2 Khangtaanghthu 27 - Syin Chin Bible

Judah Kumpipa Jotham

¹ Jotham sia kum 25 a phakin kumpi suak a, Jerusalem pan kum sawm le kum luk sung uk hi. A nu sia Zadok ii tanu Jerushah ahi hi.

² Ama in a pa ngamtat bangin, Topa ii dik a sak te seam hi; ahihang a pa bang hi ngawlin Biakinnpi sungah ngimnamtui halin maw ngawl hi. A mite ahile mawna vawt veve uh hi.

³ Biakinnpi Saksang Kongpi a vawtpa le Jerusalem khua huam sung Ophel a kicina munah khuapi uumna luphung nasia tak a vawtpa sia Jotham ahi hi.

⁴ Ama in Judah mualtung teng ah khuapite saatin dui sungah kulhte le tausaangte sa hi.

⁵ Ama in Ammon kumpipa le a ngalkaphonpi simin zo hi. Tua zawkciang ama tungah zawthawk thu taw Ammon mite in phiangshia te kum simin kum thum sung a nuai a bangin piasak a: ngunn kilogramme 3,400, zungtaang tann 1,000 le mangtaang tann 1,000 ahi hi.

⁶ Thutakna taw Topa a Pathian thu a nit hu in Jotham thahat vaial hi.

⁷ Jotham ii kumpi maan sung thupiang dang teng, a ngal simnate le a paizia thute sia Israel le Judah Kumpipate Taanghthu sungah kiciamtee siat hi.

⁸ Jotham sia kum 25 a phak kumin kumpi suak a, Jerusalem pan kum sawm le kum luk sung uk hi.

⁹ Ama thi in, David Khuapi sungah kiphum a, tuaciang a tapa Ahaz in a kumpiza laih hi.