2 Khangtaanghthu 22 - Syin Chin Bible

Judah Kumpipa Ahaziah

¹ Arab te pawlkhat in Jerusalem simin Jehoram kumpipa ii tapa teng a nobel Ahaziah simngawl thatlum siat hi. Tua ahikom tu in Jerusalem khua mite in Ahaziah sia a pa ii kumpiza laihsak hi.

^2-3 Ahaziah kum 22 a phakin kumpi suak a, Jerusalem khua pan kum khat sung uk hi. A nu Athaliah — Israel kumpipa Omri ii tunu, Ahab kumpipa ii tanu — ii ngaisutna a piak hu in ama a tatsia suaksak a Ahaziah zongh Ahab kumpipa innkuan ii ngamtatna zui hi.

⁴ A pa thi zawkciang Ahab kumpipa innkuanpui dang teng sia ama ngaisutna a piate suak ahi hu in Topa tungah maw in tuate in ama puksak hi.

⁵ Amate ii ngaisutna piak bangin ama in zui a Syria kumpipa Hazael taw ngal kidona ah Israel kumpipa Joram pawlpui hi. Gilead ngam Ramoth ah ngalkaphonpite kisim a, ngalsimna ah Joram liam hi.

⁶ A liamna kibawl tu in Joram sia Jezreel khuapi ah heak kik a, tua munah Ahaziah in ve hi.

⁷ Hi bangin Joram a ve in a pai sia Pathian in Ahaziah ii puk natu in a zak ahi hi. Tua mun ah Ahaziah a taam sungin Ahab kumpi khang ngui siasak tu in Topa ii tealsa Nimshi ii tapa Jehu in ama le Joram thato hi.

⁸ Pathian ii tua khangngui tungah a thukhen bang Jehu in a taksuasak laitakin Ahaziah khualhawna ah a zui Ahaziah ii tute le Judah lampuite pawlkhat taw kisii uh hi. Jehu in amate that siat hi.

⁹ Ahaziah a kizon ciang a bukna Samaria khua sungah mu hi. Amate in ama sia Jehu kungah paipui in thatsak hi. Ahihang amate in Topa atu a sep thei za a seam a pu Jehoshaphat kumpipa a zatakna uh taw Ahaziah ii luang sia phum hi. Ahaziah innkuan sungah kumpi ngam uk thei tu khat zongh taang ngawl hi.

Judah Kumpinu Athaliah

¹⁰ Ahaziah kumpipa ii nu Athaliah in a tapa a kithalupsak sia a heak po ciang Judah kumpi innkuanpui theampo a kithalup natu in thupia hi.

¹¹ Ahaziah in thiampi Jehoiada taw a kiteang Jehosheba a kici suapui sealh numei khat nei hi. Tua nu in Ahaziah ii tapate khat a hi Joash a kici pa suatak ku in, a kithat tu kumpi tapa dangte kung panin la a, nau omh khat taw Biakinnpi sung lupna inndoi khat sungah phual hi. Tuabangin a seal hu in Jehosheba in Joash sia Athaliah khut sungah a thi natu panin suatak hi.

¹² Athaliah ii kumpinu a sep kum luk sung theampo tua munah ama buu top hi.