Ephesus te 1 - Syin Chin Bible

¹ Pathian ii deina taw Christ Jesus ii sawltak khat ahi Paul in — Jesus taw kipumkhat nuntakna sungah a thumaan Ephesus khua Pathian ii mihingte tungah lai kong thaak hi;

² Ih Pa Pathian le Jesus Christ in thuthiamna le thinnopna hong pia tahen.

Christ sungah Thaa Thuphate

³ Ih Topa Jesus Christ ii Pa le Pathian tungah lungdamko tawng! Banghang ziam cile Christ taw kipumkhatna sungah ama in eite sia vantung ngam taw kisai thaa thupha theampo hong pia hi.

⁴ Christ taw kipumkhatna tungtawnin, ama mai ah sit baang ngawl le ih thiantho natu in, Pathian in leitung a vawt ma ngawngawn in eite hong teal zo hi. Hong itna hangin,

⁵ Pathian in Jesus Christ tungtawnin a tapa a tanute hong suasak natu in a khensat sa hi a — hi thu in ama diksak le tupna ahi hi.

⁶ A minthang a thuthiamna hu le a it a Tapa sungah eite a thawthongin hong piak letsong hu in, Pathian pok tawng.

⁷ Banghang ziam cile Christ ii chisan hangin eite kisuakta a, tua thu in ih mawna kimaisak hi, cinopna hi. Pathian ii thuthiamna bangza in lian ziam,

⁸ tua in, hi za ta a lian mama eite hong piak thuthiamna ahi hi! Ama ciimna theampo le a thuk mu theina taw,

⁹ Pathian in a tupna sa bangin vawt a, a pawlcing tu in a khensat sa ama tupna thuku sia Christ zanghin, eite hong hesak hi.

¹⁰ A hun hong tun ciangin Pathian ii a khuangkhim tu, hi tupna in vantung leitung ah bitphua sa theampo kaikhawm tu a, a lutang tu in Christ koi tu hi.

¹¹ Na theampo sia Pathian ii tupna le khensatna bangin kiseam a; Pathian in a kipatciil pan mama in a khensatsa thu bulphu in, ama ii tupna hu in eite Christ taw kipumkhat a, ama aituam mihingte ih sua natu in hong teal hi.

¹² Tua ahikom Christ sungah lametna a nei phit eite in, Pathian ii minthanna pok tawng!

¹³ No ngupna hong puak thumaan thu ahi Lungdamna Thupha sia na zaak uh ciang, note zongh Pathian ii mihingte na suak uh hi. Note in Christ na um uh a, tuaciang Pathian in hong kamciamsa Thaa Thiangtho hong piakna taw ama ii neisa na hina uh tepteena tazeik note tungah hong tuum hi.

¹⁴ Tua Thaa in Pathian ii mihingte hong kamciam sate ih nga natu kipsakna hi a, ama ii neisa ahite tungah suatakna a cingin Pathian in hong pia tu hi ci in hong lungmuangsak hi. Ama ii minthanna pok tawng!

Paul ii Thungetna

¹⁵ Hi thu hu in, Pathian ii mihingte na itna uh le Topa Jesus na upna uhte ka zaak nungsang,

¹⁶ note atu in Pathian tungah lungdamkona ka tawlnga ngei bua hi. Ka thungetnate sungah kong phawk a,

¹⁷ ih Topa Jesus Christ ii Pathian, a vaanglian Pa tungah nang hong ciimsak a ama na heak natu le Pathian hong lak tu Thaa hong piak natu in, ka ngen hi.

¹⁸ Bang lametna nei tu in note hong sam a, a mite a piak tu a, a kamciam thuphate bangza in nasia, ci in na heak natu in na thinsung uh hong kihonsak a, a khuavak na mu thei natu in kong ngetsak hi,

¹⁹ tuaciangin ei, thu umte sungah na hong seam ama ii vaangletna sia bangza in lian ziam, ci in na heak natu kong ngetsak hi. Eite sungah na hong seam, hi a nasia thahatna in,

²⁰ Christ sia thina pan thosak a, vantung ama ii tokhum ziatsang ah a tosak sia ma ahi hi.

²¹ Christ in tua munah vantung ukpite, thuneite, vaangletna neite, tote theampo ii tung panin uk hi; ama in hi leitung ah ahizong, hong pai pheang tu leitung ah ahizong, thunei min le zate theampo sangin a lianzaw min le za nei hi.

²² Pathian in na theampo sia Christ peang nuai ah koi a, na theampo ii ukpi Topa ahi tu in pawlpi tungah ama pia hi.

²³ Pawlpi in Christ ii pumpi hi a, kicinna ahi ama mama in mun theampo ah na theampo khuangkhim hi.