2 Kumpite 23 - Syin Chin Bible

Josiah in Doai biate Biakna Vawk

¹ Kumpipa Josiah in Judah ngam le Jerusalem khua ii lampuite theampo khawmtua hi,

² tuaciang amate sia Biakinnpi ah thiampite le kamsaangte, tuaciang a taanglai mite theampo taw a hau a zawng kibangin paikhawm uh hi. Kumpipa in amate mai ah Biakinnpi sungah a kimu tua thuciamna laibu buppi a ngingin sim hi.

³ Ama in kumpi khuam sia kungah dingin ama ii thu a ni tu, a thupiakte le a thukhamte thin theampo ngaisutna theampo taw a keamcing tu le thuciamna taw hong tangkal ngetnate zongh laibu sungah a ki at bangin a seam a vawt tu in Topa taw thuciamna khat vawt uh hi. Tuaciang mite theampo in thuciamna keamcing tu in kamciam pia uh hi.

⁴ Tua zawkciang Josiah in Thiampi Lianbel Hilkiah, a khutdawn thiampite, Biakinnpi tumna kongkhacingte munah, Biakinnpi sungah Baal biakna, numeipathian Asherah biakna le aksite biakna vanh theampo pusua siat tu in thupia hi. Kumpipa in hi vanh teng khuapi puasang Kidron kuam hui ah haltum in, a vaam teng sia Bethel ah paipuisak hi.

⁵ Ama in Judah khuapite le Jerusalem nai ah a om sangaw biakpiakna le doai sepna taute tungah a seam Judah kumpi masa te ii kipsak thiampite — Baal tung a sangaw biakpiakna a pia, ni, tha, solh le aksi te biakna ah a seam thiampi theampo heamkhia hi.

⁶ Ama in Biakinnpi sung pan Asherah numeipathian ii lim sia la keakin khuapi pua sang Kidron kuam ah a haltum zawkciang a vaamte a zaancip dong sucip in nautaangte kiphumna munah poai hi.

⁷ Ama in pumpi zuakte teenna Biakinnpi sung inndoite baltham hi. (Numeite in tua munah Asherah biak natu a kizangh puantualte tak uh hi.)

⁸ Ama in Judah khuapite a om thiampite Jerusalem ah paipui hi, tuaciang ngam bup sungah sangaw biakpiakna vawtna biaknataute phiat hi. Khuapi kongpi sung tum ciang veisang ah a om khuapi uk Joshua ii vawt keal-doai biakna biaknataute zongh baltham hi.

⁹ Tua thiampite sia Biakinnpi sungah a sep tu ki oai ngawl hi, ahihang amate in a thiampi seppuite a kipia tol saw ngawl anluumte ne thei uh hi.

¹⁰ Kuama in a tapa ahibuale a tanu, Molech pathian tungah meihal biakpiakna in a nei thei ngawl natu in, Josiah kumpipa in Hinnom Kuam a om Topheth a kici doaibiakna mun sia zongh lalthamsak hi.

¹¹ Ama in Judah kumpite ii ni biakna in a zak siphute heam a, hi biakpiakna sungah a kizangh leangte haltum hi. (Hite sia ulian mama khat ahi Nathan Melech ii teenna innte ii nai, biakinn leitual sung, kongpi hui ah kikoi hi.)

¹² Kumpipa Josiah in Ahaz kumpipa teenna inndoite ii tung kumpi innkhum tungah Judah kumpipate ii saksa biaknataute le Manasseh kumpipa ii Biakinnpi leitualte nii sungah a koi biaknataute vaattham hi; ama in biaknataute saatneen in a bek a bek in Kidron kuam ah vawk hi.

¹³ Josiah in Kumpipa Solomon ii saksa Jerusalem nisuana sang Olive Mual thang sangah a om a thasiathuai milim biaknataute — Sidon numeipathian Astarte, Moab pathian Chemosh, Ammon pathian Molech milim biaknate lalsak hi.

¹⁴ Kumpipa Josiah in suangkhuamte vaattan in, Asherah numeipathian tepteena limte zongh sattan a, tuaciang tuate ii dinna mun sia mithi ngute taw siin hi.

¹⁵ Josiah in Israel te mawna sungah a lampui Nebat ii tapa Kumpipa Jeroboam ii saksa Bethel a om biakpiakna mun sia zongh baltham hi. Josiah in biaknatau kaivawk a, a suangte a bekin sutham in leivui suak tu in seakcip hi; ama in Asherah ii lim zongh haltum hi.

¹⁶ Tua zawkciang Josiah in a kiimkot a et le mual tungah thaankuul pawlkhat mu hi; ama in mithi ngute la in biaknatau tungah halsak hi. Kumpipa Jeroboam sia poaikhaam sungin biaknatau hui ah a din laitak kamsaang khat ii nidang pek lai in a sonkhol sa bangin ama in vawt a, hi bangin biaknataute lalsak hi. Kumpipa Josiah in a kiimkot a et le tua bang a sonkhol kamsaangpa ii thaankuul mu hi.

