Hebrew te 1 - Syin Chin Bible

A Tapa tungtawnin a kison Pathian Kammal

¹ A bosa hunin, Pathian in ih taanghpupite tungah kamsaangte tungtawnin, lam tuatuam taw tamvei ma paupui hi,

² ahihang hi hun khakbel hunte ah, a Tapa tungtawnin hong paupui hi. Ama tungtawnin Pathian in vaannuai bup bitphua a, a khakbel ciangin na theampo ama ii neisa suak tu in ama sia Pathian ii tealsa ahi hi.

³ Ama in Pathian' minthanna ii vaangtaang hong lengsak a, ama sia Pathian ii hina zia bang tatak ma hi in, vaannuai bup ama ii a vaang nei a kammal taw khosak hi. Mihingte ii mawnate atu in mawmaitsakna a nga sak zawkciangin Vaanglianpipa Pathian ii ziatsang vantung ah to hi.

Pathian Tapa ii Letna

⁴ Ama tungah Pathian piak min sia vantunglalangte min sangin lianzaw ahi bangma in, Tapa sia vantunglalangte sangin lian zaw hi.

⁵ Banghang ziam cile Pathian in vantunglalangte khat po tungah, “Nang sia ka Tapa na hi hi; tu ni in kei sia na Pa ka hi hi,” a ci ngei bua hi. Tuasia bangma in Pathian in, vantunglalangte khat po tungah, “Kei sia ama ii Pa ka hi tu a, ama sia ka Tapa hi tu hi,” ci ngeingawl hi.

⁶ Ahihang Pathian in a Tapaciil leitung ah a paisak tu ciangin, “Pathian ii vantunglalangte theampo in ama bia tu hi,” ci hi.

⁷ Ahihang Pathian in vantunglalangte huvau ahile, “Pathian in a vantunglalangte vui suaksak a, a naseamte sia meikuang suaksak hi,” ci hi.

⁸ Tapa huvau ahile Pathian in: “Pathian awng, na ngam sia a tawntung a tawntungin kip tu hi! Nangma in na mihingte thutang taw na uk hi.

⁹ A maan thute na dei a, a maan ngawl thute na ngaimaw hi. Tua hu in Pathian, na Pathian in nang hong teal zo hi. Tuaciang na lawmte a piak sangin nang tungah lungdamna le upatna a lianzaw hong pia hi,” ci hi.

¹⁰ Ama in a ci laina panin, “Topa awng, nangma in a kipatciilin simlei na bitphua hi, tuaciang na khut mama taw vantungte na vawt hi.

¹¹ Tuate mangthang tu a, ahihang nang na kip tu hi; Tuate in puan bang lui in sia tu hi.

¹² Amate laktong puasilh bangin na thep tu a, puan bangin na laih tu hi. Ahihang nang na hile a tawntungin na kibang a, na nuntakna a bo ngei bua hi,” ci hi.

¹³ Pathian in a vantunglalangte khat po ii tungah: “Na ngalte na peang nuai ah sisanhin kong neisak mateng, ka ziatsang ah to in,” ci ngeingawl hi.

¹⁴ Tua ahile vantunglalangte sia bang ziam? Amate sia Pathian naseam thaa te hi a, ngupna a saang tute a hu tu in, a sawlte ahi uh hi.