2 Samuel 8 - Syin Chin Bible

David ii Ngalzawnate

¹ Hun tawmvei zawkciang Kumpipa David in Philistine te sim kik in zo ahiciang, amate in a ngam uh uk nawn ngawl hi.

² Tua zawkciang Moab te zo hi. A ngal matte lei ah lumsakin thum sung pan nii veu thatlum hi. Tua ahikom Moab te sia a khutnuai mi hong suakin, ama tungah shia pia uh hi.

³ Tuaciang, ama in Syria ngamsung Zobah ngamuk kumpipa Rehob ii tapa Hadadezer sia Euphrates ngun naak sangah ngamukna la kik tu in a paina lampi ah ama in zo hi.

⁴ David in siphu ngalkap 1,700 le, lei ngalkap 20,000 matsak hi. Ama in siphu ngalleang zakhat atu a kicing khom siphu la in, a dang teng theampo a peangbaisak siat hi.

⁵ Damascus a om Syria te in Kumpipa Hadadezer hu tu in ngalkaphonpi khat a paisak le David in tuate simin 22,000 that hi.

⁶ Tua zawkciang ama in amate ngam sungah ngal ngiaphualte saat a, amate sia a khutnuai mite hong suakin, shia pia uh hi. Topa in David sia mun theampo ah ngal zosak hi.

⁷ Hadadezer ii a uliante ii toai khamh lumte David in sut a, Jerusalem ah cia pui hi.

⁸ Ama in Hadadezer ii uk khuapite ahi Betah le Berothai pan taau zongh tam mama la hi.

⁹ David in Kumpipa Hadadezer ii ngalkaphonpi zo zo hi ci in Hamath kumpipa Toi in za hi.

¹⁰ Toi taw tamvei ma a kido ngei Hadadezer sia David in zo ahikom a tapa Joram in muaksak a, tuabangin a lungdampuina ko hi. Joram in David kungah khamh, ngunn le taau taw a kivawt letsongte puak hi.

¹¹ Kumpipa David in tuate sia a zawthal sa ngamte ahi

¹² Edom, Moab, Ammon, Philistia, le Amalek te tung pan a laaksak ngunn le khamh te le Hadadezer kung pan a laaksak vanh pawlkhatte taw zong kopin biakna ah a zak tu in koituam hi.

¹³ Ci Kuam sungah Edom mite 18,000 a thalupna pan a cia kik ciang David minthang zawkan hi.

¹⁴ Ama in Edom ngamsung theampo ah ngalkap phualte saat a, tuaciang tua munah a om mite ama ii khutnuai mi suak uh hi. Topa in David mun theampo ah ngal zosak hi.

¹⁵ David in Israel buppi uk a, a mite thumaan tak le a pha takin a kivawt tawntung natu in uk hi.

¹⁶ A nu Zeruiah ahi Joab sia ngalkaphonpi a ukpa hi; Ahilud ii tapa Jehoshaphat sia thu tepteena teng a lenpa hi;

¹⁷ Ahitub ii tapa Zadok le Abiathar ii tapa Ahimelech te sia thiampite ahi hi; Seraiah sia kumpipa zum sung thuzeakpi ahi hi;

¹⁸ Jehoiada ii tapa Benaiah sia David a cingte a ukpa hi a, David ii tapate sia thiampite ahi uh hi.