¹⁷ Ama in “Zia sia akua thaan ziam?” ci in dongh hi. Bethel mite in, “Tuasia Judah panin hong pai kamsaang khat ii thaan hi a, hi biaknatau tungah na vawt tu teng a sonkhol sia hi,” ci uh hi.

¹⁸ Josiah in, “A om bangin omsak po vun,” ci in thupia hi. “Ama ii ngute sia khiin tu hi ngawl hi,” ci hi. Tua ahikom a ngute sia kikhiin ngawl a, Samaria pan hong pai kamsaangte ii ngu zongh kikhiin ngawl hi.

¹⁹ Kumpipa Josiah in Israel khuapi theampo ah Topa thin uukna piangsak Israel kumpite ii vawt doai biakna munte susia siat hi. Tua biaknataute Bethel a te a vawt bangin vawt hi.

²⁰ Ama in doai bia thiampi theampo sia amate ii doai sepna biaknatau tungah thatlum a, tuaciang ama in biaknatau sim tungah mithi ngute hal hi. Tua zawkciang ama Jerusalem ah heak kik hi.

Josiah in Paisan Poai Vawt

²¹ Kumpipa Josiah in mipite munah thuciam laibu sungah a ki at bangin Topa amate ii Pathian zatakna Paisan Poai vawtin sawl hi.

²² Hi bang Paisan Poai khat Israel kumpipate ahibuale Judah kumpipate peuma in Thukhenmangte ii ngam a uk zawk nungsang in vawt ngeingawl hi.

²³ Tu in a khakbel ciang Josiah ii kumpi maan zawk a kum sawm le liat na hun ciang Jerusalem khua sungah Paisan Poai kivawt hi.

Josiah ii Kikhealna A Vawt Dangte

²⁴ Thiampi Lianbel Hilkiah ii Biakinnpi sung pan a mu Thukham laibu sungah a ki at te bang ngamtatsak natu in Kumpipa Josiah in Jerusalem pan le Judah ngam lei dang panin, thaa sam thei te theampo, aisaan theite, bangkua pathiante, milimte, a dang doai sepna in a zak nate a vekpi in heam siat hi.

²⁵ Ama ii Topa atu a thin theampo, a ngaisutna theampo le a thatang theampo taw seam a, Moses ii thukham theampo a zui bangin ama ii masia ah kumpi khat zongh om ngeingawl hi; ama zawkciang zong tuabang kumpi khat zongh om ngawl hi.

²⁶ Ahihang Topa ii a nasia mama a thin uukna sia Kumpipa Manasseh ii ngamtatna hangin Judah te tungah hong tung a, tu dong ma in thai ngawl hi.

²⁷ Topa in, “Israel tungah ka vawt sa bangma Judah tungah vawt tu khi hi: Judah mite sia ka muna pan hawlkhia tu khi hi, tuaciang ka tealsa Jerusalem khuapi le keima hong kibiakna mun tu hi ka ci Biakinnpi te zongh, ka nil tu hi,” ci hi.

Josiah ii a Kumpi Maan A tawpna

²⁸ Kumpipa Josiah ii a sep a vawt dangte theampo sia Judah Kumpipate Taanghthu sungah kikhum hi.

²⁹ Josiah sia kumpi ahi laitakin, Egypt kumpipa Neco in Assyria kumpilianpa a hu tu in ngalkaphonpi taw Euphrates ngun ah kuan hi. Kumpipa Josiah in Megiddo ah Egypt ngalkaphonpi khak tu in hanciam a, ama ngal kisimna ah kithat hi.

³⁰ Ama ii uliante in a luang sia siphu leang tungah suan a Jerusalem ah ciapui in, kumpite thaan ah kiphum hi. Judah mite in Josiah ii tapa Joahaz tealin kumpi suaksak hi.

Judah Kumpipa Joahaz

³¹ Joahaz sia Judah kumpi a sua hunin kum 23 pha hi, tuaciang ama in Jerusalem pan tha thum sung uk hi. A nu sia Hamutal hi a, Libnah khuapi pan Jeremiah ii tanu ahi hi.

³² A taanghpupite ii ngamtat zui in ama in Topa tungah maw hi.

³³ Ama ii kumpi maan hun sia Egypt kumpipa Neco in Hamath ngam Riblah ah thong a taaksak ciang bo a, Judah in ngunn kilogramme 3,400 le khamh kilogramme 34 shia in piasak hi.

³⁴ Kumpipa Neco in Josiah ii tapa Eliakim sia Josiah laih tu Judah kumpipa in koi a, a min Jehoiakim ci in khealsak hi. Joahaz sia Kumpipa Neco in Egypt ah ciapui a, tuasung ah thi hi.

Judah Kumpipa Jehoiakim

³⁵ Kumpipa Jehoiakim in a mipite tung pan amate hauna taw kizui in shia sia, Egypt kumpipa ii nget za a cingin a piak zawk natu in a kisamh bangin khon hi.

³⁶ Jehoiakim sia Judah kumpipa a sua hunin ama kum 25 pha hi, tuaciang ama in Jerusalem panin kum sawm le kum khat sung uk hi. A nu sia Zebidah hi a, Rumah khua panin Pedaiah ii tanu hi.

³⁷ A taanghpupite ii ngamtat zui in ama in Topa tungah maw hi.