2 Kumpite 18 - Syin Chin Bible

Judah Kumpipa Hezekiah

¹ Israel ah Elah ii tapa Hoshea ii maan zawk a kum thum kum Ahaz ii tapa Hezekiah sia

² ama kum 25 a phak laitakin Judah te ii Kumpipa suak a, Jerusalem panin kum 29 sung uk hi. A nu sia Zechariah tanu Abijah hi.

³ A taanghpupi David ii ngamtatna zui in ama in Topa ii diksak tu in ngamta hi.

⁴ Ama in doai biate ii biakpiakna munte sutham hi, suangkhuamte sutan in, tuaciang numeipathian Asherah limte zongh sattan siat hi. Moses ii vawt taau ngul, Nehushtan a kici sia zongh sutham hi. Tua hun dong sia Israel mite in tua taaungul upat vawtna in ngimnamtui hal uh hi.

⁵ Hezekiah in Topa Israel te ii Pathian muang hi; Judah mite in ama ii hun ma hikale ama ii hun zawkciang hikale ama taw a kibang kumpipa nei ngeingawl uh hi.

⁶ Ama in Topa tungah thumaan in, bangma hunin a thu ni ngawlin a om ngei bua hi, Topa ii Moses tungah a piak thupiakna te phinciing takin keamcing hi.

⁷ Tua ahikom Topa sia ama taw omkhawm a, tuaciangin ama sia a sep a vawt theampo ah zawna nga hi. Ama in Assyria te ii kumpilianpa langpanin leedo a ama khutnuai ah tum nuam ngawl hi.

⁸ Ama in Philistine te zo in, Gaza le a kiim a paam ngamte kihel amate ii teenna khuanobel te pan kipan khuapi lianbel te dong kuanin sim hi.

⁹ Hezekiah ii a maan zawk a kum li kum ciang — tuasia Israel te tungah kumpipa Hoshea ii maan zawk a kum sali kum hi a — Assyria te ii Kumpilianpa Shalmaneser in Israel simin Samaria uumci hi.

¹⁰ A uumci zawk a kum thum kum ciangin Samaria khua bo a; Hezekiah ii maan zawk a kum lukna hi a, Hoshea ii maan zawk a kum kua kum ahi hi.

¹¹ Assyria te ii kumpilianpa in Israel te thongtaak tu in paipui a, pawlkhat sia Halah khuapi sungah, pawlkhat Gozan ngamkhen sung Habor Ngun hui ah, pawlkhat sia Media te khuapite ah teangsak hi.

¹² Samaria khua bo hi, banghang ziam cile Israel in Topa a Pathian ii thu ni ngawl hi, tua banah amate taw thuciam a vawt te zongh paltan uh a, Topa naseampa Moses ii thukham a piakte theampo zongh ni ngawl uh hi. Amate in za nuam ngawl a, ni nuam ngawl uh hi.

Assyria te in Jerusalem Tawng

¹³ Kumpipa Hezekiah ii a maan zawk a kum sawm le kum li ciangin, Assyria te ii kumpilianpa Sennacherib in Judah te ii kulh taw a ki uum khuapite simin zo hi.

¹⁴ Hezekiah in Lachish a om Sennacherib tungah, “Keima in seam khial zo khi hi; nong hesuakna in hong sim nawn heak in, nong nget pawpo kong pia tu hi,” ci in kamthaak hi. Kumpilianpa in zo kik a, Hezekiah in ngunn kilogramme 10,000 le khamh kilogramme tulkhat ama a puak tu in sawl hi.

¹⁵ Hezekiah in Biakinnpi sung le kumpi inn sumkholna sungah ngunn teng thaak hi,

¹⁶ ama in Biakinnpi kongbiang khuamte tung pan khamhte zongh khokin, tuaciang ama mama ii kongbiang khuamte a tuamna khamhte la in Sennacherib thaak siat hi.

¹⁷ Assyria kumpilianpa in ngalkaphon lian khat Jerusalem ah Hezekiah sim tu in paisak hi; tua ngalkaphonpi sia ama ii uliante a za lianbel thum teng in uksak hi. Amate Jerusalem a thet uh ciangin, amate in tuili tungnung sia pan tui hong luanna hawkluam sia ii hui ah a om puantak naseamte ii omna lampi sia lua uh hi.

¹⁸ Tuaciang amate in Hezekiah samsak uh hi, tuaciang ama ii uliante thum in amate taw kisi tu in pai uh hi: tuate sia kumpi inn a keam pa Hilkiah ii tapa Eliakim, zum lai atpa Shebna; le thu tepteena teng a uk Asaph ii tapa Joah ahi uh hi.

