1 Timothy 5 - Syin Chin Bible

Thu Umte tungah ih Vaipuak

¹ Pasal khanghaam zaw khat sia teih heak vun a, na pa bangin ngaisun in, na thuum zaw vun. Pasal khangmoizawte na suapui bangin vawt vun,

² nupi a haamzawte sia na nute uh bang, numei a moizawte sia thinsung thiangtho tak taw na suapuinumeite uh bangin na vawt vun.

³ Amate nguak a, a om takpi meingongte thasia vun.

⁴ Ahihang meingong khat in ta le tu a nei le, amate in biakna huvau sep tu a neite a innkuan sungah sin phot tahen, tua hile a nute a pate le a pute a pite ii ama tungah a sepnate a thuk kik hi tu hi, banghang ziam cile tua in Pathian diksak thu ahi hi.

⁵ Ama nguak om a, kuama ama a en tu a nei ngawl meingong khat in, a lametna sia Pathian tungah koi a, sun taw zan taw ama ii hu natu in thungen hi.

⁶ Ahihang meingong khat ama le ama cii le sa nopsakna sungah a kidia khat sia nungta napi a thisa ahi hi.

⁷ Amate tungah kuama in maw a zon thei ngawl natu in, hi lamlaknate hil sawn in.

⁸ Ahihang khat pawpo in a mealheakte, a tuanin ama innkuanpuite a en nuam bua uh le ama in upna thu a nial suak a, thu um ngawlte sangin sia zaw lai hi.

⁹ Meingong khat sia kum sawmluk a vaal bualai nale meingong tepteena lai sungah hel heak vun. Tua bek hi ngawlin tepteena lai sungah a tum thei tute sia khatvei bek pasal a neite,

¹⁰ tuaciangin ngamtat pha nei hi ci in a kisonte: a tate pha takin a khangtosakte, a inn ah zin pha takin a dote, Tapidaw puite tungah a kiniamkhiakte, a ngim nga mi a hute, na pha seam tu in a kipumpiakte a hi tu kisam lai hi.

¹¹ Ahihang a khangmoi zaw meingongte sia tua tepteena lai sungah hel heak vun, banghang ziam cile a pumpi deina zui in pasal a nei nop kik ciang, Christ kung panin lampial uh hi,

¹² tuabangin ama tungah kamciam a piak maksak sia a paltanna taw a maw suak uh hi.

¹³ Amate in inn khat pan inn khat ah vak kawkoai in hunte a luithawthongin bosak uh hi; a siazaw lai thu in, amate in ngual ngen a, mihing theampo nuammawin, a pau tuak ngawl thute pau uh hi.

¹⁴ Tua ahikom kei deina ah meingong khangmoite in pasal nei in ta nei a, a bangkua uh en tahen, tua hile ih ngalte in amate siatna a son tu hunpha a nga buatu uh hi.

¹⁵ Banghang ziam cile meingong pawlkhat in Satan nungzui tu in heakkik zo uh hi.

¹⁶ Ahihang Tapidaw numei khat in, a bangkua sungah meingong a om le, pawlpi tungah vanhngit suan ngawlin ama in en tahen, tua hile pawlpi in amate nguak a om meingong tatak teng en thei zaw tu hi.

¹⁷ Lampuite bangin na pha tak a seam pawlpi upate, a tuanin thuhilna le laithiangtho hilna nasia tak a seamte, thaman a thuap nii in nga tuak hi ci in ngaisut tu ahi hi.

¹⁸ Banghang ziam cile, laithiangtho in, “Taang a cil khuital muk tuamsak heak vun,” ci a, “Naseamte in a thaman a nga hamtang tu kilawm hi,” ci hi.

¹⁹ Pawlpi upa khat a kimawsakna ah, nii ahibuale a tamzaw tetti a om buale, thu in sim heak vun.

²⁰ Ngualdangte zongh a lau thei natu in a maw a khialte mihonpi mai ah teih in.

²¹ Na nasep napo kuama nguptuam paihtuam nei ngawlin kong thupiakte na nit natu in Pathian mai, Christ Jesus mai le a thiangtho vantunglalangte mai ah ciliap huai takin kong sawl hi.

²² Topa naseam tu in aapna in mihing khat pawpo tungah na khut nga memeang heak in. Ngualdangte mawna vawtna sungah kihel heak in; nangma le nangma thiangtho takin kikeam in.

²³ Na cina thei tawntung ahikomin, na ngilsung an a zaan natu tui bek dawn ngawlin sapittui tawm ne in.

²⁴ Mihing pawlkhatte mawna sia kilangh papai a, a mawna tungtaang ah thu khenna thuak masa pai hi; ahihang a dangte mawna ahile kinungmu pheang hi.

²⁵ Tuabang ma in ngamtat phatnate zongh kilangh pal a, a kilangh lei ngawlte ngawngawn zongh kiseal cip thei ngawl hi.