Hosea 1 - Syin Chin Bible

¹ Hisia in Kumpi Uzziah, Jotham, Ahaz le Hezekiah te Judah ngam ah kumpi in a maan hun le Jehoash tapa Jeroboam Israel kumpi in a maan hun a, Beeri tapa Hosea tungah Topa ii piak thupuak ahi hi.

Hosea ii Zi le Tate

² Topa in Hosea tungtawn a, Israel a paupui phitbel hunin Hosea tungah, “Pai in a, zi nei in; na zi in na vaang hong tang ngawl tu a, na tate ama bang lian ma hi tu hi. Tuasia bangma ka mite in kei hong nusia in, a thumaan ngawl te suak uh hi,” ci hi.

³ Tuabangin Hosea in Diblaim tanu Gomer kici numei khat teenpui hi. A ta phit tapa sia a sua zawkciang,

⁴ Topa in Hosea tungah, “A min ‘Jezreel’ phuakin, banghang ziam cile Israel kumpipa sia a taanghpupi Jehu ii Jezreel ah mihing a thalupte hu in hai ngawlin daan ka pia tu hi. Jehu ii kumpi khangngui ka bosak tu hi.

⁵ Tua hun ciang Jezreel Kuam ah Israel ngalkap thahatna ka susia tu hi,” ci hi.

⁶ Gomer in a ta niina — numei khat nei hi. Topa in Hosea munah, “A min ‘a ki it ngawl’ (Lo-Ruhamah) ci in phuak in, banghang ziam cile Israel mite tungah ka itna ka lak nawn buatu a, ahibuale mawna ka maisak nawn buatu hi.

⁷ Ahihang Judah mite tungah ka itna ka lak tu hi, keima, amate ii Pathian, Topa in amate ka hun tu hi, ahihang ngal kisimna — namsau, thal le thaltang, ahibuale siphu le siphu ngalkapte ka zangh buatu hi,” ci hi.

⁸ Gomer in a tanuno noai a tensak zawkciang ama nau paai kik a, tapa dang khat nei hi.

⁹ Topa in Hosea mun ah, “A min ‘Ka mi hi ngawl’ (Lo-Ammi ) ci in phuak in, banghang ziam cile Israel mite sia ka mi hi ngawl a, tuaciang kei sia amate ii Pathian ka hi bua hi,” ci hi.

Israel Kipuuapha kik tu

¹⁰ Israel mite a kisim zo ngawl, a kitee zo ngawl tuipi sen za bang suak tu hi. Tu in Pathian in amate mun ah, “Note ka mite hi ngawl nu hi,” ci hi, ahihang, “Note sia a nungta Pathian ii tate hi nu hi!” a ci ni hong theng tu hi.

¹¹ Judah mite le Israel mite kingawm kik tu hi. Amate mama in amate atu lampui khat teal tu a, khatvei ma a ngam a lei ah khangto in nuamsa kik tu uh hi. Hi hi, Jezreel ii ni sia ni thupi ni khat hi tu hi!