Hebrew te 11 - Syin Chin Bible

Upna

¹ Upna nei ih ci sia, lametna ih neinate tungah thinmuanna hi a, a kimu thei ngawl laite tungtaang ah muan ngamna ahi hi.

² Taanghlai mihingte sia upna a nei hu in, Pathian lungkim hi.

³ Vaannuai bup sia Pathian kammal taw kibitphua a, a kimu thei nate sia a kimu thei ngawl nate panin, kivawt hi ci in upna taw ih tel hi.

⁴ Upna taw Abel ii Pathian tungah a biakpiakna sia Cain ii biakpiakna sangin phazaw hi. Ama ii upna tungtawnin, ama sia Pathian in thutang hi ci in a saan pa hi a, banghang ziam cile Pathian mama in a piakte lungkim hi. Abel sia thi zo ahihang ama ii upna in thu hong son lai hi.

⁵ Upna in Enoch sia thina panin keam hi. A thi tu luangin, Pathian in ama la to zaw a, kuama in ama mu thei nawn ngawl hi. Laithiangtho sungah Enoch sia a kilaak to ma in, Pathian lungdamsak hi, ci hi.

⁶ Upna ngawl taw kuama in, Pathian lungdamsak thei ngawl hi, banghang ziam cile Pathian kung a zuan peuma in, ama sia om takpi a, ama a zongte thaman pia hi, ci in, a up uh kul hi.

⁷ Ama ii a mu thei ngawl maisang ah hong tung pheang tu nate huvau, Pathian ii kingintaak natu a sonte, Noah ii a zaak thei sia upna hang ahi hi. Ama in Pathian thu ni a, teambaw vawtin, tua ii sungah ama le a innkuanpuite kisuatak hi. Tua hu in leitung bup sia puavawkna thuak a, tuaciang upna pan hong pai thutang suana sia Noah in Pathian tung panin nga hi.

⁸ Pathian ii kamciam a piaksa ngam ah a pai tu in, Abraham in Pathian ii sapna a nit sia upna hang ahi hi. Ama in koisung pai tu ci in he ngawl pipi ma in, a ngam nusia hi.

⁹ Pathian ii ama tungah, a kamciamsa ngam ah ngamdangmi khat in a teen sia upna hang ahi hi. Ama in Pathian tung pan a kibang kamciamna ma a saang, Isaac le Jacob bangma in puanbuk sungah teang hi.

¹⁰ Abraham in Pathian ii ngealin a sak, a bulkip khuapi ngak nginge hi.

¹¹ Abraham huai mama zo a, a zi Sarah zongh ta nei thei ngawl hi napi upna in ama sia pa khat suaksak hi. Pathian in a kamciam sia tungsak tu hi, ci in muang hi.

¹² Abraham sia a thithi ma hi zo napi, hi pasal khat ii a suan le a paal sia van a aksi za le tuipivaal ah a kisim zo ngawl senvui za ahi hi.

¹³ Hi mite theampo sia upna sungah thi uh hi. Amate in Pathian ii kamciamte saang man ngawl a, a khualana pan ngal mu bek uh hi, ahitazong lungkim veve uh hi. Tuaciang amate in hi leitung ah ngamdangmi le ngaltaite bang ahi uh sia pualaak uh hi.

¹⁴ Tuabang a pualaakte in, amate aituam tu ngam khat zong hi ci in kitelthiangsak hi.

¹⁵ Amate in a nusiat sa ngam sia a ngaisusun nawn bua uh hi, ngaisun nuam le a heak kik natu hunpha om thei tu hi.

¹⁶ Amate ii lungngul sia ngam phazaw, vantung ngam hi zaw hi. Tua ahikom Pathian in amate ii Pathian hi a kici sia a mai a zum bua hi. Banghang ziam cile ama in, amate atu khuapi khat vawtkhol sa in koisak hi.

¹⁷ Pathian in Abraham a ze et lai in, a tapa Isaac sia sangaw biakpiakna bangin a pia ngamsak sia upna ahi hi. Abraham sia Pathian ii kamciam a piakna pa hi napi ama in a tapa khat bek a nei sia sangaw biakpiakna in nei tu kithoai hi.

¹⁸ Pathian in Abraham tungah, “Isaac tungtawnin kong kamciamsa suan le paalte na nei tu hi,” ci hi.

¹⁹ Abraham in Isaac sia thina pan Pathian in thosak kik thei tu hi ci in tuat hi, tua ahiciang Abraham in Isaac sia thina panin nga kik — ci tu ahi hi.

