2 Samuel 23 - Syin Chin Bible

David ii Kammal Khakbelte

¹ Jesse ii tapa, David sia Pathian ii mi thupi tu in a vawt, Jacob te ii Pathian in kumpipa tu in a teal hi a, Israel atu in la hoite a phuakpa ahi hi. Hi teng sia David ii a khakbel a pau kammalte ahi hi:

² Topa ii thaa in kei tungtawnin pau hi; ama ii thu puak sia ka muk tungah om hi.

³ Israel ii Pathian pau zo hi; Israel a dal pa in kei tungah hong ci hi: “Thutang khenna taw a uk kumpipa, Pathian thu ni in a uk pa sia,

⁴ meeikaai om ngawl zing khuavak tuung nitaang taw kibang hi, ngua theau zawkciang lopate a teesak vasip ni taw kibang hi.

⁵ Pathian ii ka suan ka paalte thupha a piak tu zia sia tuabang ahi hi, banghang ziam cile ama in kei taw tawntung thuciamna khat hong vawt hi, a kipaltan ngawl tu thukimna khat, a kikheal ngeingawl tu kamciam piakna khat ahi hi. Kei dei sia tua teng lian ahi hi; tua in ka zawna hi tu a, Pathian in taangtungsak nanak tu hi.

⁶ Ahihang Pathian a selte sia, a kivawk lingte taw kibang hi; Kuama in khutnguak taw amate tham thei ngawl hi.

⁷ Thik vanhzak ahibuale tei khat na zak kul tu a; amate kaanghtum tu hi.

David ii Ngalkap Minthangte

⁸ David ii a minthang ngalkapte sia hite ahi hi: a masa phitbel sia Tachemon pan Josheb Basshebeth hi a, ama sia “Thum teng” ii lampui pa ahi hi; ama in ngal kisimna khat sungah a teipi taw ngalte 800 do in thatlum siat hi.

⁹ A minthang thum sung pan a niina sia Ahoh phung sung pan Dodo ii tapa Eleazar hi. Ni khat ni in ama le David in ngaldo tu a kikhawmtua Philistine te thato uh hi. Israel te nungkin a,

¹⁰ ahihang ama ding topin do in, a khut khikcip ahikom namsau tha thei nawn ngawl hi. Topa in tua ni in zawna lianpi nga hi. Ngal a zaw zawkciang Israel te Eleazar kungah heak kikin a thite ii ngaldalna teng suut uh hi.

¹¹ A minthang thum sungah a thumna sia Harar pan Agee ii tapa Shammah hi. Philistine te sia be ciinna lo khat omna Lehi ah kikhawmtua uh hi. Israel te Philistine te mai panin tai keak uh a,

¹² ahizong Shammah ahile lo sungah a dinmun nusia ngawlin ngalnang a, Philistine te that hi. Topa in tua ni in zawna lianpi nga hi.

¹³ Anlaak hun kipat nai ciang, “Sawmthumte” sung pan thum sia David omna Adullam suanghawng sungah pai in, Philistine te ahile Rephaim Kuam ah ngiaphual saat uh hi.

¹⁴ Tua hun laitakin David sia ngalnanna tu in a ki uum mualtung khat ah om a, Philistine te pawlkhat in Bethlehem khua la uh hi.

¹⁵ David in inn sang ngai mama in, “Bethlehem kongpi hui tuikhuk panin ka dawn tu tui, mi khat po in hong paipui le paw uuk na peu ing!” ci hi.

¹⁶ Ngalkap minthang thumte in a pai natu Philistine te phual nawkkeak in, tuikhuk pan tui tawm a laak zawkciang David kungah paipui uh hi. Ahihang David in a dawn nuam bua hi; tua sangin Topa tungah piakkhiatna in lei ah sung zaw a,

¹⁷ tuaciang, “Topa awng, hi tui ka ne thei ngei buatu hi! A nuntakna a khaam mite ii chi a ne taw ka kibang tu hi,” ci hi. Tua ahikom ama in tui a neak tu nial hi. Ngalkap minthang thumte ii ngalhan nasepnate tuabang ahi hi.

¹⁸ Joab ii suapuipa Abishai (a nu sia Zeruiah hi) sia “A minthang Sawmthumte” ii lampui ahi hi. Ama in tei taw a ngalte zathum do a, that siat hi, tuabangin ama “Sawmthumte” sungah minthang hi.

¹⁹ Ama sia “Sawmthumte” sungah a minthangbel hi a, amate ii lampui hong suak hi, ahihang tua “Thumte” za in minthang ngawl hi.

²⁰ Kabzeel pan Jehoiada ii tapa Benaiah sia ngalkap minthang dang khat hi; ama in ngalhang nasep lian tam mama a seamsa hi a, tuasung pan Moab ngalhang kiciante nii a thalup kihel hi. Vuuk taak ni khat in, dum khat sungah ama tuaksuk in tawpi khat thatlum hi.

²¹ Ama in a thatang lian mama Egypt te tei toai khat that hi. Benaiah in a molpum taw Egypt pa sim a, a tei sutin tua taw that hi.

²² “Sawmthumte” sungah khat ahi Benaiah ii ngalhan nasepnate tuabang ahi hi.

²³ Ama sia “Sawmthumte” sung panin kician a, ahihang “Thum teng” za in minthang zo ngawl hi. David in ama a cingte ukpa in koi hi.

^24-39 “Sawmthumte” sungah a kihel dang teng sia: Joab ii suapui Asahel, Bethlehem pan Dodo ii tapa Elhanan, Harod pan Shammah le Elika Pelet pan Helez Tekoa pan Ikkesh ii tapa Ira Anathoth pan Abiezer Hushah pan Mebunnai Ahoh pan Zalmon Netophah pan Maharai Netophah pan Baanah ii tapa Heleb Benjamin ngam Gibeah pan Ribai ii tapa Ittai Pirathon pan Benaiah Gaash ngamnai kuamte sung pan Hiddai Arabah pan Abialbon Bahurim pan Azmaveth Shaalbon pan Eliahba Jashen ii tapate Jonathan Harar pan Shammah Harar pan Sharar ii tapa Ahiam Maacah pan Ahasbai ii tapa Eliphelet Gilo pan Ahithophel ii tapa Eliam Carmel pan Hezro Arab pan Paarai Zobah pan Nathan ii tapa Igal Gad pan Bani Ammon pan Zelek Beeroth pan Naharai Joab ii ngaldalna puapa Jattir pan Ira le Gareb Hit mi Uriah, ahi uh hi. A vekpi in ngalkap minthang sawmthum le sali pha hi.