2 Kumpite 16 - Syin Chin Bible

Judah Kumpipa Ahaz

¹ Remaliah ii tapa Israel te ii kumpipa Pekah ii maan zawk kum sawm le kum sali kum in Jotham ii tapa Ahaz sia Judah te kumpipa suak hi,

² ama kum kul pha a, Jerusalem panin kum sawm le kum luk sung uk hi. Ama in a taanghpupi David ii ngamtatna phate zui ngawl a; Topa Pathian ii diksak ngawlte vawt zaw hi,

³ tuaciang ama in Israel kumpipate ii ngamtatna te veu zui hi. Ama in, Israel mite hong mainawt uh lai in, Topa ii a ngamsung pan a nawkeakte ii a thasiathuai ngamtatnate zui a, a tapa ngawngawn milim biakna meihal biakpiakna in nei hi.

⁴ Doai biate ii biakna mun, mualte ii tung, le thinglim nuai sim ah, Ahaz in sangaw biakpiakna le ngimnamtui halnate piakhia hi.

⁵ Syria te kumpipa Rezin le Israel kumpipa Pekah in Jerusalem sim a, uumci ahihang Ahaz sia zo zo ngawl uh hi.

⁶ (Tua hun sung ma in Edom te kumpipa in Elath khuapi la kik a, Judah mi tua munah a teangte notkeak hi. Edom te Elath a teang a, teang top lai uh hi.)

⁷ Ahaz in Assyria te ii kumpilianpa Tiglath Pileser munah kamtaite paisak a: “Keima in a thumaan na naseampa khi hi. Hong pai ta'n a, Syria le Israel kumpipate khut sung pan hong hun khia ta'n, amate in kei hong sim hi.” cisak hi.

⁸ Ahaz in ngunn le khamhte Biakinn pan le kumpi inn sung sum kholna pan la in, kumpilianpa tungah letsong in thaak hi.

⁹ Ahaz ii maangkaa na a zona in Tiglath Pileser in a ngalkap hon taw Damascus ah kuan in, tua khuapi suan a, kumpipa Rezin thatlum in a mite sia thongtaak tu in Kir khua ah paipui hi.

¹⁰ Kumpipa Ahaz in Damascus ah Kumpilianpa Tiglath Pileser taw kimu tu in a pai ciang, tua munah a om biaknatau sia mu hi, ama in tua biaknatau ii lim sia kheet nei ngawlin a kicing tatakin suai a, Uriah thiampipa thaak kik hi.

¹¹ Tua ahikom Uriah in biaknatau tuasia taw a kibang linlian khat vawtsak a, Ahaz hong heak kik ma in man hi.

¹² Damascus pan hong cia kik ciang Ahaz in biaknatau sia a kiman sa in mu hi,

¹³ tua ahikom ama in nganhingte taw sangaw biakpiakna le antang biakpiakna tua biaknatau tungah vawt a, tuaciang sapittui biakna le kipawlkhop biakpiakna chi te bungh suk hi.

¹⁴ Taau taw kivawt biaknatau Topa tungah a ki aapsa sia biaknatau thak le Biakinnpi kilaklaw ah koi uh a, tua ahikom Ahaz in biaknatau thak sia ii saksang ah khiin hi.

¹⁵ Tua zawkciang ama in Uriah munah, “Hi keima aa ahi biaknatau lian sia zingsang meihal biakpiakna le nitak antang biakpiakna, kumpipa le a mipite meihal biakpiakna le antang biakpiak natu le mipite ii sapittui biakpiak natu in zangh in. Nganhing sangaw biakpiakna a kizangh theampo ii chi sia a tungah sung in. Ahihang taau biaknatau sia keima ii aisaanna ah ka zak tu in na koi in,” ci in thupia hi.

¹⁶ Uriah in kumpipa thupiak bangin seam hi.

¹⁷ Kumpipa Ahaz in Biakinnpi sungah a kizangh taau leang sia a tuamin la a, tua tungah a om kuangpuite heam hi; ama in taau khuital sawm le nii te nungzaang pan taau tuikuangte zongh la in suangtum doppha tungah koi hi.

¹⁸ Assyria te kumpilianpa a lungkimsak natu in Ahaz in Biakinnpi sung pan kumpi tokhum koina dawtuam sia heamkhia in, kumpipa ii Biakinnpi sung aituam tumna bangkua zongh khakbil hi.

¹⁹ Ahaz Kumpipa ii a sep a vawt dangte theampo sia Judah Kumpipate Taanghthu sungah kikhum siat hi.

²⁰ Ahaz thi a, David Khuapi sung kumpi thaan ah kiphumin, a tapa Hezekiah in a kumpi za laih hi.