2 Samuel 15 - Syin Chin Bible

Absalom in Tualngal tho tu Ngeal

¹ Hisia zawkciang Absalom in ama atu siphu ngalleang khat le siphu pawlkhat heang a, ama a cing mihing 50 koi hi.

² Ama zing tuungin tho a, khuapi kongpi hui lampi ah ding hi. Mihing khat po sia ngual taw thu kinei a, kumpipa khensak nuam in hong pai a om simin, Absalom in sam a, koisung pan hong pai ni ziam ci in dongh bul hi. Tuaciang ama tungah a nam min sia a son zawkciang,

³ Absalom in, “En in, thukham in nang hong panpui hi, ahihang kumpipa luangin nang thu hong sitin thu hong khen tu kuama om ngawl hi,” ci hi.

⁴ Tuaciang hi bang veu belap a, “Keima thukhenmang hi leng uuk meak ing! Tua hile ngual taw thu kinei, ahibuale ama ii neisa a nga kik nuam khat pawpo kei kungah hong pai thei tu a, thu khaikimin ka khensak tu hi,” ci hi.

⁵ Tuabangin mihing khat Absalom mai ah kun in hong neak ciangin Absalom in a khut thaakin koai a, namh hi.

⁶ Kumpipa tung pan thu khaikim khenna thangai a hong pai Israel mi theampo Absalom in hi bang veu in vawt ahikom amate ii panpuina maan nga hi.

⁷ Kum li zawkciang Absalom in David kumpipa munah, “Topa awng, Hebron ah hong paisak ta'n, Topa tungah ka piak kamciam teng seam nuam khi hi.

⁸ Syria ngam Geshur ah ka teen lai in, Topa tungah kamciam ka piakna pan, ama in kei, Jerusalem ah hong la kik le Hebron ah ama bia tu khi hi, ka ci hi,” ci hi.

⁹ “Thin nuam takin va pai ta'n,” kumpipa in ci hi. Tua ahikom Absalom sia Hebron ah pai hi.

¹⁰ Ahihang ama in Israel namte theampo kungah kamtai paisak in, “Lemle aw na zaak uh ciang, ‘Hebron ah Absalom sia kumpi suak zo hi!’ ci in a au natu in sonsak hi.”

¹¹ Absalom ii sapna taw Jerusalem ah ama taw a paikhawm mihing 200 pha hi; amate in a sawmna thu bangma he ngawlin, thinpha lungpha taw pai uh hi.

¹² Tuaciang Absalom in Kumpipa David ii thudokte khat ahi Gilo khua ah Ahithophel zongh sangaw biakpiakna a vawt laitakin samsak hi. Kumpipa langpan tu a sawmna sia hong thahatin, Absalom ii nungzuite tam vaial hi.

Jerusalem pan David Tai

¹³ Kamtai khat in David munah, “Israel te in Absalom tungah a thumaan natu in kamciam pia hi,” ci hi.

¹⁴ Tua ahikom David in Jerusalem ah ama taw a om a uliante theampo munah, “Absalom khut panin ih suakta nuam le thakhat ma ih tai kul tu hi! Manlang vun! Tua ahibuale ama hai ngawlin hi mun hong theng tu a, hong zo in khuapi sungah a om theampo hong that tu hi!” ci hi.

¹⁵ Amate in, “Hi hi, Kumpipa awng, na ci babangin ngamta tu in kinging khu hi,” ci in zo hi.

¹⁶ Tua ahikom kumpipa sia kumpi inn en tu a nusiat a zino sawm teng simngawl, a innkuanpui dang teng le a uliante taw tai uh hi.

¹⁷ Kumpipa le a mite theampo khuapi a nusiat tu ciangin. inn mong khakbel sia ah tawlnga uh hi.

¹⁸ Kumpi a cing teng sia ama mai kaantan in a pai suak laitak a uliante theampo zongh ama hui ah ding tek hi. Gath pan a zui ngalkap 600 te zongh hong kaantan uh a,

¹⁹ tuaciang kumpipa in amate lampuipa Ittai munah, “Banghangin ko taw hong paikhawm tu ni ziam? Heak kik in a, kumpi thak sia taw om ta'n. Nang sia ngamdangmi ni hi, na ngam panin ngaltai khat hi ni hi.

