Hebrew te 13 - Syin Chin Bible

Pathian Lungkimsak natu

¹ Tapidaw mi unau khat bangin khat le khat ki it tawntung vun.

² Na inn ah leangnate zin na do tu mangil heak vun. Tuabang a ngamta pawlkhat in vantunglalangte zin dawdo ahi hunlam a he bua uh hi.

³ Thongsung a omte na phawk tavun a, noma zongh amate taw thongtaak khawm bangin kingaisun tavun. Ngim a thuakte na phawk tavun a, noma zongh amate taw ngim a thuak khawm bangin na kingaisun tavun.

⁴ Nupa kiteenna sia a kuama theampo in zatak vawt tahen a, pasalte le zite sia khat le khat tungah kithumaan hamtang tahen. Pathian in a paktatte le a kipalngulte tungah thukhen tu hi.

⁵ Na nuntakna uh sia sum le vanh manpha deina taw na kipealsak vun a, tuaciangin na nei uh sia taw na lungkim vun. Banghang ziam cile Pathian in, “Bangma hunin kong taisan ngei buatu a, kong nusia ngei buatu hi,” ci hi.

⁶ Tua ahikom hangsan takin, hi bangin ci tawng, “Topa sia kei hong hu pa hi a, ka pa tau buatu hi. Akua in kei bang hong law thei tu ziam?”

⁷ No tungah Pathian thu hong son na lampui masate phawk vun. Amate bangbangin nungta a, bangbangin thi ziam ci in ngaisunin, amate upna bang na ettee tavun.

⁸ Jesus Christ sia zeini, tuni le a tawntungin a kibang ahi hi.

⁹ A lam dadang kihilna nam tuatuamte zui in, thumaan lampi pan pial heak vun. Neak le dawn vai thukhamte zuina taw hi ngawlin, Pathian ii thuthiamna pan, ih sungsang thahatna nga tu sia pha hi; neak le dawn lamsang thukham zuite tungah tua thukhamte in phattuamna pia ngawl hi.

¹⁰ Jew te ii biakna munah thiampi seamte in, ih biaknatau tungah a om sate a neak thei natu thu nga ngawl hi.

¹¹ Jew te ii Thiampi Lianbelpa in ngannote ii chi sia Thiangthobel Mun ah mawphel biakpiak natu in tumpui hi; ahihang ngannote ii pum sia ngiaphual puasia ah hal hi.

¹² Hi thu hu in, Jesus zongh mihingte mawna pan a chisan taw a thiansua natu in, khuapi puasang ah thi hi.

¹³ Tua ahikom, eite zongh ngiaphual puasang, ama kung zuanin a maizumnate thuak pui tawng.

¹⁴ Banghang ziam cile hi leitung ah a kip khuapi khat zongh ih nei bua hi; eite in hong piang pheang tu khuapi sia ih zon laitak ahi hi.

¹⁵ Tua ahikom, eite in Jesus tungtawnin ih kipum piak biakpiakna in Pathian pok tawntung tawng, Topa hi ci in a pualaakte ii kam taw a kipia biakpiakna in tuasia ahi hi.

¹⁶ Na pha sep tu le khat le khat kihu tu sia, na mangil heak vun, banghang ziam cile hite sia Pathian a lungkimsak ih kipumpiak biakpiakna ahi hi.

¹⁷ Na lampuite ii thupiakna na zui vun. Amate ii thu na ni vun. Amate in tawlnga ngawlin na thaa uh hong cinsak hi, banghang ziam cile amate in, Pathian tungah amate nasep huvau sazian a lak kul tu hi. Amate thu na ni uh le amate sia lungdam takin, naseam tu hi; tua hi buathong le, amate in heena taw naseam tu a, note atu in bangma phattuamna a om buatu hi.

¹⁸ Ko atu thu hong ngetsak tawntung tavun. Thin thiangtho nei ung, ci ngam khu hi, banghang ziam cile, a maan bekma seam tawntung nuam khu hi.

¹⁹ Note kungah hai ngawlin, Pathian ii kei hong paisak kik pal natu thu nong ngetsak thua lai tu uh nasia tak kong thum hi.

Thukhup Thungetna

^20-21 A nuntakna biakpiakna in a piak hu in Tuucing Lian ahi Topa Jesus sia Pathian in thina pan tho kiksak zo a, tuaciang a chisan hu in a tawntung thuciamna sia kikipsak zo hi. Kilemna Pathian in ama ii dei sia na vawt thei natu in na kisap uh vanh pha theampo hong pia tahen a, tuaciang ama diksak sia Jesus Christ tungtawnin ei sungah hong seam tahen. Christ tungah minthanna a tawntung a tawntungin om tahen! Amen.

Kammal Khakbelte

²² Suapuite awng, hi kihanthotna kammalte pha takin na ngai vun ci in kong thum hi; banghang ziam cile hi laithak kong at sia sau leih ngawl hi.

²³ Ih suapui Timothy sia thongsung panin kipusuaksak zo hi, ci sia kong zasak nuam hi. Hong theng pal nale, noma taw kimu tu in, kong tonpui tu hi.

²⁴ Pathian mite theampo le na lampuite theampo tungah kong nuksetna kam na zasak vun. Italy pan suapuite in hong nukset hi.

²⁵ Pathian ii thuthiamna sia note theampo taw om tahen.