Daniel 12 - Syin Chin Bible

A Tawpna Hun

¹ Puanneal a silh vantunglalang in, “Tua hun laitak na mite a cing, a lian vantunglalang Michael kilangh tu hi. Tua zawkciang minamte hong pianciil pan kipan a om ngeingawl a nasiabel ngim ngana hun theng tu hi. Tua hun a thet ciang Pathian ii laibu sungah a min a ki at, na ngammite theampo kingum tu hi.

² A thisate tam mama nungta kik tu uh hi: pawlkhatte sia tawntung nuntakna nga tu uh a, pawlkhatte in tawntung maimawlna thuak tu uh hi.

³ Lampui ciimte sia van ii taanna theampo taw taang tu uh hi. A maan seam tu in mihing tam thu a hilte sia aksi bangin taang tawntung tu uh hi,” ci hi.

⁴ Ama in kei tungah, “Daniel awng, tu in leitung bo dong tua laibu khup in a, a tungah tazeik tum in. Tua hun sungin, mihing tam mama in bang thu piang ziam ci thu a heak nopna taw hanciam thawthong tu uh hi,” hong ci hi.

⁵ Tuaciang keima in ngunvaalbo lang le lang ah a ding mihing nii ka mu hi.

⁶ Amate khat in tuilu sang a khuala zawhiatna ah a ding vantunglalang tungah, “Hi a lamdang thupiangte a bo tu sia bang tanvei ngei tu ziam?” ci in dongh hi.

⁷ Vantunglalang in a khutte nii van sangah laamto a, Tawntung Pathian min taw a ciliap huai kamciamna khat vawt hi. Ama in, “Kum thum le kum lang hi tu hi. Pathian mite a kivawtsiatna a bo ciang hi thute theampo piang siat zo tu hi,” a ci ka za hi.

⁸ Ama thu son ka za hi, ahihang a cinopna ka tel bua hi. Tua ahikom, “Tuale, topa awng, tuasia bangbangin bo tu ziam?” ci in ka dongh hi.

⁹ Ama in, “Daniel awng, tu in na pai kul tu hi, banghang ziam cile hi kammalte sia a tawpna hong thet mateng kiseal in, thuku a koi tu ahi hi.

¹⁰ Mihing tam mama kithiansua tu hi. Mi seksolte in tel ngawl tu uh a seksol tan tu uh hi; miciimte bekin tel tu uh hi.

¹¹ “Ni sim biakpiakna te a kitawpsak hun pan, ahibuale Kiihuai Lauhuaina hun pan kipan ni 1,290 ngei tu hi!

¹² Ni 1,335 bo dong thumaanin a om zote sia mihing lungdamte hi!

¹³ “Tua ahiciang, Daniel awng nangma, a tawp dongin thumaan in. Tuasia zawkciang na thi tu hi, ahihang a tawpna hun ciang, na minphatna tel saang tu in na tho tu hi,” ci in zo hi.