2 Corinth te 8 - Syin Chin Bible

Tapidawte Piakna

¹ Koma suapuite awng, Pathian ii thuthiamna in, Macedonia pawlpite sungah bang matutna nei ziam ci sia kong hesak nuam hi.

² A thuak ngimna te taw amate nasia takin kize et hi; ahihang a lungdamna uh lian mama ahikom, amate zawng mama napi, piakna ah ngo thei mama uh hi.

³ Amate in ahi theiza uh pia a, a ci thei za tungsia ngawngawn zongh pia uh hi, ka ci ngam hi. Amate uuk thu in

⁴ Judea ngam a om Pathian ii mihingte huna sungah a kihel thei lei natu in ko tungah hesuak hong ngen uh hi.

⁵ Tuate in kote lametna sang zonghin nasia zaw hi! A masa phit in amate Topa tungah kipia uh hi; tua zawkciang Pathian ii deina taw amate in kote tung zongh ah hong kipia hi.

⁶ Tua ahiciangin hi nasep a pan Titus tungah a zopto suak natu le hi ki itna sungah sepna sia a khuangkhim dong na sep to thei natu in hong hu natu ka hanthawn uh hi.

⁷ Note ii na nei uh ahi: thu upna, thusonna, thuheakna, midangte hu tu lawpna le kote nong itna uh theampo ah kicing mama nu hi. Tua ahikom in, itna taw kisai nasepna zong ah na ngo tatak tu uh kong dei uh hi.

⁸ Zui tu ngeinate hong koisak ka hi bua hi. Ngualdangte sia tua zata in ngual hu nuamin a lawpna thu kong lakna taw note zongh ngual na itna uh sia bangza ahi tatak ziam ci in ka tel nopna ahi hi.

⁹ Topa Jesus Christ ii thuthiamna sia na heak uh hi; ama sia hau mama napi in, ama zawnna taw note a hau na sua thei natu in note atu in ama le ama a zawngin hong kivawt ahi hi.

¹⁰ Kei ngaisutna pan, ningkum a na patsa uh nasep sia tu in na man thiang tu sia phazaw hi. Note sia a diang phitte na hi uh dom ngawlin, dian tu a uukte zongh na hi uh hi.

¹¹ Tua ahiciang seam tan vet tavun a, man thiang tavun! Na ngeal uh lai in na lawp uh bangma in, man thiang tu zongh na lawp tavun a, tu in na neisun uh po taw naseam vun.

¹² Piak tu na thalawp uh le, na nei ngawlna tung pan hi ngawlin, na neina taw kizui in na piak tu za letsong sia Pathian in hong saang tu hi.

^13-14 Ngualdangte noptuam natu in note tungah vanhngit hong suan nuam ka hi bua hi; ahihang tu laitakin note ci thei na hi uh ciang, a cimawte hu le uhte ma pha tu hi; tua hile note na cimawk hun ciang amate ci thei in no hong hu tu hi. Hi bangin noma ngeal a kikimin, na kihu vadiam tu uh ahi hi.

¹⁵ Laithiangtho in, “Tam a kaikhawm sia atu tam lei ngawl tu a, tawm a kaikhawm sia atu zongh tawm lei ngawl tu hi,” ci hi.

Titus le A kitholpuite

¹⁶ Kote ii no kong hu nop uh bangma in Titus ii note lawp tak a hong husak Pathian tungah bangza in ka lung uh dam ziam!

¹⁷ Kote ngetna hong saang bek hi ngawl hi; note hong hu tu sia lawp a, ama hantang in note kung hong zot tu sia ama thu taw khensat hi.

¹⁸ Lungdamna thuhil nasepna ah pawlpi theampo ii a thasia mama ih suapuipa khat sia ama taw kong paisak uh hi.

¹⁹ Tuasia bek hi ngawlin, ngual ka hu nopna uh ka lak thei natu in Topa minthan natu ka sep suak uh, hi itna taw kisai nasepna sungah kote taw khual a haw khawm tu in pawlpi ii tealsa, a kiseesa ahi hi.

²⁰ Ngo tak a, letsong kipiaknate ka zeakna uh ah kuama a phun ngawl natu in ka kidawm uh hi.

²¹ Ka tupna uh sia Topa mai bek ah hi ngawlin, mihingte mai zongh ah a maan in a seam nuam ka hi uh hi.

²² Tua ahikom ih suapuipa sia amate taw kong paikhawmsak uh hi; tamvei ma a zia ka en zo uh a, a tawntungin ngual hu tu lawp mama hi ci in ka mu uh hi. Tu in ama in note tungah muanna hong nei tatak ciangin ama in ngual hu tu lawp vaial hi.

²³ Titus ahile, keima naseppui hi a, note hong hu tu in keima taw naseampa ahi hi; amate taw a kithawl suapui dangte sia pawlpite taangmi hi a, Christ minthangsak hi.

²⁴ Note kong kiphatsak pui na uhte thumaan hi ci in pawlpi theampo in a tel natu in amate tungah na itna uh na lak tavun.