2 Kumpite 17 - Syin Chin Bible

Israel Kumpipa Hoshea

¹ Judah ah kumpipa Ahaz a maan zawk a kum sawm le kum nii kumin Elah ii tapa Hoshea sia Israel te kumpipa suak a, ama in Samaria pan kum kua sung uk hi.

² Ama in Topa tungah maw a, ahizong ama mai ah Israel a uk kumpipa dangte za in maw ngawl hi.

³ Assyria kumpilianpa Shalmaneser in ama tungah ngal phuang hi; Hoshea in Shalmaneser tungah tum in, kum simin shia pia hi.

⁴ Ahihang Hoshea in kum khat ciang, Egypt kumpipa So tungah hu ngen tu in kamtai paisak hi, tuaciang Assyria te tungah shia a piak sia tawp hi. Shalmaneser in hi thu a heak ciang Hoshea mansak in thong sungah khum hi.

Samaria khua Bona

⁵ Tua zawkciang Shalmaneser in Israel simin Samaria uumci hi. A uumci zawk a kum thum kum,

⁶ Hoshea ii maan zawk a kum kua a phak kumin Assyria te ii kumpilianpa in Samaria suan hi, Israel te thongtaak tu in ciapui a, tuate sung pan pawlkhat sia Halah khuapi ah, pawlkhat sia Gozan ngamkhen sung Habor Ngun hui ah, tuaciang pawlkhat sia Media te khuapite ah teangsak hi.

⁷ Samaria khua bona sia Egypt ngam panin amate a pusua pui, Egypt kumpipa khut sung pan a hunkhia Topa a Pathian tungah a maw uh hang ahi hi. Amate in pathian dangte bia uh a,

⁸ a mite ii a mainawt ciang Topa ii a nawkeak mite ii ngeina te zui pui in, Israel kumpipate ii a piansak tawm ngeinate zuisak uh hi.

⁹ Israel te in Topa a Pathian ii thukimpui ngawl nate seam uh hi. Amate in doai biate ii biakna munte khua theampo, khuanobel pan khuapi lianbel dongah sa uh hi.

¹⁰ Mualtung theampo le thinglim nuai sim ah, Asherah numeipathian ii milim le suangkhuamte phut uh hi,

¹¹ tuaciang, Topa ii a ngam pan a betkeak mihingte ii ngamtatna zui in amate in ngimnamtuite doai biate tau tungah hal uh hi. Amate in Topa thin uuk natu in amate ii ngitlo ngamtatna te taw piangsak a,

¹² milim biak ngawl natu Topa ii thupiakte ni ngawl uh hi.

¹³ Topa in a kamtai te le a kamsaangte paisakin Israel le Judah te a kidop natu in sawl a: “Na ngamtat siatna uhte nusia vun a, na taanghpupite uh ka piak Thukhamte sungah a om, ka naseam ka kamsaangte tungtawnin no tungah kong piak kong sawlna te ni vun,” ci hi.

¹⁴ Ahihang amate in a thu ni ngawl uh hi; Topa a muang ngawl a taanghpupite uh bangma in thinpui uh hi.

¹⁵ Ama ii hilnate nit tu nial hi, a taanghpupite taw thuciamna a vawtte zongh keam ngawl uh a, kidop natu a piakte zongh thu in sim ngawl uh hi. Amate in a mannung ngawl milimte bia uh a, amate mama zongh a mannung ngawl suak uh hi, amate in a kiim a paam ah mite ii ngeinate zui uh a, Topa ii zui heak vun ci in a thupiakna sia ni ngawl uh hi.

¹⁶ Topa a Pathian ii thukham theampo amate in paltan uh a, amate in thik taw a kivawt khuital nii ii lim a biak tu in vawt uh hi; amate in Asherah numeipathian ii milim zongh vawt a, aksite bia in, Baal pathian ii naseam uh hi.

¹⁷ Amate in a tapa a tanute doai biate ii pathiante tungah meihal biakpiakna in pia uh hi; amate in thaa sam theite le aisaan theite thu dongh uh hi, tuaciang amate in Topa ii muna ah a maan ngawlte vawt tu in kipum aap uh a, Topa thin uukna piangsak hi.

¹⁸ Topa sia Israel tungah thin uuk ahikom ama ii mu na pan bengkeak a, Judah kumpi ngam bek khe hi.

¹⁹ Ahihang Judah mite ngawngawn in zongh Topa a Pathian ii thukhamte ni ngawl uh a; Israel te ii ngeina a zak uhte zui uh hi.

²⁰ Topa in Israel te nial in, daan pia a, a ngilo ngalte khut sungah aap hi, a khakbel ciang ama ii muna pan bengkeak hi.

