2 Khangtaanghthu 33 - Syin Chin Bible

Judah Kumpipa Manasseh

¹ Manasseh sia kum sawm le kum nii a phak ciangin Judah kumpi suak a, ama in Jerusalem pan kum 55 sung uk hi.

² Israel mite maisang a manaw lai in tua ngamsung pan Topa ii a nawkeak minamte ii a kiihuai ngamtatna te zui in Manasseh sia Topa tungah maw hi.

³ Ama in a pa Hezekiah ii suksiat sa doai biakna munte sa kik hi. Ama in Baal biakna tu in biaknataute sa a, Asherah numeipathian limte vawtin aksite bia hi.

⁴ Topa ii ama a tawntungin a kibiak natu mun a cina Biakinnpi sungah ama in doai biaknataute vawt hi.

⁵ Ama in Biakinnpi leitual nii te ah aksite biakna tu in biaknataute vawt hi.

⁶ Ama in a tapate Hinnom Kuam ah meihal biakpiakna in nei hi. Ama in mitbum le aisaanna zangh a, maisang thu a sontheite le thaa sam theite thu dongh hi. Ama in Topa tungah maw mama in a thin uuksak hi.

⁷ Ama in Topa Biakinnpi sungah milim khat koi a, tua mun in Pathian ii David le a tapa Solomon tungah, “Hi lai Jerusalem khua sung, hi Biakinnpi sung sia keima hong kibiak natu in, Israel minam sawm le niite ii ngamsung theampo panin ka tealna mun ahi hi.

⁸ Israel mite in ka thukham theampo zui in ka naseampa Moses ii amate a piak Thukham buppi a zui uh le a taanghpupite tungah ka piak ngam panin a kinawkeak tu ka oai buatu hi,” a ci sa hi.

⁹ Topa mihing Israel mite maisang a manaw lai in, tua ngamsung pan Topa ii nawkeak minamte ii mawna sang zong a lianzaw te ngawngawn a vawt tu in Manasseh in Judah mite lampui hi.

Manasseh Kisiik kik

¹⁰ Topa in Manasseh le a mite a kidop natu in son hi napi amate in nangai ngawl uh hi.

¹¹ Tua ahikom Topa in Assyria ngalkapmangte in Judah ngam simsak hi. Amate in Manasseh manin thikkawn le kol bulin Babylon ah paipui uh hi.

¹² Hi bangin a thuakna hu in ama kiniamkhiak in Topa a Pathian zuanin huna ngen hi.

¹³ Manasseh ii thungetna sia Pathian in saang a, Jerusalem ah heak kiksakin a ngam uksak kik hi. Hisia in Topa ma Pathian a hina thu Manasseh in telsak hi.

¹⁴ Tuasia zawkciang Manasseh in David Khuapi nisuana sangah a om luphung puanung sia Gihon Cik hui Kuam sung panin saksang ah Ngasa Kongpi le Ophel kici khuapi huam ciang dong saangsak vaial hi. Judah ngam sungah kulh taw a ki uum khuapi sim ah ngalkap honkhat le a uk ngalkapbu khat veu koi hi.

¹⁵ Ama in Biakinnpi sung panin ngamdang pathiante le tua munah ama koi milim sia ahizong, Biakinnpi omna mualtung le Jerusalem khua sung mun dangte ah a om doai sepna biaknataute ahizong khiin hi; ama in hite theampo Jerusalem khua pua sangah paipui in vawk siat hi.

¹⁶ Ama in Topa a kibiakna biaknatau zongh puua kikin tua tungah kipawlkhop biakpiaknate le lungdamko biakpiaknate pia hi. Ama in Israel te ii Pathian, Topa a biak natu in Judah mite theampo thupia hi.

¹⁷ Mite in biakna mun dangte ah sangaw biakpiaknate pia suak ahitazong amate in Topa tung bekma ah pia uh hi.

Manasseh ii Kumpi Maanna a Bona

¹⁸ Manasseh ii a nasep dangte theampo a Pathian tungah a thungetna le Topa Israel ii Pathian min taw kamsaangte ii ama tungah a thupuakte theampo Israel Kumpipate Taanghthu sungah kiciamtee hi.

¹⁹ Kumpipa ii thungetna le Pathian zo kikna, a kisiik kik ma in a vawt mawna khialna — a sia a vawtte, doai sepna munte le numeipathian Asherah lim, tuaciang a biak milimte — theampo sia Kamsaangte Taanghthu sungah kiciamtee hi.

²⁰ Manasseh thi a, kumpi inn ah kiphumin, a tapa Amon in a kumpiza laih hi.

Judah Kumpipa Amon

²¹ Amon in Judah kumpi a sua lai in kum 22 pha a, Jerusalem panin kum nii sung uk hi.

²² A pa Manasseh bangma in ama in Topa tungah maw in a pa ii biak milimte bia hi.

²³ Ahihang ama ahile a pa bang hi ngawl a, kiniamkhiak ngawlin Topa kung zuan ngawl hi; a pa sang zong mawzaw lai hi.

²⁴ Amon sia a uliante ma in thasawm a, kumpi inn sungah thatlum hi.

²⁵ Amon a suamte sia Judah mite in thatin, a tapa Josiah kumpi suaksak uh hi.