²⁰ Isaac in Jacob le Esau ii maisang atu thupha a piak sia upna hang ahi hi.

²¹ Jacob in a thi mahiat in, Joseph tapate thupha a piak sia upna hang ahi hi. Ama in a ciangkhut dawnah kinang in Pathian bia hi.

²² Joseph in a thi dektak ciangin Israel mite Egypt ngam pan a pusua natu thu a son sia le ama luanghawm tungtaang ah a ngamtat natu uh a vaithak teng sia upna hang ahi hi.

²³ Moses a sua zawk tha thum sung, a nu le a pa in, ama a sealcip uh sia, upna hang ahi hi. Amate in ama sia nauno hoi khat hi, ci in mu ahikom, kumpipa thupiakna a nit ngawl uh hang, a lau bua uh hi.

²⁴ Moses hong khanthin tak ciang kumpipa tanu ii a tapa a kici tu uuk ngawlin a nial sia upna hang ahi hi.

²⁵ Tawmvei sung mawna sungah a nopsak tu sangin, Pathian ii mihingte taw a thuak khop tu sia uukzaw hi.

²⁶ Ama in Messiah hangin huasaakna a thuak tu sia, Egypt ngam ii hauna theampo sangin, kimanh zaw pek sa hi, banghang ziam cile ama in maisang thaman a saan pheang lai tu te mitsuan hi.

²⁷ Moses in kumpipa thin uuk tu lau ngawlin, Egypt ngam a nusiat sia upna hang ahi hi. A kimu thei ngawl Pathian sia a mu bang phetin, nungsang ah heak kik tu a uuk bua hi.

²⁸ Thina ii Vantunglalang in, Israel mite ii tapaciil theampo a thalup thaak ngawl natu in ama in Paisan Poai piangsak a, kongkhate tungah chisan a kinoi natu thu a piak zongh upna hang ahi hi.

²⁹ Upna in San Tuipi sia leiko tung tot bangin, Israel mite kaantansak zo a, Egypt mite in kaantan tu in a kipat ciang, tuipi in amate valhlum siat hi.

³⁰ Israel mite Jericho khua ni sali kiimkotin a pai zawkciang tua khua luphungte a cip thapna in upna hang ahi hi.

³¹ Pumpi zuak numei Rahab sia Pathian thu a ni ngawlte taw a kithalup khop ngawl natu in a keam sia upna ahi hi. Banghang ziam cile ama in, Israel te ii ngalvilte pawlvawt in zindo hi.

³² Ka son tawto lai tu ziam? Gideon, Barak, Samson, Jephthah, David, Samuel le kamsaangte theampo ii thu ka son natu hun kicing ngawl hi.

³³ Upna tungtawnin, amate in, ngam bu bup sim uh a, zo uh hi. Amate in a maan nasepte seam a, tuaciang Pathian kamciamte saang uh hi. Amate in tawpite kam humcip a,

³⁴ a kiitakhuai meikuangte sumit in namsau taw thalup natu pan suakta uh hi. Amate sia thaneam kale thahatte suak uh hi; amate sia kidona sungah thahat a, ngamdangmi ngalkapte zothal uh hi.

³⁵ Upna tungtawnin a thisa a kinungtasak kik a mealheakte, numeite in nga uh hi. A dangte ahile, suatakna a saan tu nial in, a phazaw nuntakna sungah a kithaw kiksak natu in, vawtsiat zazaan thuakin thi uh hi.

³⁶ Pawlkhat sia kiselno in kivel a, pawlkhat sia thikkol kibulin, thong sungah kikhum hi.

³⁷ Amate suang taw kideang hi, tum nii sua in ki attan a, namsau taw kithat hi. Amate tuuvun ahibuale, kealvun silhin vak uh hi — zawngkhal in, kivawtsia a, ahi ngawl lalam in kivawt uh hi.

³⁸ Leitung sia amate taw a kiphu bua hi! Amate in ngaltaite bangin, sennealngamsung le mual tungah vakthap in, suanghawng leihawng sungah a teang uh hi.

³⁹ Upna a nei hu in hi mite theampo sia bangza in teptee huai ziam! Ahihang amate in, Pathian kamciam a saang man bua uh hi,

⁴⁰ banghang ziam cile Pathian in ei atu a phazaw tupna, hong neisak hi. Ama ii tupna sia, eite taw ih kitholkhop ciang bekin a kicialcingsak pheang tu ahi hi.