2 Samuel 3 - Syin Chin Bible

¹ Saul ii bangkua sang a pangte le David ii bangkua sang a pangte ii kidona sia khuangei hi. David hong hat vaial ciang, ama a langpante hong thazawm vaial hi.

David ii Tapate

² David ii tapa luk Hebron ah a suak teng sia a piankum zui in: Amnon, a nu sia Jezreel panin Ahinoam;

³ Chileab, a nu sia Carmel panin Nabal ii zi meingong nu Abigail; Absalom, a nu sia Geshur kumpipa Talmai ii tanu Maacah;

⁴ Adonijah, a nu sia Haggith; Shephatiah, a nu sia Abital;

⁵ Ithream, a nu sia Eglah hi. Hi tapate theampo sia Hebron ah piang siat uh hi.

Abner in David Pawm

⁶ David ii ngalkapte le Saul ii bangkua tung a thumaan ngalkapte a kido tawto uh ciang, Saul ii nungzuite sung pan Abner hong thahat vaial hi.

⁷ Ni khat ni in Saul ii tapa Ishbosheth in Abner sia Saul ii zino Aiah ii tanu Rizpah taw lumkhawm hi ci in mawsuanh hi.

⁸ Hisia in Abner thinsosak hi. “Saul leeheak tu in hong um ni ziam? Judah te atu na a seseam hong sa takpi ni ziam?” ci ngawp hi. “A kipat peuma pan na pa Saul, a suapuite le a ngualtamhte tungah thumaan khi hi, tuaciang David ii hong zaw natu pan hong hun khi hi; ahitazong tuni in numei khat huvau in maw hong zong ni hi!

^9-10 Topa in David munah kamciam pia a, ama in kumpi ngam sia Saul le a suan a paalte tung pan la in, David sia ngam mong khat pan mong khat dong a uk Israel le Judah kumpipa suaksak tu hi. Tu in hi thu ka taangtungsak buale Pathian in hong saatlum tahen!” ci hi.

¹¹ Ishbosheth in Abner kiita mama ahikom kam khat zongh pau ngam ngawl hi.

¹² Abner in tua laitak Hebron ah a om David kungah kamtaite paisak a, “Akua in hi ngam hi lei uk tu ziam? Keima taw thukimna khat hong vawt ta'n, tuaciang Israel ngam bup nangma sangah na nga natu kong hu tu hi,” cisak hi.

¹³ David in, “Pha hi! nang taw thukimna vawt tu khi hi, ahihang nong hisak tu khat sia: kei taw kimu tu nong pai ciang Saul ii tanu Michal hong keng nanak tu ni hi,” ci hi.

¹⁴ David in Ishbosheth tung zongh ah kam thaak a, “Ka zi Michal hong pia kik ta'n, ama ka teenpui natu in Philistine te ii vunteap zakhat taw ka tat sa hi,” ci hi.

¹⁵ Tua ahikom Ishboseth in Michal sia Laish ii tapa, a pasal Paltiel kung panin la khe hi.

¹⁶ Paltiel in lam tawntung ma in kap kawmin Bahurim khua dong zui hi. Ahihang Abner in, “Inn ah ciakik ta'n,” a ci ciang ama cia hi.

¹⁷ Abner sia Israel lampuite kungah pai in, “Khua ngeipi ma David sia na kumpipa tu in dei nu hi.

¹⁸ Tu in hisia no atu hunpha hi. Topa in hi bang a ci sia ciamtee vun, ‘Ka naseampa David in, Israel ka mite sia Philistine te le ngal a dangte theampo panin a suatak natu in zangh tu khi hi,’ ” ci hi.

¹⁹ Abner in Benjamin nam pan mite tung zongh ah a son zawkciang Benjamin mite le Israel te ii a vawt tu thukimna teng David munah a son tu in Hebron ah pai hi.

²⁰ Hebron khua David kungah mihing kul taw Abner hong pai ciangin David in amate atu poai vawtsak hi.

²¹ Abner in David munah, “Tu in ka na pai tu a, Israel buppi kumpipa nangma sangah kong pangsak tu hi. Amate in nang sia kumpipa in hong saang tu hi, tuaciangin nangma in na dei teng na nga siat tu a, ngam buppi na uk tu hi” ci hi. David in Abner sia ngammuan natu thukho khat pia in paisak hi.

