in na ngam uh bangbang hu thei tu ziam?

¹¹ Ka thin uukna taw kumpite kong pia zo a, ka thinso in thangsiatna taw amate ka la keak zo hi.

¹² “Israel ii mawna le khialna te kiciamtee a, a kitepteenate bit takin kikeam hi.

¹³ Israel in nuntak natu hunpha nei napi a mawmawt lei hu in tua nuntakna la thei ngawl hi — a suak dektak nausen khat naubu sung pan a pusuak nuam ngawl taw kibang hi.

¹⁴ Hi mite sia mithi khua pan ka ngum buatu a, ahibuale thina vaang pan ka suatak buatu hi. Thina awng, na pul natnate hong paipui ta'n! Mithi khua awng, na suksiat theina hong paipui ta'n! Hi mite ka hesuak nawn buatu hi.

¹⁵ Israel in lopa bangin pung hikale, sennealngam pan nisuana vuisa khat ka vasak tu a, a tuinaakte le a tuikhukte ka kangsak tu hi. Tua vuisa in a mannei na theampo lenmang tu hi.

¹⁶ Kei hong langpan hu in Samaria sia daan kipia nanak tu hi. A mite ngal sungah thi tu uh hi; nausente sia lei denna in kinei tu a, naupaai nupite ngil kikui tham tu hi,” ci hi.