¹⁹ Assyria uliante khat in, kumpipa Hezekiah sia a bang teng in hi zata in ngammuangsak thei ziam ci sia kumpilianpa in he nuam hi, ci in son hi.

²⁰ Ama in, “Ngalkap lam sang thiamna le hatna te sia kam le muk taw kizo thei hi ci in um nu ziam? Assyria te nong leedo uh sia akua in hong hu tu in um nu ziam?

²¹ Egypt te in no hong hu tu in um nu hi, ahihang tua ngaisutna sia pumpa kung ciangkhut in zak taw kibang tu hi — hong tal tu a, na khut uh hong sun tu hi. Egypt kumpipa sia ama a suang pawpo atu tuasia taw kibang hi,” ci hi.

²² Assyria ulianpa in, “Tua ahibuale zong noma in na Topa Pathian uh suang nu ziam? Topa ii biakpiakna bukte le biaknataute a sutham sia Hezekiah hi, ama in Judah mite tungah Jerusalem biaknatau bekma ah biakpiakna vawt thei tu nu hi, ci in thupia hi.

²³ Kumpilianpa min taw thukimna khat no taw ka vawt tu hi. A tungah a to tu mihing tuaza in a tam na mu zo uh le siphu tulnii hong pia tu khi hi.

²⁴ No sia Assyria te sung pan a za nobel sia taw zong kitee ngat thei ngawl lai nu hi, hi napi Egypt te in siphu ngalleang le siphu ngalkapte puak tu in na muangmaw uh hi!

²⁵ Topa ii hong huna kihel ngawlin na ngam uh sim tu in hong um nu ziam? Topa ama mama in simin susia in ci in kei hong sawl hi,” ci hi.

²⁶ Tuasia ciang Eliakim, Shebna le Joah in ulian pa munah, “Aramaic kam in hong pau ta'n, topa awng, tua kam tel khu hi. Hebrew kam in hong pau heak vun, luphung tungah a to mite theampo in hong ngai hi,” ci hi.

²⁷ Ama in zo kik a, “Kumpilianpa in hite theampo sia no le na kumpipa zaak tu bek in son a hong sawl sa nu ziam? Hi ngawl hi, noma bang keakin, a eak uh ne a, a zun uh a dawn tu, luphung tungah a to te ii zaak tu in ka pau ahi hi,” ci hi.

²⁸ Tua zawkciang ulian pa hong dingto in Hebrew kam in hong au hi, “Assyria kumpilianpa ii hong son teng ngai vun!

²⁹ Ama in Hezekiah ii hong theam ngawl natu kidopna hong pia hi. Hezekiah in no hong hun zo ngawl tu hi.

³⁰ Tuaciang Topa a suang tu in ama in zolsak zo heak vun. Topa in no hong hun tu in um heak vun, tuaciang Assyrian ngalkapte ii na khuapi hong lak tu hong khak zo tu um nu ziam?

³¹ Hezekiah ii thu son ngai heak vun. Assyria te kumpilianpa in, khuapi panin hong pusuak tavun a hong tum tavun ci in thu hong pia hi. Noma sapitkungte panin sapitte hong kinesak tu a, na thingkung uhte panin thei ngate hong kinesak tu hi, tuaciang na tuikhuk uh pan tui hong kidawnsak tu hi —

³² tua teng sia kumpilianpa ii note teen kik natu ngam hong piak dong hi tu a, tua ngam sia noma ngam taw ma kibang tu hi, sapittui na neak natu uh sapithuan om a, anluum vawt natu antang om tu hi: tua ngam sia olive kung le olive thau, le khuaitui omna ngam hi. Ama ii hong thupiak bangin na ngamta uh le na thi buatu uh a, na nungta tu uh hi. Topa in note hong suatak tu hi ci in Hezekiah in theamsak heak vun.

³³ Ngamdangte ii pathiante in zongh a ngam uh sia Assyria kumpilianpa ii khut sung pan hunkhia ngei na ziam?

³⁴ Amate tu in koisungah om ziam? Hamath le Arpad ii pathiante, koisungah om ziam? Sepharvaim, Hena, le Ivvah te ii pathiante koisungah om ziam? Samaria akua in hun ngei ziam?

³⁵ Ko ii kumpilianpa khut sung pan hi pathiante khat pawpo in hi ngamte hun ngei ka na ziam? Tua ahile Topa in Jerusalem hun thei tu hi ci in bang in hong ngaisunsak ziam?” ci hi.

³⁶ Mihingte sia kumpipa Hezekiah ii sawl bangma in dai khipkhep in om uh a; amate in kam khat zongh pau ngawl uh hi.

³⁷ Tuaciangin Eliakim Shebna le Joah te in heena taw a puansilh uh baltham uh a, tuaciangin Assyria ulian pa ii pauna teng kumpipa munah son uh hi.