2 Khangtaanghthu 6 - Syin Chin Bible

Mipite tungah Solomon Thusonna

¹ Tuasia ciang Solomon kumpipa thungen a, “Topa awng meei sung le khuazing sungah teen tu na teal hi.

² A tawntungin na teen natu mun ahi, tu in, a tuanngen biakinn khat kong saksak zo hi,” ci hi.

³ Tua munah Israel mipite theampo ding uh hi. Kumpipa in amate sang maingatin amate atu Pathian thupha ngetsak hi.

⁴ Ama in “Israel Topa Pathian pok vun! Ama in ka pa David tungah a kamciam keamcing a, ama in ka pa tungah,

⁵ ‘Egypt pan ka mite ka pusua pui hun pan kipan tu dong Israel ngam sungah keima hong kibiak natu mun biakinn khat sak natu in khuapi khat pawpo ka teal bua a, Israel ka mite lampui tu in khat pawpo zongh ka teal bua hi.

⁶ Ahihang tu in keima nong biak natu mun Jerusalem ka teal zo a, ka mite uk tu in nangma David kong teal zo hi.’ ci hi.”

⁷ Solomon in, “Ka pa David in Israel te ii Topa Pathian biak natu in biakinn khat sak tu ngeal hi,

⁸ ahihang Topa in ama tungah, ‘Kei atu biakinn khat na sak nop sia maan hi,

⁹ ahizong nangma in na sa ngei buatu hi. Ka biakinn sa tu sia na tapa, nangma ii tapa tatak hi,’ ci lai hi.

¹⁰ “Tu in Topa in a kamciam taangtungsak zo hi: keima in ka pa ii Israel kumpi za ka laih zo a, Israel Topa Pathian biak natu in biakinn khat ka sa zo hi.

¹¹ Topa in Israel mite taw a vawt thuciamna tepteena suangpheakte omna Thuciamna Thingkuang sia Biakinnpi sungah ka koi zo hi.”

Solomon ii Thungetna

¹² Tua zawkciang mihonte omna biaknatau mai ah Solomon pai in ding a, a khutte laamin thungen hi. (

¹³ Solomon in dawtuam khat taau taw vawtin leitual laizang ah koi hi. Tua kingli nei dawtuam sia king khat metre 2.2 veu zai in, metre 1.3 saang hi. Ama in hi dawtuam tungah kaato in mi sim ii mu theina munah khupdin in a khutte vantung sangah laamto hi.)

¹⁴ Ama in, “Israel ii Topa Pathian awng, vantung le leitung theampo ah nangma taw a kibang pathian dang om ngawl hi. Na mite taw na thuciamna na kholet a, tuaciang a thin tatak taw na thu hong ni in a nuntak ciang na itna amate tungah na lak hi.

¹⁵ Ka pa David tungah na kamciamte na kholet hi; tu ni in kammalte theampo taangtung zo hi.

¹⁶ Tu in Israel Topa Pathian awng, ama ii na Thukham hong zui bangin amate in kidopna taw zui pole, na suan na paalte sung pan khat in Israel kumpi in maang tawntung tu hi ci a, ka pa tungah kamciam na vawt dang khat sia zongh nong taangtutsak natu thu kong ngen hi.

¹⁷ Tua ahikom tu in Israel ii Topa Pathian awng, na naseampa David tungah kamciam na piakte theampo taangtungsak in.

¹⁸ “Ahihang, Oh Pathian awng, nang leitung mihingte sungah teang thei takpi tu ni ziam? Vantung theampo zongh nang hong huam tu in lian tham ngawl hi, tua ahikom hi Biakinnpi keima sak sia lian khom thei tu ziam?

¹⁹ Topa ka Pathian awng, keima na naseampa khi hi. Ka thungetna hong ngai ta'n. Kong ngetnate hong pia ta'n.

²⁰ Hi Biakinnpi a sun a zanin na cing in. Hisia nang hong kibiak natu mun hi ci in nong kamciamsa hi, tua ahiciang hi Biakinnpi sang nga in thu kong nget ciangin hong za ta'n.

²¹ Kei ii thungetnate le na Israel mite ii hi mun maingat in a thungetnate hong za ta'n. Vantung na inn sung panin hong za ta'n a, ko hong maisak ta'n.

²² “Mihing khat sia midang khat tungah khial hi ci a kimawsiat in, a maw ngawl hunlam a kiciam tu in hi Biakinnpi sung na biaknatau ah a kipaipui ciang,

²³ Oh Topa, vantung panin na ngai in a, na naseamte tungah thu khen in. A maw sia tungah a kiphu bangin daan pia in, a maw ngawl sia suaktasak in.

