Ezekiel 37 - Syin Chin Bible

Ngukote Omna Ngamkuam

¹ Topa ii a vaanglian hong ompuina ka phawk a, ama thaa in mithi ngute taw kidim ngamkuam ah hong paipui a, tua munah hong koi hi.

² Ama in ngamkuam sungah hong vapui kawkoai a, a ko sa mithi ngute tam mama ka mu hi.

³ Ama in kei tungah, “A thithei mihing awng, hi mithi ngute a nungta kik thei tu ziam?” hong ci hi. Keima in, “Vaanglianpipa Topa awng, nangma bekma in zo thei tu ni hi,” ci in ka zo kik hi.

⁴ Ama in, “Mithi ngute tungah kamsaanna pia in. Mithi ngu hite in Topa kammal ngaisak in.

⁵ Keima Vaanglianpipa Topa ii ci teng son in: Keima in hu ka mop tu a, nuntakna ka pia kik tu hi.

⁶ Thangui le sazangte ka pia tu a, vun taw ka tuam tu hi. Hu ka mop tu a, ka nungtasak kik tu hi. Tua hun ciang Topa ka hi hunlam na he tu uh hi,” ci hi.

⁷ Tua ahikom hong kison bangin kamsaanna ka pia hi. Ka thuson laitak mama in, awnging siasua ka za a, mithi ngute kipee tu in kipan hon hi.

⁸ Ka mu tang mama in, mithi ngute thangui le sazangte taw kituam a, tua zawkciang vun in tuam hi. Ahihang a pumpi sungah nuntakna hu a om bua hi.

⁹ Kei tungah Pathian in, “A thithei mihing awng, vui sungah kamsaanna pia in. Vui sia mun theampo pan hong pai natu, mithi luang hite sungah hu a khum natu le nuntakna a piak kik natu in, Vaanglianpipa Topa in thu ka pia hi ci sia vui kungah va son ta'n,” hong ci hi.

¹⁰ Hong kisawlna bangin kamsaanna ka pia hi. Pumpite sungah nuntakna hu tum a, nungta in hong dingto hi. Ngalkaphonpi khat a pha zo tu za in a tam hi.

¹¹ Pathian in kei tungah, “A thithei mihing awng, Israel mite sia hi mithi ngute taw kibang hi. Amate in ka ngu uh tei zo a, maisang bangma muanmawkna nei nawn ngawl khu hi, a ci uh hi.

¹² Tua ahikom Israel ka mite tungah Keima, Vaanglianpipa Topa in a thaankhukte ka honsak tu hi ci in kamsaanna pia in. Keima in amate ka lakeak tu a, Israel ngam ah ka pui kik tu hi.

¹³ Ka mite kiphumna thaante hongin amate ka laakkeak ciang, Topa ka hi hunlam amate in hong he tu uh hi.

¹⁴ Hu ka mop tu a, nungtasak kik in, a ngam ah ka teangsak kik tu hi. Tuasia ciang amate in kei sia Topa ka hi hunlam he tu uh hi. Tusia vawt tu in kamciam ka pia zo a — ka vawt tu hi. Keima, Topa in ka son zo hi,” hong ci hi.

Judah le Israel Kumpi ngam khat Suak

¹⁵ Topa in kei hong paupui kik hi.

¹⁶ Ama in, “A thithei mihing awng, thing ciangkhut khat la in a tungah ‘Judah kumpi ngam’ ci in at in. Tua zawkciang a dang khat la in ‘Israel kumpi ngam’ ci in a tungah at in.

¹⁷ Tua zawkciang a mong veve situa in a, ciangkhut khat bek bangin na khut sungah toai in.

¹⁸ Na mipuite in a khiakna bang ziam ci in hong dok ciang

¹⁹ Keima, Vaanglianpipa Topa in, Israel taang ahiciangkhut sia la in a, Judah taang ahiciangkhut sia taw ka koikhop tu sia amate son in. Ciangkhutte ngeal sia khat ka sua tu a, ka khut sungah ka toai tu hi.

²⁰ “Ciangkhutte ngeal sia na khut sungah toai in a, mihingte musak in.

²¹ Tua zawkciang Keima, Vaanglianpipa Topa in a paina ngam theampo panin, ka mite theampo kaikhawm in amate ngam leitang tungah ka ciapui kik tu sia amate tungah son in.

²² Israel ngam mualte tungah amate, minam khat in ka ngawm tu hi. Kumpi khat bek in amate uk tu a, minam nii ahizong, kumpi ngam nii ahizong kikhen nawn ngawl tu hi.

²³ A kiihuai milimte taw amate le amate kininsak nawn ngawl tu a, mawna taw kilalsak nawn ngawl tu hi. Amate sia kei hong melsiatna mawna le hong leeheakna lampite theampo pan ka suaktasak tu hi. Amate ka thiansua tu hi; amate sia keima mite hi tu a, Keima in amate ii Pathian ka hi tu hi.

²⁴ Ka naseampa David taw a kibang kumpi khat sia amate kumpi hi tu hi. Ngamuk khat ii khutnuai ah amate teng kilomkhat tu a, thumaan takin ka thukhamte a zui tu uh hi.

²⁵ Ka naseampa Jacob tungah ka piaksa a taanghpupite teenna ngam ah teang tu uh hi. Tua munah a tate le a suan a paal te theampo, a tawntungin teang tu uh hi. Ka naseampa David bang ahi kumpi khat in amate a tawntungin uk tu hi.

²⁶ Amate a tawntung ngammuangin a omsak thuciamna khat amate taw ka vawt tu hi. Amate ka kipsak tu a, a mite pungsakin, ka Biakinnpi sia a ngam sungah a tawntung a om tu in ka koi tu hi.

²⁷ Amate taw tua munah ka teang khawm tu hi; keima in amate ii Pathian ka hi tu a, amate in keima mite ahi tu uh hi.

²⁸ Ka Biakinnpi sia amate sungah a tawntung atu ka phu ciang, minamte in Keima, Topa in Israel sia keima mi in ka teal hunlam hong he tu uh hi,” hong ci hi.