Hebrew te 10 - Syin Chin Bible

¹ Jew te Thukham sia a tatakte ii a kicing le a maan lim ahi zo bua hi; hong pai tu naphate ii a kician tak ngawl a pianzia bek ahi hi. Tua sangaw biakpiaknate zongh kum simin kipia tawntung hi. Tua ahile hi sangaw biakpiaknate tungtawnin, Thukham sia in Pathian kung a zuan mihingte bangbang hong cialcingsak thei tu ziam?

² Pathian a bia mihingte sia a mawna panin, kithiansua takpi hi le amate sia mawna taw kithasung nawn ngawl tu a, sangaw biakpiakna theampo om nawn ngawl tu hi.

³ Ahihang kum khat zawkciang kum khat sangaw biakpiaknate in, mihingte mawna phawksak kik tu hi.

⁴ Banghang ziam cile khuitalte le kealtalte chi in mawnate a la keak thei ngei bua hi.

⁵ Hi thu hangin Christ sia leitung ah hong pai tu ciangin ama in Pathian tungah, “Sangaw biakpiaknate le piakkhiatna te na dei bua hi, ahihang kei atu in pumpi khat nong koisak khol zo hi.

⁶ Nang in mawmaisak natu in biaknatau tungah nganhing a kipumhalte ahibuale sangaw biakpiaknate taw na lung a kim bua hi.

⁷ Tuaciangin, ‘Thukham laibu sungah keima thu a ki at bangma in, Pathian awng, na deina bang a seam tu in, Hi sungah om ing,’ ka ci hi,” ci hi.

⁸ Ama in a masa in, “Nang in sangaw biakpiakna, piaknate le mawnate laakkeak natu in, biaknatau tungah nganhing pumhalte na dei bua a, na lung a kim bua hi,” ci hi. Tua ahikom Pathian in sangaw biakpiaknate Thukham bangin kipia hi napi, tu a bangin na ci hi.

⁹ Tua zawkciangin, ama in, “Pathian awng, na deina bang a seam tu in, hi sungah om khi hi,” ci hi. Tua ahikom Pathian in sangaw biakpiakna lui te phiat siat a, Christ ii kipumpiak biakpiakna taw theak hi.

¹⁰ Pathian dei bangin Christ in ngamta ahikom, ama ii tawntung atu khatvei lian a pumpi a kipiakna hu in eite theampo mawna pan hong kithiansua hi.

¹¹ Jew thiampite khat simin, a nasep sia ni simin seam a, sangaw biakpiakna sia tamvei ma pia veve hi; Ahihang hi sangaw biakpiaknate in mawnate a la keak thei ngei bua hi.

¹² Ahihang Christ in mawnate atu in, sangaw biakpiakna khat pia a, tua biakpiakna sia a tawntung atu in, kikhomsuan hi, tua zawkciangin, ama sia Pathian ii ziatsang ah to hi.

¹³ A ngalte sia peang ngakna tokhum bangin ama ii peang nuai ah Pathian ii a koi mateng, tu in ama in tua munah ngak hi.

¹⁴ Tua ahiciang ama in khatvei a kipumpiakna taw mawna pan a kithiansuate, a tawntung atu in a cialcing suaksak hi.

¹⁵ Tuaciangin Thaa Thiangtho zongh in, ama ii tetti panna hong pia hi. Hi bangin ci masa hi,

¹⁶ “Hisia maisang ah hong pai tu hun sungah amate taw ka vawt tu thuciamna hi. Ka thukhamte amate lungtang sungah ka koi tu a, a thinsung ah ka at tu hi,” Topa in ci hi.

¹⁷ Tuaciangin ama in, “Amate mawnate le ngitlo ngamtatnate ka ciamtee nawn buatu hi” ci hi.

¹⁸ Tua ahikom hi mawnate hong kimaisak zawkciangin, mawnate laak keak natu piakkhiatna dang a kul nawn bua hi.

