2 Khangtaanghthu 16 - Syin Chin Bible

Israel taw Buainate

¹ Judah kumpipa Asa ii kumpi maanna kum 36 kumin Israel kumpipa Baasha in Judah ngam sim a, Judah ngam ah a tum a pusuak leang theampo a khaam nop manin Ramah sia kulh taw a uum kipan hi.

² Tua ahiciang Asa in Biakinnpi sumkholnate le kumpi inn pan khamh le ngunn la in Damascus ah Syria kumpipa Benhadad tungah thaak a, hi kam teng vaitha hi:

³ “Ih pate a kipawl bangma in ei zongh kipawl tawng. Hi khamh le ngunnte sia letsong in kong puak hi. Tu in Israel kumpipa Baasha taw na kipawlna sia tatsak vun, tua hile ka ngam pan ama ii ngalkapte ciasak kik tu hi.”

⁴ Asa ii kam vaithak sia Benhadad lungkimin, a ngalkapmangte le a ngalkaphonpite Israel khuapite sim tu in paisak hi. Amate in Ijon, Dan, Abel Beth Maacah le ankholna Naphtali khuapite theampo la hi.

⁵ Baasha kumpipa in tua thu a zaak ciang Ramah khua a kulh vawt tawlnga in a nasep nusia hi.

⁶ Tuasia ciang Asa kumpipa in Judah ngamsung theampo pan mihing khawmtua in Baasha ii Ramah ah a zak suang le thingte puasakin Geba le Mizpah khuapi kulhte vawtna in zangh hi.

Kamsaangpa Hanani

⁷ Tua hunin kamsaang Hanani sia Kumpipa Asa kungah pai a, “Topa na Pathian suang ngawlin Syria kumpipa na suan zawk hu in Israel kumpipa ii ngalkaphonpi sia nangma khut sung pan suakta zo hi.

⁸ Ethiopia le Libyan te in siphu ngalleang tam mama le siphu ngalkap tam mama taw ngalkaphonpite nei hi ngawl ka na ziam? Ahihang Topa muangin suang na hikom ama in amate hong zosak hi.

⁹ Topa in ama tungah thumaanna a neite tungah thahatna pia nuam in leitung buppi encik nginge hi. Na mawmawt ngamtatna hu in tu pan kipan ngal do tawntung tu ni hi,” ci hi.

¹⁰ Hi thu in kamsaangpa tungah Asa thin uuksak mama ahikom ama in kamsaangpa thikkol bulsak hi. Hi hunsung teng mama in Asa in a mite pawlkhat a vawtsiat kipan hi.

Asa ii Kumpi Maanna a Bona

¹¹ Asa ii kumpi maan sungin a piang thute theampo a kipat pan a tawpna dong Judah le Israel Kumpite Taanghthu sungah kiciamtee hi.

¹² Asa ii kumpi a sep a kum 39 kumin a peang ah meima ngilo khatvei in a peang bai hi; ahihang tuasia hun ngawngawn in ama in Topa tungah hu ngen ngawlin syavuante in bawlsak zaw hi.

¹³ Tua zawk a kum nii ciang ama thi a,

¹⁴ David Khuapi sungah ama mama ii khuaksa suangkuul sungah kiphum hi. Amate in a luang phum natu a puuana in a tungah hel namtuite le paaknamtui thau te zut in ama ii thi a khuangaina in a lian mama meimang khat sep uh hi.