2 Kumpite 19 - Syin Chin Bible

Kumpipa in Isaiah Thu dongh

¹ Kumpipa Hezekiah in amate ii a puak thu a zaak po ciang he mama in a puansilh eaukeak in, khau-ip puan silhin Topa Biakinnpi sungah tum hi.

² Ama in kumpi inn a keam pa Eliakim, zum lai at pa Shebna le thiampi uhaam pa sia Amoz ii tapa kamsaangpa Isaiah kungah paisak hi. Amate theampo zongh khau-ip puan silh uh hi.

³ Amate ii Isaiah tungah kammal thaak tu a piak sia hi teng hi. “Tuni sia haksatna ih thuak ni hi; ei hong kidaantat a, hong kimaimawlsak hi. Ei sia numei khat nausuak tu kipan ahihang tha mama nei ngawl khat taw ih kibang hi.

⁴ Assyria kumpilianpa in ama ii ulianbel pa a nungta Pathian a selno tu in hong paisak hi. Na Topa Pathian in hi a selnonate za hen a, tuabang a paute daan pia tahen. Tua ahikom Pathian tungah ih mihingte a nungta lai teng atu thu ngen in,” ci uh hi.

⁵ Isaiah in kumpipa Hezekiah ii kamthaak teng a nga ciang,

⁶ ama in, “Topa in nang hong hun thei bo a ci, Assyria te ii pauna te in pautausak heak in.

⁷ Topa in kumpilianpa sia a ngam ah a ciakik natu kamleang khat zasak tu hi, ama tua munah kithat lumsak tu hi, ci in Topa in nang hong son hi,” ci in zo kik hi.

Assyria te in Tawnna Dangkhat Puak

⁸ Assyria ulian pa in kumpilianpa sia Lachish khua nusia in a nai na Libnah khuapi ah ngaldo hi ci in za hi; tua ahikom ama in ama taw kamkum tu in pai hi.

⁹ Egypt te ngalkap honte Ethiopia kumpipa Tirhakah in lampui in amate sim tu hi ci in Assyria te in thu za uh hi. Kumpilianpa in hi thu a zaak ciang ama in Judah te kumpipa Hezekiah tung ah,

¹⁰ “Na muanna Pathian in nang sia kei khut sungah taak ngawl tu ni hi hong ci hi, ahihang tua in nang theamsak heak in.

¹¹ Assyria kumpilianpa khat in ama ii siatsak nop ngam khat pawpo sia bang law ziam na zaaksa hi. Nang suakta thei tu ki um ni ziam?

¹² Ka taanghpupite in khuapite ahi Gozan, Haran le Rezeph te susia a, Telasar a teang Bethedan mite zongh mon hi, amate ii pathiante in hun thei ngawl hi.

¹³ Hamath, Arpad, Sepharvaim, Hena le Ivvah khuapi te ii a kumpipate koi sungah om ziam?” ci in lai khat thak hi.

¹⁴ Tuaciang Hezekiah in kamtaipa tung pan a laithak sia la in sim hi. Tua zawkciang ama Biakinnpi sungah tumin Topa ii ompuina ah laithak sia koi hi,

¹⁵ tuaciang, “Cherubim te ii tungsia na tokhum tungah a to, Topa Israel te ii Pathian awng, nang bekma Pathian na hi hi, leitung kumpi ngam theampo a uk pa na hi hi. Nangma in lei le van na bitphua hi.

¹⁶ Tu in Topa awng, ko tungah thu hong piangte en in. Nang a nungta Pathian hong selnona Sennacherib ii pau teng ngai in.

¹⁷ Topa awng, Assyria te kumpilianpa in ngam tam mama susia a, a leitangte ngamkhing in omsak hi,

¹⁸ tuaciang pathian hi ngawl het a, mihing khut bek taw a kivawt thing le suang milim ahi, a pathian uhte haltham ahi hunlam kote theampo in he khu hi.

¹⁹ Tu in, Topa ka Pathian awng, Assyria te kung panin hong hun ta'n, tuasia ciang leitung ngamte theampo in nang, Topa bek Pathian na hi hunlam hong he tu hi,” ci in thungen uh hi.