²⁴ “Na Israel mite sia nangma tungah hong khial hu in a ngalte in zo a, tuasia ciang nang sang hong heak in, hi Biakinnpi ah pai a, amate kiniamkhiakin maw maisak natu in thu hong ngen le,

²⁵ vantung panin na ngai in. Na mite ii mawna khialnate maisak in a, tuaciang amate le a taanghpupite tungah na piaksa ngam le lei ah na paipui kik in.

²⁶ Na mite nang tungah hong maw hu in nguatui na hansak ciang le, amate kisiik in hi Biakinnpi sang nga in kiniamkhiakin thu hong nget ciang,

²⁷ Oh, Topa awng, vantung panin ngai in a, na naseamte le Israel mite ii mawna khialnate na maisak in, tuaciang a maan a sep natu amate na hil in. Tuaciang Oh Topa, na mite ii a tawntung a neisa tu in na piak hi na leitang tungah nguatui puak in.

²⁸ “Ngam sungah kialpi, ahibuale natsia a tung ahizong, ankungte vuisa ahibuale khaumaw hon in a lalsak ciang ahizong, na mite a ngalte in a sim ciang ahizong, amate sungah natna satna a om ciang ahizong,

²⁹ amate ii thungetna na ngai in. Israel na mite khat pawpo in a thin hee lawlawm man po in, hi Biakinnpi sangah a khut uh zan in thu hong ngen le,

³⁰ amate ii thungetna na za in. Vantung na inn sung panin amate na ngai in a, na maisak in. Nangma bekma in mihingte thinsung ngaisutnate he ni hi. mi simin ama taw a kiphu bangin a tungah na vawt in,

³¹ tuasia ciangin koma taanghpupite tungah na piaksa ngam sungah a teen hun sung theampo amate in nangma hong zakta in na thu hong ni tu hi.

³² “A khuala a teang ngamdangmite in na letna, na vaang neina le a seam tu a tawntung na kinginnate za a, hi Biakinnpi ah hong pai in thu hong nget ciang,

³³ amate thungetnate na ngai in. Vantung na teenna mun pan na za in a, vawtsak tu in hong nget teng na vawtsak in, tua hile leitung mite theampo te in Israel na mite ii hong heak bangin hong he thei in, na thu hong ni tu uh hi. Tuasia ciang amate in hi Biakinnpi nang atu ka sak sia nangma biak natu mun ahi hunlam he tu uh hi.

³⁴ “A ngalte taw kido tu in na mite kuanin na sawl a, amate in nang tungah thu hong nget ciang, koisung po ah a om zong na tealsa hi khuapi le nang atu ka sak hi Biakinnpi sang hong nga in thu hong ngen le,

³⁵ amate ii thungetnate na ngai in. Vantung panin na za in a, amate zawna na pia in.

³⁶ “Na mite in mawna hong vawt ciang — a maw ngawl kuama om ngawl ahiciang — na thin uukin a ngalte in zosak a, ngamdang ah thongtaak tu in a paipui ciangin tua ngam sia a khuala ta zong,

³⁷ na mite ii thungetnate ngai in. Tua ngam pan amate kisiik kikin a mawna le a seksolna pualaak in thu hong ngen le, amate thungetnate na ngai in, Oh ka Topa awng.

³⁸ Tua ngam ah amate in thintak le a maan takin kisiik in, ka taanghpupite tungah na piak hi ngam, na tealsa hi khuapi, nang atu ka sak hi Biakinnpi maingat in thu hong ngen le,

³⁹ tuasia ciang amate ii thungetnate na ngai in. Vantung na inn sung panin amate thungetna na za in a, tuaciang amate hesuakin, na mite ii a mawna a khialna te theampo na maisak in.

⁴⁰ “Oh ka Pathian awng, tu in kote hong en ta'n a, hi mun pan kong thungetnate hong ngai ta'n.

⁴¹ Topa Pathian awng, tu in thoto in a, na vaangletna lim ahi Thuciamna Thingkuang taw Biakinnpi sungah tumin hi sungah a tawntungin om in. Na thiampite a nasepna theampo ah thupha pia in a, amate tungah na phatna hangin na mite theampo lungdam tahen.

⁴² Topa Pathian awng, na tealsa kumpipa nial heak in. Na naseampa David tungah na nei itna phawk tawntung in,” ci in thungen hi.