Pathian kung Zuan tawng

¹⁹ Tuaciangin suapuite awng, Jesus ii chisan hu in, Thiangthobel Mun ah ih tum natu in, suatakna a kicing takin ih nga hi.

²⁰ Ama in eite atu ama ii pumpi ahi kidalna puankhak sia pailetin — a nungta lampi thak khat hong honsak hi.

²¹ Eite in Pathian ii innpi a uk thiampi lian khat ih nei hi.

²² Tua ahikom thintak le upna maan taw mawna kithasunna pan, a kithiansua sa lungtang le tuithiang taw a kisil sa pumpite taw Pathian kung zuan tek tawng.

²³ Ih pualaak sa lametna kholet tawng, banghang ziam cile Pathian in, hong kamciam sate sia kholet tu hi, ci in ih muang ngam hi.

²⁴ Khat le khat kithinbot tawng, ki itna kilak in a pha ngamtat natu kihu tek tawng.

²⁵ Pawlkhatte bang hi ngawlin, eite in kikhoptua ngei sia thasua bua tawng. Topa Ni hong nai hi ci in, mu na hi uh ciangin, khat le khat kihanthawn seseam zaw tawng.

²⁶ Banghang ziam cile thumaan hong kiheaksak zawkciang, mawna ih vawt kaltang lai le, mawna maisak natu, biakpiakna khat beak zongh om nawn ngawl hi.

²⁷ Hong pai pheang tu thukhenna le Pathian a langpante a lalcipsak tu a kiitakhuai meikuang sia launa taw ngak a, ih om tu bek taang lai hi!

²⁸ Moses thukham a paltan khat pawpo sia tetti nii ahibuale a tamzaw taw thukhenin a kimawsak le hesuakna om ngawlin kithisak hi.

²⁹ Tua ahile Pathian Tapa a zawngsak pa sia bang suak tu ziam? Mawna pan a, a thiansua Pathian thuciamna chisan a awlmaw ngawlte, thuthiamna Thaa a zawngsak te, bang tek suak tu ziam? Ngaisun vun, tuabang mihing khat ii thuak tu a kilawm daan sia bangza in nasia zaw tu ziam!

³⁰ Banghang ziam cile, “Phu ka lam tu a, ka thuk kik tu hi,” a ci sia pa le, “Topa in ama mihingte thu a khen tu hi,” a ci sia pa zongh ih he hi.

³¹ A nungta Pathian khut sung ih taaksuk tu sia lauhuai mama hi!

³² A bosa hun sungah note, bangbang hi kana nu ziam, phawk kik vun. Tualai in, Pathian khuavak sia no tungah hong taan zawkciang, na tam mama na thuak ngei uh hi. Ahitazong kisaan in na hanciamna ah, na lel bua uh hi.

³³ Note khat vevei ngual sungah a kilanghin hong kivawtsia a, tuaciang hun dangte ah hi bangin a kivawtsiate na pawlpui ngam uh hi.

³⁴ Thongtaakte na thuakpui uh a, na neisa theampo hong kimatsak ciangin, tua supna sia lungdam takin na thuak uh hi, banghang ziam cile a tawntung a, a kikhomsuan tu, a phazaw pek khat, nei nginge lai na hi uh sia na he uh hi.

³⁵ Tua ahiciang na thinletna uh thasua heak vun. Banghang ziam cile tuasia in thaman lian mama taw hong kizom tu hi.

³⁶ Pathian ii deina bangin na sep thei natu le, ama hong kamciamte na saan thei natu in, na thin na sausak kul tu hi.

³⁷ Banghang ziam cile laithiangtho in, “Tawmvei zawkciang, hong pai tu pa hong pai tu hi; ama haisaang ngawl tu hi.

³⁸ Bangpo ahizong a thutang ka mite in, um tu a nungta tu hi: ahihang amate khat po a heak kik le ama ii tungah ka lungkim ngawl tu hi,” ci hi.

³⁹ Eite in heak kik a, a mangthangte ih hi bua hi. Ei sia upna nei in a kingumte ih hizaw hi.