Kumpipa tungah Isaiah ii Kamthaak

²⁰ Tua zawkciang Isaiah in Kumpipa Hezekiah tungah kumpipa ii thungetna a zo kikna teng sia

²¹ Topa in, “Sennacherib awng, Jerusalem khuapi in nang hong nuisan hi, hong thusim ngawl hi.

²² Nang in akua thusim ngawl a, akua selno in kingaisun ni ziam? Nang in kei, Israel ii a thiangtho Pathian nong zatak vawt bua hi.

²³ Na siphu ngalleangte taw Lebanon mualsaangbel te na zawthalna thu kisuangtaak tu in kei kungah na kamtai te nong paisak hi. Nangma in cedar thingkung saangbelte le cypress thing phabelte ka phuktan a, dui thuk belna mun ka theng hi ci in na kisuangtaak hi.

²⁴ Ngamdang ah tuikhuk to in tui ka dawn hi na ci a, na ngalkapte in Nile ngun tuanh in kosak hi ci in na kisuangtaak hi.

²⁵ “Hi teng sia khuangeipi lai in ka ngeal sa ahi hunlam za ngeingawl ni ziam? Tuciangin tuasia taaksua zo khi hi. Kulh taw a ki uum khuapite niinthuk kikholte suaksak tu in thahatna kong pia hi.

²⁶ Tua munah a teang mihingte sia thahatna nei ngawl hi; amate lau in khing liang uh hi. Amate sia lo sungah lopate ahibuale nisuana pan vuisa ii seam keak innkhum tungah a po lopate taw kibang hi.

²⁷ “Ahihang nang huvau theampo, bang vawt a koi sungah pai, ci in kong he hi. Kei hong langpanin na kitom ngawp kong he hi.

²⁸ Tua na kitomna thu le na kiphatsakna hong kikona te ka za hi, tu in na naak pailet in thikkoai kong thaak tu a, na kam sungah kamkhau kong khii tu hi, nong paina lampi sia ma tawnin kong leekai kik tu hi,” a ci teng sonsak hi.

²⁹ Tua zawkciang Isaiah in Kumpipa Hezekiah munah, “Hong piang tu thu ii lim sia hisia hi. Tu kum le mai ciangin ngamh ante bek na ne tu uh hi, ahizong a kum kik ciang na ciin sa uh ante na at tu a, na suan sa uh sapitngate na ne tu hi.

³⁰ Judah ngam ah a luhai lai teng sia thingno bangin khang tu a, lei ah zung thuk tha in, a nga bangin nopci tu hi.

³¹ Jerusalem ah mite om tu a, Zion Mual ah a luhai in om tu hi, banghang ziam cile Topa in hisia a pian natu khensat hi.

³² “Assyria kumpilianpa huvau Topa ii ci sia hisia hi: ‘Ama in hi khuapi sungah tum ngawl tu a, thaltang khat zongh hi khuapi ngatin kap ngawl tu hi. Lum toai ngalkap khat zongh in hi khuapi hong neak ngawl tu a, tuaciang a uumci natu in a kiim ah leivum khat zongh kivawt ngawl tu hi.

³³ Ama hi khuapi sungah tum ngawlin hong paina lampi ma tawnin heak kik tu hi, Keima, Topa pau zo khi hi.

³⁴ Keima vaang atu le ka naseampa David tungah ka kamciamna hangin hi khuapi sia dal in hung tu khi hi’ ” ci hi.

³⁵ Tua zanin Topa vantunglalang khat Assyria te ngiaphual ah pai in ngalkap 185,000 thatlum hi. A zingsang khuavak ciang amate a thisa in tua munah liik siat hi!

³⁶ Tua zawkciang Assyria kumpilianpa Sennacherib nungkin in Nineveh khua ah heak kik hi.

³⁷ Ni khat ni in ama in a pathian Nisroch ii biakinn sungah ama bia in a om laitak a tapate nii, Adrammelech le Sharezer te in a namsau uh taw thatlum hi, tuaciang amate Ararat ngam ah tai in suakta uh hi. A tapa dangkhat Esarhaddon in a za laih a kumpilianpa suak hi.