²¹ Topa in Israel le Judah a khen zawkciang Israel te in Nebat ii tapa Jeroboam sia kumpi suaksak uh hi. Jeroboam in Israel te a Topa taisansak in a kiitakhuai mama mawna sungah then hi.

²² Amate in Jeroboam zui in ama ii mawna a vawt theampo vawt paisuak uh a,

²³ a naseam kamsaangte tungah Topa ii ka vawt tu hi ci in a kidop natu a sonkhol bangin a khakbel ciang ama ii mu na pan betkeakna a thuak uh dong amate in mawna vawt uh hi. Tua ahikom Israel mite sia Assyria ah sal in kiciapui a, tu ni dong tua munah teang lai uh hi.

Assyria te Israel Ngam sungah Teang

²⁴ Assyria kumpilianpa in Babylon, Cuth, Ivvah, Hamath le Sepharvaim khuapite pan mihingte paipui in, saltaang Israel te ii teenna mun Samaria te khuapite ah teangsak hi. Hi khuapite, amate ii neisa sua in tua munah teang uh hi.

²⁵ Amate tua munah a ten phit sawngin Topa bia ngawl uh ahikom Topa in tawpi te puakin, amate pawlkhat thatlumsak hi.

²⁶ Assyria te ii kumpilianpa munah, Samaria khuapite ah mihing a teensakte in tua ngam ii pathian thukhamte he ngawl ahikom a pathian in tawpi puakin thatsak hi, ci in son hi.

²⁷ Tua ahikom kumpilianpa in: “Thiampi ih ciapui thongtaak te sung pan khat puak kik vun a; a ngam ii pathianzia a mite tungah a hil tu in tua munah cia kik in teangsak vun,” ci in thupia hi.

²⁸ Tua ahikom Samaria pan a kihawlkhia Israel thiampi khat sia pai in, Bethel ah teang a, tua mun pan Topa bangbangin bia tu ci in a mihingte hil hi.

²⁹ Ahihang Samaria ah a teang mite in amate ii milim tek ma vawt suak uh a, Israel te ii vawt sa biakpiakna buk sungah koi uh hi. A kibang ngawl pawl tuatuam sim in amate ii teenna khuapite ah a milimte vawt tek uh hi;

³⁰ Babylon mite in Succoth Benoth pathian ii milimte vawt a; Cuth mite in Nergal pathian milimte; Hamath mite in Ashima milimte;

³¹ Ivvah mite in Nibhaz le Tartak milimte; tuaciang Sepharvaim mite in a pathian uh Adrammelech le Anammelech tungah meihal biakpiakna in a tate pia uh hi.

³² Hi mite in Topa zongh bia uh hi, tuaciang doai biate ii biakna munte sangaw biakpiakna munte ah thiampi seam tu le amate taangin sangaw biakpiakna a pia tu in amate sung pan mi tuatuamte teal uh hi.

³³ Tuabangin amate in Topa bia uh a, ahihang amate hong paina a ngamte ii ngeinate bangma in amate tek ii pathiante zongh bia uh hi.

³⁴ Amate in a ngeina luite tu ni dongin zom suak lai uh hi. Amate in Topa bia ngawl a, Israel ci in min a piak Jacob ii suan le paalte tung a piak thukham le thupiaknate zongh ni ngawl uh hi.

³⁵ Topa in amate taw thuciamna vawt in, “A dang pathiante bia ngawl tu nu hi; tuate mai ah kun ngawl tu nu hi tuaciang a na seam ngawl tu nu hi, tua ahibuale zong sangaw biakpiakna pia ngawl tu nu hi.

³⁶ No te Egypt ngam pan vaangletna le thahatna taw hong pusuapui keima Topa ii thu hong ni tu nu hi, note kei mai ah hong kun tu nu hi, tuaciang sangaw biakna zongh hong pia tu nu hi.

³⁷ Note a tu ka at thukhamte le thupiakte a tawntungin ni tu nu hi. A dang pathiante bia ngawl tu nu hi,

³⁸ tuaciang no taw thuciam ka vawtte mangil ngawl tu nu hi.

³⁹ Keima Topa, na Pathian ii thu nong ni tu uh a, tuasia ciang, na ngalte kung pan kong suatak tu hi,” ci in thupia hi,

⁴⁰ Ahihang tua mite in ngai ngawl uh a, amate ii ngeina luite ma zui veve uh hi.

⁴¹ Tua hi a, tua mite in Topa bia uh hi, ahihang amate ii a milimte zongh bia uh hi; tuni dong ma in a suan a paalte in tuabangin ngamta lai uh hi.