2 Khangtaanghthu 23 - Syin Chin Bible

Athaliah langpanin Ngal Thawna

¹ Kum luk sung a ngak zawkciang thiampi Jehoiada in a sep tu hun hong theng zo hi ci in khensat hi. Ama in ngalkapbu ngate: Jeroham ii tapa Azariah, Jehohanan ii tapa Ishmael, Obed ii tapa Azariah, Adaiah ii tapa Maaseiah le Zichri ii tapa Elishaphat te taw thukimna khat vawt uh hi.

² Amate Judah khuapi theampo ah khualhaw in Levi te le, bee le phung lutangte a vekpi in Jerusalem ah paipui kik uh hi.

³ Amate a vekpi in Biakinnpi sungah kikhawmtua in kumpipa ii tapa Joash taw thuciamna khat vawt uh hi. Jehoiada in amate tungah, “Hong thi san sa kumpipa ii a tapa sia hi lai ah om hi! David suan le paalte kumpi seam tu hi ci a, Topa ii kamciamsa thu om bangin ama zongh tu in kumpi suak tu hi.

⁴ Ih vawt tu sia hisia hi. Thiampite le Levi te, Sabbath ni in vaipuak nei tu in hong pai uh ciangin khen thum sua khen khat in biakinn kongpite cing tu a,

⁵ a dang khen thum sua khen khat in kumpi inn cing tu hi, a taanglai teng in Kongpi Bulpi ah om tu uh hi. Mite theampo biakinn leitual ah kikhawm tu uh hi.

⁶ A vaipuak a seam thiampite le Levi te simngawl kuama biakna innte sungah tumsak ngawl hi. Amate sia a ki aap sate ahikom tum thei hi, a dangte ahile Topa thupiak bang peal ngawlin zui in, a pua sangah a om tu hi.

⁷ Levi te in namsau doksa in kumpipa cingin, a paina pawpo ah om tu uh hi. Biakinnpi sung tum a sawm pawpo sia kithatlum tu hi,” ci hi.

⁸ Levi te le Judah mipite in Jehoiada thupiak bangin seam suak uh hi. Sabbath ni in vaipuak a pengte ciasak ngawl ahikom nasep ukte in naseam tu hong kuante le nasep a mansa a cia tute zongh na seamsak thei hi.

⁹ Jehoiada in Biakinnpi sungah a kep David kumpipa ii neisa lumte le teite uliante pia hi.

¹⁰ Ama in kumpipa cing tu in pasalte namsau dok sa in Biakinnpi mai kiimkot ah koi hi.

¹¹ Tua zawkciang Jehoiada in Joash pusuapui a, kumpilukhu khusakin kumpi ki ukna thukham laibu khat pia hi. Tuabangin ama kumpi kisuaksak hi. Thiampi Jehoaiada le a tapate in Joash sathau noai a, a om theampo in, “Kumpipa a khansau tahen,” ci in au uh hi.

¹² Mihonpite ii kumpipa a pokna aw Athaliah in a zaak ciang mihon kikhopna Biakinnpi ah manlang takin pai hi.

¹³ Ama in tua munah kumpi thak pa zongh kumpipa atu in a kituam koi Khuam sia kung, biakinn tumna ah ngalkap bute le lemle tumte in kiim uum in a ding mu hi. A om theampo lungdamin au a lemle tum hi, biakinn music thiamte in tumtheite taw tua poai lampui uh hi. Athaliah khuangai a, a puante baltham in “Hong leeheak hi! Hong leeheak hi!” ci in au hi.

¹⁴ Jehoiada in Athaliah sia biakinn huang sungah a kithalup tu dei ngawl ahikom a ngalkap bute pawlkhat sam a, “Ama la in, a ngualin a om a cingte kilaklaw panin paipui vun, ama suatak tu a sawm pawpo that vun,” ci hi.

¹⁵ Amate in ama zamh in kumpi inn ah paipui a tua mun Siphu Kongpi ah thatlum uh hi.

Jehoiada ii Puuaphat kiknate

¹⁶ Thiampi Jehoiada in Joash kumpipa le mipite ama taw kingawm in Topa mi ahi natu in thuciamna khat vawt hi.

¹⁷ Tua zawkciang amate Baal biakinn ah pai siatin biakinn susia hi. Amate in tua munah biaknataute le milimte saattham siatin biaknatau mai ah Baal thiampi Mattan thatlum hi.

¹⁸ Jehoiada in thiampite le Levi te Biakinnpi ah nasep a uk tu in koi hi. Amate in David kumpipa ii a see sa nasep om bangin a sep suak tu le Moses Thukham om bangin Topa tungah a kipia sangaw biakpiaknate a hal tu ahi hi. Amate in tumthei te le poai vawtna te zongh uk uh hi.

¹⁹ Jehoiada in biakpiakna ah a thiang ngawlte peuma a khaam tu in biakinn kongcingte zongh koi hi.

²⁰ Ngalkap bute, khua mi lampuite, ulian te le mipite theampo in Jehoiada pawm a, a kingual sa in Biakinnpi pan kumpi inn ah kumpipa paipui uh hi. Amate kongpi lianbel panin tumin tuaciang kumpi tokhum tungah kumpipa hong to hi.

²¹ Tu in Athaliah kithatlum zo ahikom khuapi thimdide in mi theampo lungdamna taw kidim uh hi.