Ezekiel 1 - Syin Chin Bible

EZEKIEL II PATHIAN A MU PHITNA ( 1:1—7:27 ) Pathian Tokhum

¹ Kum sawmthum kum a tha li na a ni nga ni in Babylon ngam Chebar ngunhui ah keima Buzi ii tapa thiampi Ezekiel in Judah mi saltaangte taw ka teang khawm hi. Van kihong a, tuaciang Pathian ii lak mukholna khat ka mu hi. (

² Tua hun sia Jehoiachin kumpipa sal in a kipaipui zawk a kum nga kum ahi hi.)

³ Chebar ngunhui tua Babylon ngamah, Topa hong paupuina ka za a, ama ii vaangletna ka phawk hi.

⁴ Khua ka dakto le saksang pan vuipi suangval hong pai ka mu hi. Meeikaai lian pui khat sung pan khualeng vazak a, a kiimkot van taang hi. Khualeng tee vazalna munah taau bang khat taang hi.

⁵ Vuipi suangval laizang ah mihing pianlim bang ahi cherubim li ka mu hi,

⁶ ahihang tuate khat simin maitang li le tha li tek nei uh hi.

⁷ A peangte maam a, amate in khuital peangcin bang nei uh hi. Tuate sia taau nawt thiang bang keakin tee uh hi.

⁸ Maitang li le tha li te bek hi ngawlin, amate in a tha khat tek ii nuai ah mihing khut li tek nei uh hi.

⁹ Cherub te khat simin, a tha te nii tek phalhin, a tha dawn veve tek kiphasak a, king li nei khat suak hi. Amate tungin a kikhiin nop ciang, a pum uh kiheak kul ngawlin a hon in kikhiin uh hi.

¹⁰ Cherub khat simin a kibang ngawl maitang nam li nei uh hi: tuate sia a maisang ah mihing maitang, a ziatsang ah tawpi maitang, a veisang ah khuital maitang le a nungsangah muvanlai maitang ahi hi.

¹¹ Nganhing khat sim a thate nii tek kilaamto a, a hui pan a dang khat ii thadawnte taw kisisak hi, tuaciang amate ii a tha dangte nii tek sia a pum tung tek ah zep uh hi.

¹² Nganhing khat simin a mun li teng nga ahiciang lu heak kul ngawlin a uuk na po ah a hon in pai thei uh hi.

¹³ Cherub te sungah meisip kuang bang khat om a, tua meikuang sia a tawntungin kikhiin hi. Tua meikuang sia leng vazak in khua lengsak vazal hi.

¹⁴ Tua cherub te sia khualeng manlangza in nung le mai ah a manlangin tai uh hi.

¹⁵ Nganhing lite ka et ciangin khat ii pangh ah khat a om lei taw kipha a mui li teng ka mu hi.

¹⁶ Tua a mui li teng kibang siat hi; tuate khat simin suangmanpha bangin taang hi. Tuaciang a muite khat simin, a sungah a mui dang khat tang takin a kiphaa in kithua hi,

¹⁷ tuabangin a muite sia mun li ah a ukna sang pawpo pai thei uh hi.

¹⁸ Tua a muite ii kiil teng sia mittangte taw kidim uh hi.

¹⁹ Cherub te a kikhiin simin leangte taw kikhiin khawm a, cherub te lei panin a kikhaanto ciangin, a muite zongh a kikhaangto uh hi.

²⁰ Cherub te sia amate ukna po ah pai uh a, a muite zongh a cherub te bang tatak ma in pai uh hi, banghang ziam cile cherub te in a muite uk uh hi.

²¹ Tua ahikom cherub te a kikhiin sim a tawlngak sim ahibuale vui sungah a kikhaangto simin a muite zongh in tuabang tatak ma in zui uh hi.

²² Tua cherub te lu ii tung san ah a tee vazal limlangh taw a kivawt kikhupsiin in a kikoi taw a kibang khat om hi.

²³ Tua a kikhup siin sia ii nuai ah cherub te dingin, khat simin a thate nii tek a hui a om sia ii sang ah phalh a, a dang tha niite taw a pumpi seal hi.

²⁴ A len uh ciang a thaphil nging ka za hi; tua awnging sia tuipi hawk bang hi a, ngalkap honpui lampai nging bang, Vaanglianbelpa Pathian ii aw bang ahi hi. A len a tawlngak ciang, a thate khup uh hi.

²⁵ Ahihang amate lu tungah a om a kikhup siin sia ii tung panin aw nging khat om lai hi.

²⁶ Tua a kikhup siin sia ii tungah Sapphire suangmanpha taw a kivawt kumpi tokhum taw a kibang khat om a, tua tokhum tungah mihing taw a kibang lim khat to hi.

²⁷ Tua lim sia meikhuk laizang ah a om taau bangin taang hi. Tua in a kiim a paam theampo nasia takin khuavak taangsak hi.

²⁸ Tua ii sungah sangun ii meal namcin om hi. Tuasia in Topa ii ompuina a kilanghsak khuavak taang velvol sia ahi hi. Hisia ka mu ciangin ka maisang ah ka puksuk hi.