1 Timothy 1 - Syin Chin Bible

¹ Jesus Christ sawltak khat ahi Paul in, eite hong Ngumpa Pathian le eite lametna Jesus Christ thupiak na bangin —

² Upna sungah ka tapa tatak ahi Timothy tungah lai kong thaak hi: Pa Pathian le ih Topa Jesus Christ in, thuthiamna, hesuakna le thinnopna nang hong pia tahen.

Kihilna Maan ngawlte pan Kidop natu

³ Macedonia ah ka pai lai, kong sawl sa bangma in Ephesus ah na taam tu kong deisak hi. Tua munah mihing pawlkhat in a maan ngawl upna thubulte hil hi, amate tuabang hilna pan a tawp natu in, thu na pia in.

⁴ Kinialna bek a piangsak taanghthute le taanghpupite khang tepteena saute a vawk natu in na son in; tuate in upna taw a kihe Pathian ngealna taangtut natu in kizangh ngawl hi.

⁵ Hi thupiakna ii tupna sia, lungtang thiangtho, thinsung thiangtho le upna tatak panin hong piang ki itna a khanto thei natu deina hi.

⁶ Mihing pawlkhat in hite panin lampial in a mawmawthuai kam kikupnate sungah ngammang uh hi.

⁷ Amate in Pathian thukham hil syate suak nuam ahihang, amate kammal tatak ma ahizong, kimuan tatakna taw a son uh thute ahizong a tel bua uh hi.

⁸ A kizak tu bangin a kizangh nale Thukham sia pha hi ci in ih he hi.

⁹ Ih phawk tu a kul thu sia, thukhamte sia mihing phate atu a kivawt hi ngawlin, thukham paltante le khialna lian vawtte, pathian selte le a mawte, biakna kin ngawl le thaa mi ahi ngawlte, pate nute a thatlumte, mihing thatte,

¹⁰ numei le pa huvau a paktatte, numei le pa ngeina ngawlin a ngamtate, mihing a mante, leilotin thumaan ngawl tetti a pangte tua ahibuale a pha a kho upna thubul taw a kileebulin ngamtatna a neite atu in a kivawt ahi hi.

¹¹ Tuabang hilcianna sia ka thansak tu in hong ki aap lungdamna thu sungah kimu a, tua Lungdamna Thupha sia a minthang thupha toai Pathian kung pan hong pai ahi hi.

Pathian ii Hesuakna hu in Lungdamkona

¹² Ka nasep natu in thahatna hong pia Jesus Christ ih Topa tungah lungdam ka ko hi. Ama ii na seam tu in kilawm hong sakna le nasep hong piak hu in, ama tungah ka lungdam hi,

¹³ ahihang hun bosa sungah ama ngensia in, vawtsia in lang zazaan ngei hi kaleng, upna ka nei ma, heakna nei ngawlin ngamta ka hikom Pathian in kei hong hesuak hi.

¹⁴ Tuaciangin ih Topa in a thuthiamna a kicing takin hong buak a, Jesus Christ taw pumkhat hina sungah eite neisa ahi upna le ki itna kei tungah hong pia hi.

¹⁵ Jesus Christ in mawneite hun tu in leitung ah hong pai hi: ci sia thumaan hi a, a cing takin up tu le saan tu ahi hi. Tua a mawte sung pan keima in a mawbelpa ka hi hi,

¹⁶ ahihang nungsang ciangin ama umin tawntung nuntakna a saang tute ii a ettee tu in, kei a mawbelpa tungah Jesus Christ in thinsauna a cingin hong lak thei natu, Pathian in kei hong hesuak hi.

¹⁷ Ama bek Pathian ahi a thi thei ngawl, a kimu thei ngawl Tawntung Kumpipa tungah patoaina le minthanna a tawntung a tawntungin om tahen! Amen.

¹⁸ Ka ta Timothy awng, nangma huvau a hun bosa sungah kamsaan sonkholna a om bangin, hi thupiakna sia na khut sungah muangin kong aap hi. Ngal pha tak na sim thei natu in tua kammalte ngalhiam in zangh in a,

¹⁹ na upna kholet in, thinsung thiangtho na nei ta'n. Mihing pawlkhat a thinsung uh pan a phaw thute ngai ngawlin a upna uh lalsak uh hi.

²⁰ Satan vaangletna nuai ah aapna taw daan ka piaksate sungah Hymenaeus le Alexander te kihel uh hi; Pathian min a daisak nawn ngawl natu in hi thu in amate hil tu hi.