Ezra 8 - Syin Chin Bible

Saltanna pan A Ciakik Mite

¹ Hiteng sia Artaxerxes ii kumpilian a sep ciangin Babylon saltanna pan Jerusalem ah Ezra taw a ciakik bee le phung lutangte hi:

^2-14 Phinehas bee le phung pan Gershom Ithamar bee le phung pan Daniel David bee le phung pan Shecaniah ii tapa Hattush, Parosh bee le phung pan Zechariah le a bee a phung pan pasal 150 (a pianna innkuan tepteena lai om hi) Pahath Moab bee le phung pan Zerahiah ii tapa Eliehoenai taw pasal 200 Zattu bee le phung pan Jahaziel ii tapa Shecaniah taw pasal 300 Adin bee le phung pan Jonathan ii tapa Ebed taw pasal 50 Elam bee le phung pan Athaliah ii tapa Jeshaiah taw pasal 70 Shephatiah bee le phung pan Michael ii tapa Zebadiah taw pasal 80 Joab bee le phung pan Jehiel ii tapa Obadiah taw pasal 218 Bani bee le phung pan Josiphiah ii tapa Shelomith taw pasal 160 Bebai bee le phung pan Bebai ii tapa Zechariah taw pasal 28 Azgad bee le phung pan Hakkatan ii tapa Johanan taw pasal 110 Adonikam bee le phung pan Eliphelet, Jeuel le Shemaiah taw pasal 60 (A khak sang a ciate hi) Bigvai bee le phung pan Uthai le Zaccur taw pasal 70

Biakinn naseam tu in Ezra in Levi te Zong

¹⁵ Ahava a kitotawm Tuiluam hui ah mihon bup ka kaikhawm a, tua munah ni thum sung ngiaphual ka saat uh hi. Tua mihon sungah thiampite om a, ahizong Levi te ka mu bua hi.

¹⁶ Tuaciang lampui kuate: Eliezer, Ariel, Shemaiah, Elnathan, Jarib, Elnathan, Nathan, Zechariah le Meshullam le sya niite ahi Joiarib le Elnathan te ka sam hi.

¹⁷ Casiphia khua taangpi lutang ahi Iddo kungah amate ka paisak a, ama le a pawlte, biakinn naseamte in Biakinnpi sungah Pathian naseam tu mihing hong puak natu ka ngensak hi.

¹⁸ Pathian ii thuthiamna tungtawnin amate in Mahli bee le phung sung pan Levi te a pilvang Sherebiah hong puak a, a tapate le a suapuipate sawm le liat taw hong pai uh hi.

¹⁹ Amate in Merari bee le phung sung pan Hashabiah le Jeshaiah te zongh a mealheakte kul taw hong puak hi.

²⁰ Tua banah Levi te a hu tu in David kumpipa le a uliante ii a taanghpupite pan nasep a piaksa biakinn naseam 220 om hi. Amate min teng zongh kikhum siat hi.

Ezra in Mipite An tangin Thungetna ah Lampui

²¹ A kitotawm Ahava Tuiluam hui ah ka vekpi uh in antang in kote ii Pathian mai ah kiniamkhiak a, ka khualhawna uh ah hong lampui in, koma, ka tate uh le ka neisa theampo taw hong kep natu ama tungah hesuak ngen tu in ka sawl hi.

²² Ih khualhaw sungin ngalte khut sung pan hong keam tu in kumpilianpa tungah ngalkapte ka nget tu sia maizum naap khi hi, banghang ziam cile ama munah koma Pathian in ama a muang pawpo thupha pia a, ahizong ama a nungngat pawpo tungah lungkim ngawlin daan a piakna thu ka son zo hi.

²³ Tua bangin kote in Pathian hong dal natu an tangin thu ka ngen uh a, kote ii thungetnate ama in hong zo hi.

Biakinnpi atu Letsongte

²⁴ Thiampi lampuite sung panin Sherebiah, Hashabiah le a dang sawm ka teal hi.

²⁵ Tua zawkciang kumpilianpa, ama ngaisutna a piate le, uliante, tuaciang Israel mite ii Biakinnpi sungah zak tu in a piak ngunn, khamh le vanhzakte toai ka tee a, tua teng thiampite tungah ka pia hi.

^26-27 Hi teng sia amate ka piakte hi: Ngunn - tann 22 Ngunn vanh zakte 100 - kilogramme 70 Khamh - kilogramme 3,400 Khamh khawbeam 20 - kilogramme 8.4 Taau ciitak kuangte 2, kham khawbeam taw a man kibang hi.

²⁸ Keima in amate tungah, “Note in na taanghpupite ii Pathian, Topa tungah biakna taw kisai na thiangtho uh bangma in ama kungah thinzaw biakpiakna in na paipui ngunn le khamh vanhzakte zongh thiangtho hi.

²⁹ Biakinnpi na thet uh dong tua teng pha takin keamcing tavun. Tua teng thiampite inndoi ah toaitee in Jerusalem ah a om thiampi lampuite, Levi lampuite le Israel te lampuite tungah aap vun,” ka ci hi.

³⁰ Tua ahiciang thiampite le Levi te in ngunn, khamh le vanh zakte Jerusalem Biakinnpi ah paipui tu in vaipuak la uh hi.

Jerusalem ah Cia kik

³¹ A tha khat tha, ni sawm le ni nii ni in Jerusalem zuan tu in Ahava a kitotawm Tuiluam ka nusia uh hi. Khualhawna ah kote ii Pathian in hong ompui a, ngalte hong simna le hong suam natu panin hong dal hi.

³² Jerusalem ka thet uh ciang, ni thum sung ka tawlnga uh hi.

³³ Tua zawk ni li ni in Biakinnpi ah pai in tua ngunn, khamh le vanh zakte toai ka tee zawkciang in Uriah ii tapa thiampi Meremoth tungah ka aap uh hi. Ama taw in Phinehas ii tapa Eleazar le Levi te nii ahi, Jeshua ii tapa Jozabad le Binnui ii tapa Noadiah zong om uh hi.

³⁴ Na theampo kisimin toai kitee a, tepteena cing takin kivawt paih hi.

³⁵ Saltanna pan hong cia kikte theampo in Israel te ii Pathian tungah sangaw biakpiakna a hal tu in biakpiaknate hong paipui uh hi. Amate in Israel mite theampo atu in khuital 12, tuutal 96, le tuuno 77 pia in mawna pan amate le amate a kithiansua natu in keal 12 zongh pia uh hi. Hi ngannote theampo Topa tungah sangaw biakpiakna in hal uh hi.

³⁶ Amate in kumpilianpa ii a piak lai sia zongh kengin Euphrates nitumna ngamukmangte le uliante tungah pia a, tuate in mipite le biakinn sung biakpiakna ah huna pia hi.