2 Kumpite 1 - Syin Chin Bible

Elijah le Kumpipa Ahaziah

¹ Israel kumpipa Ahab thi zawkciang Moab ngam in Israel langpanin leedo hi.

² Israel kumpipa Ahaziah sia ama ii Samaria kumpi inn tung dawl thaam tung panin taak a, nasia takin liam hi. Tua ahikom ama in Philistine khuapi Ekron ah kamtai paisak a, a dam kik tu le a dam nawn ngawl tu Philistine te pathian Baalzebub donghsak hi.

³ Ahihang Topa ii vantunglalang khat in Tishbe pan kamsaang Elijah sia Kumpipa Ahaziah ii kamtaite taw kisi tu in paisak a, “Banghangin Ekron pathian Baalzebub tungah thu dongh tu nu ziam?

⁴ Israel ngam ah pathian om ngawl hi ci in na ngaisut uh hang ziam ci in amate donghsak hi. Topa in, ‘Na liamna pan dam kik ngawl tu ni hi; thi tu ni hi hong ci hi!’ ci in kumpipa tungah son in,” ci hi. Elijah in Topa thupiak bangin ngamta a,

⁵ tuaciang kamtaite kumpipa kungah heak kik uh hi. “Banghangin hong heak kik nu ziam?” ci in ama in dongh hi.

⁶ Amate in, “Pasal khat taw ka kisik uh ciang, ama in heak kik in hong sawl a, Topa ii nang tungah, ‘Banghangin Ekron pathian Baalzebub kungah thu dongh tu in kamtaite paisak ni ziam? Israel ngam ah pathian om ngawl hi, ci in ngaisun ni ziam? Na liamna pan dam kik ngawl tu ni hi, thi tu ni hi!’ ” hong ci teng sonin hong sawl hi.

⁷ Kumpipa in, “Pasal pa ii pianzia bangbang ahi ziam?” ci in dongh hi.

⁸ “Ama in nganhing phaw taw a kivawt puantual khat silh a, tuaciang savun kawngkhau taw sawm hi,” ci in amate in zo hi. “Ama Elijah hi!” kumpi pa in ci hi.

⁹ Tua zawkciang ama in ulian khat le pasal 50 sia Elijah sam tu in paisak hi. A ulian pa in ama mualtung khat ah to in mu a, ama munah, “Pathian ii mipa awng, kumpipa in nong paisuk natu thu hong pia hi,” ci hi.

¹⁰ Elijah in, “Kei Pathian ii mi ka hi le van panin meikuang hong paisuk tahen a, nang le na mite hong thatlum tahen!” ci in zo hi. Thakhat thu in meikuang hong pai suk a, ulian pa le a mite thatlum siat hi.

¹¹ Kumpipa in ulian dang khat le pasal sawmnga sawl kik a, amate paito in, Elijah munah, “Pathian ii mipa awng, kumpipa in thakhatin nong paisuk natu thu hong pia hi!” ci hi.

¹² “Kei, Pathian ii mi ka hile, vantung panin meikuang hong paisuk tahen a, nang le na mite hong thatlum tahen,” ci in Elijah in zo hi. Thakhat thu in Pathian ii meikuang hong paisuk a ulian pa le a mite thatlum hi.

¹³ Khatvei ma kumpipa in ulian khat le mihing sawmnga sawl hi. Ama mual tungah kaato in, Elijah mai ah khupdinin, “Pathian ii mipa awng, kei le ka mite hong hesuak ta'n. Ka nuntakna uh hong khoaikhe ta'n!

¹⁴ Ulian dangte nii le a mite sia vantung pan meikuang in thatlum siat hi; ahizong kei ka hile hong hesuak ta'n!” ci hi.

¹⁵ Topa ii vantunglalang in Elijah munah, “Ama taw paisuk ta'n a, lau heak in,” ci hi. Tua ahikom Elijah sia ulianpa taw kumpipa kungah pai in,

¹⁶ ama munah, “Topa in hi bangin ci hi: ‘Israel ngam ah thudok tu pathian om ngawl bang keak in — Ekron te ii pathian Baalzebub kungah kamtaite paisak na hikom — nang dam kik ngawl tu ni hi; thi tu ni hi!’ ” ci in son hi.

¹⁷ Topa ii Elijah tungtawnin a son bangma Ahaziah thi hi. Ahaziah in tapa nei ngawl hi, tua ahikom a suapuipa Joram in a kumpiza laih a, tua laitak sia Judah kumpipa, Jehoshaphat ii tapa Jehoram ii maan zawk a kum niina ahi hi.

¹⁸ Kumpipa Ahaziah ii sep le vawt dang theampo sia Israel Kumpite Taanghthu sungah kikhum hi.