Amos 7 - Syin Chin Bible

Khaumaw hon Mukholna

¹ Vaanglianpipa Topa tung panin mukholna khat ka nga hi. Tua ii sungah kumpipa ii tel, ngan ante a ki at zawk bek, lopate a po kik sawngin khaumaw honpui khat Topa in a piansak ka mu hi.

² Ka mukholna sungah khaumawte in ngam sungah a hing theampo netum a, tuasia ciang keima in, “Vaanglianpipa Topa awng, na mite mawna maisak in! Bangbangin amate nungta zo tu ziam? Amate tawm mama a, thazawm uh hi!” ka ci hi.

³ Topa in a thin kheal kik a, “Na mu bang piang ngawl tu hi,” ci hi.

Meikuang Mukholna

⁴ Vaanglianpipa Topa tung panin mukholna dang khat ka nei hi. Tua ii sungah ama in a mite meikuang taw daan pia tu in a kithoai ka mu hi. Mei in leinuai a tuipi lian sia kaanghtham a, tuaciang leitang mama kaanghtham tu kipan hi.

⁵ Tuasia ciang keima in, “Vaanglianpipa Topa awng, tawlnga in! Na mite bangbangin nungta thei tu ziam? Amate no mama a, thaneam hi!” ka ci hi.

⁶ Topa in a thin kheal kik a, “Hi sia zongh piang ngawl tu hi,” ci hi.

Teena khaukhai khat Mukholna

⁷ Topa tung panin mukholna dang khat ka nei hi. Tua ii sungah ama in teena khaukhai taw tee in, a kisa pang khat ii hui ah a ding ka mu hi. Ama khut sungah teena khaukhai khat om hi.

⁸ Ama in, “Amos awng, bang na mu ziam?” ci in kei hong dongh hi. “Teena khaukhai khat” ci in ka zo hi. Tuaciang ama in “Ka mite khaukhai bangin a tang ngawl pang khat taw a kiban hunlam lakna in hi teena khaukhai ka zangh hi. Amate daan ka piak tu huvau ka thin ka kheal kik buatu hi.

⁹ Isaac ii suan le paalte biakpiakna munte kisusia tu hi. Israel te ii a thiangtho munte zaancip in kinusia tu hi. Kumpipa Jeroboam ii kumpi khangngui ka bosak tu hi.” ci hi.

Amos le Amaziah

¹⁰ Tuasia ciang Bethel thiampi Amaziah in Israel kumpipa Jeroboam tungah thu khat puak hi: “Amos in a mite sung panin nang hong thasawm hi. Ama ii kampaute in ngam susia tu hi.

¹¹ Hi sia ama pauna hi: ‘Jeroboam sia ngal kisimna ah thi tu hi, tuaciang Israel mite sia amate ngamsung pan salin kipaipui tu hi.’ ”

¹² Tuasia ciang Amaziah in Amos tungah, “Kamsaang pa awng, tu a teng pha zo hi! Judah ngam ah heak kik ta'n a, tualai ah thuhil ta'n. Amate in nang sum taw hong tham tahen.

¹³ Hi lai Bethel ah kamsaanna nei nawn heak in. Hi mun sia kumpipa ii biakna mun hi a, ngammi bup ii biakinn hi,” ci hi.

¹⁴ Amos in, “Kei sia sum thangaina taw kamsaang nam ka hi bua hi. Keima in ngancingpa khat ka hi a, theikungte ka keamcing hi.

¹⁵ Ahihang Topa in ka tuucin nasepna pan hong la in, a Israel mite kungah pai a, mukholna son tu in thu hong pia hi.

¹⁶ Tua ahikom tu in Topa paunate ngai in. Nangma in kamsaanna ka tawlngak natu le, Israel mite thuak tu in ka sonkeakna ka tawlngak natu nong son hi.

¹⁷ Tua ahikom Amaziah awng, Topa in nang tungah, ‘Na zi sia lampi tungah pumpi zuak khat suak tu a, na tate ngal sungah kithatlum tu hi. Na leitang kihawmtham tu a, ngualdangte kipia tu hi, tuaciang nangma mama lawki ngam khat sungah na thi tu hi. Tuaciang Israel mite a ngam a lei pan leidang ah saltaang tu in kipaipui takpi tu hi,’ hong ci hi” ci in zo hi.