Hebrew te 5 - Syin Chin Bible

¹ Thiampi lianbel peuma a mipuite sung panin kiteal a, mawmai natu sangaw biakpiakna le piakkhiatna vawt tu in, amate taangin Pathian naseam tu a kitavaw te ahi hi.

² Ama mama in thaneamna tuatuam nei ahikom, thu tel ngawlte le khialna vawtte tungah ama in, cingh thei hi.

³ Ama mama thaneam ahikom, a mihingte mawna atu bek hi ngawlin ama mawnate atu zongh sangaw biakpiakna a sep kul hi.

⁴ Thiampi lianbelpa za sia ama le ama kiteal a, a kipia kuama om ngeingawl hi. Aaron tungah a kipiak bangin — mihing khat sia Pathian ii samna bek taw thiampi lianbel kisuaksak hi.

⁵ Tuasia bangma in Christ in ama le ama thiampi lianbel za a kipia bua hi. Pathian in ama munah, hi bangin ci zaw hi, “Nang sia ka Tapa na hi hi; tuni in Kei sia nangma ii Pa ka suak hi.”

⁶ Mundang khat ah a sonna panin, “Nangma sia thiampi na hi tawntung tu hi. Melchizedek taw a kinguizui thiampi na hi tu hi,” ci hi.

⁷ Leitung ah a nuntak lai in Jesus in thina pan a ngum thei, Pathian tungah a nging auna le thitui luanna taw thungetna le dei ngetnate nei hi. Ama kiniam khiak a, Pathian ii deina a zuipa ahi hu in, Pathian in za hi.

⁸ Ama in Pathian Tapa ahihang, thuakna tungtawnin thunitna sin hi.

⁹ Ama sia a cingtaak a kisuasak zawkciang, ama thu a ni theampo atu in, tawntung ngupna ii naak a suak hi.

¹⁰ Pathian in ama sia Melchizedek pan a kinguizui susuk thiampi lianbel in saang hi.

Upna Nusiat huvau Kidop natu

¹¹ Hi thu tungtaang son tu tam mama om hi. Ahihang no tungah son tel thei tu haksa hi. Banghang ziam cile note in thu na tel hak mama uh hi.

¹² Note in sya na sep natu uh, hun tam ma om zo napi — Pathian thu kipatciilna taw hong hil tu khat na kisamh lai uh hi. Antak ne tu hi zo napi noai na neak uh kul lai hi.

¹³ Noai ne khat pawpo sia patang hi lai a, a maan le a maan ngawl a khentel thei ngawl laite na hi uh hi.

¹⁴ Antak sia ulian sate atu hi a, amate in, kisinna tungtawnin a pha le a sia khentel thei uh hi.