Abner Kithatlum

²² A zawkciang, Joab le David ii ulian dangte ngalsimna panin a sutol uh vanh tam mama taw hong cia hi. Abner ahile tua mun Hebron ah David taw a om nawn bua hi, banghang ziam cile David in ama sia ngammuanna thukho taw thaa hi.

²³ Joab le a mite hong thet uh ciangin ama tungah Abner sia David kumpipa kungah haw zo a, ngammuan natu kamciam pia in a kipaisakna thu kison hi.

²⁴ Tua ahikom Joab sia kumpipa kungah pai in, “Bang vawt thong ni ziam? Abner nang kungah hong pai ci leang — banghangin thaa thong ni ziam?

²⁵ Ama hi sungah hong pai sia nang hong theam tu, na sep na vawt theampo le na paina theampo a kan tu in hong pai hi. Tuasia na heak ma hi ngawl ziam!” ci hi.

²⁶ Joab in David a nusiat zawkciang Abner sam tu in kamtaite paisak a, tuaciang amate in Sirah tuikhuk panin ama hong ciapui kik hi; ahihang David in bangma heak pui ngawl hi.

²⁷ Hebron ah Abner hong thet ciangin, Joab in ama nguak taw thu son tubangin kongpi ah a tuamin paipui a, tua munah a ngil pan naam taw hol hi. Tuabangin Abner sia kisuamlum hi, banghang ziam cile ama in Joab ii suapuipa Asahel thalupsak hi.

²⁸ David in tua thu a zaak ciang, “Topa in kei le ka uk sung mite Abner kisuamlupna tungtaang ah bekcik zongh maw ngawl hi ci in hong he hi.

²⁹ Tua atu in daan piakna Joab le a innkuan bup in thuak tahen! Khangsimin a bangkua sungah numei le pa omkhopna pan a piang natna a vei khat, ahibuale a lauhuai vun natna khat, ahibuale numei nasep teng a seam thei bek khat, tua ahibuale ngal sungah a thi khat, ahibuale an neak tu nei ngawl khat veu om vaciat tahen!” ci hi.

³⁰ Tuabangin Joab le a suapuipa Abishai in Gibeon kidona ah amate ii suapuipa Asahel a thatlum pa Abner tungah phulam uh hi.

Abner Kivui

³¹ Tua zawkciang David in Joab le a mite a puan uh eaukeak in, khau-ip puan silh a, Abner thina hangin a khuangai natu in thupia hi. Tuaciang thi vuina ah Kumpipa David mama mithi kuang nung pan zui in pai hi.

³² Abner sia Hebron ah kiphumin, kumpipa sia a thaan ah a ngingin kap a, mite theampo zongh kap tek hi.

³³ David in hi kaa la Abner sak hi: “Banghangin Abner sia a mawmaw pa bangin thi ziam?

³⁴ A khut te kiletheen ngawl hi, a peangte kisawm ngawl hi; Ama sia khialna lian vawtte ii thalup mi khat bangin thi hi!” Tuaciang mipite in ama kaa kik leleau uh hi.

³⁵ Mipite nitangtum hanciamin David in bang khat po nesak nuam ahihang ama in a ciliap huai kamciam vawt a, “Nitum ma in neak khat po ka nei le Pathian in hong vaatlum tahen!” ci hi.

³⁶ Amate in hisia ciamtee a, lungkim mama uh hi. A tatakin, David ii vawt theampo in mipite lungkimsak hi.

³⁷ David ii a mi teng le Israel mi theampo in Abner kisuamlupna ah kumpipa a kihel ngawlna thu tel uh hi.

³⁸ Kumpipa in a uliante munah, “Tuni in Israel ngam sungah lampui lian khat thi ahi hunlam phawk ngawl nu ziam?

³⁹ Keima sia Pathian ii teal kumpipa ka hisaap hang, tuni in ka tha zawm hi. Hi Zeruiah ii tapate sia kei atu in ngoltol lei hi. Hi khialna lian vawtte a kilawm bangin Topa in daan pia tahen,” ci hi.