²⁰ Hi sungah tawmvei sung bekma hong teang na hi ciang, banghangin nang, kei taw hong vakthap kawkoaisak tu khi ziam? Koisung zuan tu khi ziam ci in keima zongh in he ngawl khi hi. Heak kik in a, na ngammipuite zongh tonpui ta'n — Topa in no tungah hong dik tahen a hong thumaan tahen,” ci hi.

²¹ Ahihang Ittai in, “Kumpipa awng, Topa min taw kiciam khi hi, thi tu keak a kul zong na paina po ah pai tawntung tu khi hi,” ci in zo hi.

²² David in, “Pha hi! Pai suak in!” ci in zo hi. Tua ahikom Ittai sia a mi teng le ama a bealhte theampo taw pai suak uh hi.

²³ David nungzuite in a nusiat tak ciang mipite a ngingin hong kap uh hi. Kumpipa in Kidron lui kaantan a, a mite in zui in amate duisung manaw in paikhawm hon uh hi.

²⁴ Thiampi Zadok, tuaciang ama taw Thuciamna Thingkuang thiangtho a pua Levi mite zongh tualai ah kihel in om uh hi. Amate in Thuciamna Thingkuang lei ah koisukin, mi theampo ii khuapi a nusiat dong kisuanh kik ngawl uh hi. Thiampi Abiathar zongh tua munah om hi.

²⁵ Tuasia ciang kumpipa in Zadok munah, “Thuciamna Thingkuang khuapi sungah heak pui kik ta'n. Topa in kei tungah hong lungkim ahile ni khat ni ciangin kei hong heak kiksak tu a, tuasia le a omna mun hong musak tu hi.

²⁶ Ahihang Topa in kei tungah hong lungkim buale — tuasia ciang ama uuk bang po hong vawt tahen,” ci hi.

²⁷ Tuaciang ama in Zadok munah a ci lai na pan, “En in, na tapa Ahimaaz le Abiathar ii tapa Jonathan tonpui in khuapi sung ma ah thinnuam takin zuan kik tavun.

²⁸ Tua lanin nang tung pan thuthak ka zaak dong ngun kanna pan kong ngak tu hi,” ci hi.

²⁹ Tua ahikom Zadok le Abiathar in Jerusalem ah Thuciamna Thingkuang puak kik in tua khua ah om uh hi.

³⁰ David in Olive Mual ah a kapsa in kaato a; khuangaina lim lak in a peangnguakin om a, a lu siin hi. Ama a zuite theampo in zongh a lu uh puan taw siinin kap uh hi.

³¹ Ahithophel in Absalom ii leedona ah pawm hi ci in David tungah a kison ciangin, “Topa awng, nong hesuakna in Ahithophel ii ngaisut piakna sia a lui thawthong suaksak in!” ci in thu ngen hi.

³² Biakna mun khat sia ii a omna mual tungah David hong thet ciangin, Arch mi ahi a lawm muan Hushai taw kimu a, ama sia a puan ki eaukeak in a lu tungah leivui kibuak hi.

³³ David in ama munah, “Kei taw nong tonkhop hang kei nong hu theina bangma om ngawl hi,

³⁴ ahihang khuapi ah heak kik in Absalom munah na pa atu na ka sep bangma, tu in nangma atu thumaan takin hong sepsak tu khi hi, va ci lete kei hong hu thei zaw tu ni hi. Tuaciang Ahithophel ii ngaisut piakna peuma na hi thei za in nalh in.

³⁵ Thiampi Zadok le thiampi Abiathar te tua munah om tu hi; kumpi inn sungah na zaak theampo amate tungah son in.

³⁶ Amate ii a tapate Ahimaaz le Jonathan amate kungah om hi, tuaciang thu na kaikhop theampo amate in kei hong puaksak thei tu ni hi,” ci hi.

³⁷ Tua ahikom David lawmpa Hushai sia Absalom hong thet bek laitakin khuapi sungah heak kik hi.